Esekielu

8 Kae i te ono o tausaga, i te ono o masina, i te lima o aso o te masina, i te taimi ne sagasaga ei au i loto i toku fale kae ko toeaina o Iuta e saga‵saga i oku mua, ne puke mai a te lima o te Aliki Sili ko Ieova ki a au i konā. 2 I taku kiloatuga, ne lavea ne au se mea e tai foliga pelā me se afi; e isi se afi mai i lalo i te mea e foliga pelā me ko tena taugasulu,+ kae mai i tena taugasulu ki luga, ana foliga e malapu‵lapu, e pelā mo te malapu‵lapu o aulo e palutasi mo te siliva.+ 3 Tenā ne ‵fola mai ei ne ia se mea e foliga pelā me se lima kae puke ne ia au i mu laulu o toku ulu, kae ne ave au ne te agaga ki te va o te lalolagi mo te lagi kae aumai au ki Ielusalema e auala i fakaasiga mai i te Atua, ki te mataloa tafa ki loto o te fakai+ telā e saga atu ki te feitu ki mātū, telā e tu i ei te fakailoga* o te masalosalo telā e fakamalosi aka ne ia te masalosalo.+ 4 Kae kiloke! ne nofo atu i konā a te ‵malu o te Atua o Isalaelu,+ e foliga mai e pelā mo te mea ne lavea ne au i te vanu laugatasi.+

5 Tenā ne fai mai ei a ia ki a au: “Te tama a te tagata, fakamolemole, kilo aka ou mata ki te feitu ki mātū.” Tenā ne kilo aka ei oku mata ki mātū, kae i konā, i te feitu ki mātū o te mataloa o te fakai ko te fakailoga* o te masalosalo i te auala ki loto. 6 Ana muna ki a au: “Te tama a te tagata, e lavea ne koe a mea matagā, kae fakatakalia‵lia e fai ne te kāiga o Isalaelu i konei,+ ko mea kolā e fai ei au ke faka‵mao mai i toku koga tapuaki?+ Kae ka lavea ne koe a mea fakatakalia‵lia kolā e sili atu te matagā.”

7 Tenā ne aumai ei ne ia au ki te mataloa o te koga ateatea, kae i taku kiloatuga, ne lavea ne au se pūga i te ‵pui. 8 Ana muna ki a au: “Te tama a te tagata, fakamolemole fai ke pu a te ‵pui.” Tenā ne fai ei ne au se pūga i te ‵pui, kae ne lavea ne au se mataloa. 9 Ana muna ki a au: “Fano ki loto kae onoono atu ki mea matagā kae fakatakalia‵lia kolā e fai ne latou i konā.” 10 Tenā ne fano ei au ki loto o onoono, kae ne lavea ne au a ata o vaegā manu ‵tolo kese‵kese mo manu fe‵kai fakatakalia‵lia+ mo tupua fakatakalia‵lia katoa o te kāiga o Isalaelu;+ ne tā ki luga i te ‵pui kātoa. 11 Kae toko 70 toeaina o te kāiga o Isalaelu e ‵tu i olotou mua, kae ko Iasania te tama tagata a Safana+ e tu atu i a latou. A tino taki tokotasi e isi ne olotou mea tuku afi i olotou lima, kae ko te kaumana manogi gali o mea ma‵nogi e fanaka ki luga.+ 12 Ne fai mai a ia ki a au: “Te tama a te tagata, e lavea ne koe a mea e fai ne toeaina o te kāiga o Isalaelu i te pouliga, ko tino taki tokotasi i potu tafa ki loto kolā e faka‵tu i ei olotou tupua? Me e fai aka latou, ‘E se lavea ne Ieova tatou. Ko oti ne tiaki ne Ieova te fenua.’”+

13 Kae ne toe fai mai a ia ki a au: “Ka lavea ne koe a mea fakatakalia‵lia kolā e sili atu te matagā e fai ne latou.” 14 Tenā ne aumai ei ne ia au ki te auala ki loto o te mataloa o te fale o Ieova i te feitu ki mātū, kae ne lavea ne au i konā a fāfine e saga‵saga kae ‵tagi ona ko te atua ko Tamusa.

15 Kae ne toe fai mai a ia ki a au: “E lavea ne koe te mea tenei, e te tama a te tagata? Ka lavea ne koe a mea fakatakalia‵lia kolā e sili atu te matagā i lō mea konei.”+ 16 Tenā ne aumai ei ne ia au ki loto i te koga ateatea tafa ki loto o te fale o Ieova.+ I konā, i te auala ki loto o te faletapu o Ieova, i te va o te fakaosoga mo te fatafaitaulaga, kāti se toko 25 tāgata e ‵fuli olotou tua ki te faletapu o Ieova kae ko olotou mata e ‵fuli ki te feitu ki saegala; kae e ifo eiloa latou ki te la i te feitu ki saegala.+

17 Ne fai mai a ia ki a au: “Te tama a te tagata, e lavea ne koe te mea tenei? E a, se mea faigofie fua ki te kāiga o Iuta ke fai a mea fakatakalia‵lia konei, ke faka‵fonu te fenua ki fakasauaga+ kae tumau i te faiga ke kaitaua au? Ko ‵velo mai nei ne latou a te kaula o te lakau* ki toku isu. 18 Tela la, ka gasuesue au i toku kaitaua. Oku mata ka se kilo alofa atu ki a latou; io me alofa atafai au.+ E tiga eiloa e ‵tagi mai latou i se leo maluga ki oku taliga, ka se lagona eiloa ne au latou.”+