Kenese

25 I te taimi nei ne toe avaga a Apelaamo ki te fafine e igoa ki a Kitula. 2 Fakamuli ifo, ne fai ana tama i a Apelaamo kolā ko Semelana, Iokasana, Metana, Mitiana,+ Isepaka, mo Suaa.+

3 Ne fai a tama a Iokasana ko Seepa mo Titana.

A tama a Titana ko Asulimo, Letusimo, mo Leumemo.

4 A tama tāgata a Mitiana ko Efa, Efala, Hanoka, Apitu mo Eleta.

A latou katoa konei ko tama tāgata a Kitula.

5 Fakamuli ifo, tuku atu ei ne Apelaamo ana mea katoa ki a Isaako,+ 6 kae ne tuku atu ne Apelaamo a meaalofa ki ana tama tāgata i ana avaga fakasalasala. I te taimi koi ola ei a ia, ne uga ne ia a latou ke olo ki te feitu ki saegala, ke ‵mao mai tena tama ko Isaako,+ ki te fenua ki Saegala. 7 A tausaga o te olaga o Apelaamo e 175. 8 Tenā ne ‵pusi ei ne Apelaamo tena toe manavaga, mate atu ei, kae ko oti ne ola a ia i se olaga leva kae fakamalie loto, kae ne fakatasi atu ki ana tino.* 9 Ne tanu a ia ne ana tama ko Isaako mo Isamaeli i te ana o Makapelu i te manafa o Efelona te tama tagata a Sioala te tino Heti telā e tu i mua o Mamele,+ 10 ko te manafa telā ne ‵togi ne Apelaamo mai tino Heti. Ne tanu i konā a Apelaamo fakatasi mo tena avaga ko Sala.+ 11 I te otiga ne mate a Apelaamo, ne tumau eiloa te Atua i te fakamanuia atu ki tena tama ko Isaako,+ kae ne nofo pili atu a Isaako ki Pia-laloi.+

12 Tenei te tala fakasolopito o Isamaeli,+ te tama tagata a Apelaamo i a Hakala+ te fafine Aikupito, te tavini fafine a Sala.

13 Konei la a igoa o tama tāgata a Isamaeli e ‵tusa mo kāiga ne ‵tupu mai i ei: a te toekimua a Isamaeli ko Nepaiota,+ ‵tao atu ki ei ko Ketala,+ Atapeelu, Mepesama,+ 14 Mesema, Tuma, Mase, 15 Hatata, Teema, Ietula, Nafiso mo Katema. 16 Konei a tama tāgata a Isamaeli kae konei olotou igoa e ‵tusa mo olotou koga ‵nofo mo olotou fakai,* e toko 12 olotou takitaki e ‵tusa mo olotou matakāiga.+ 17 Kae ko Isamaeli ne ola i tausaga e 137. Ne ‵pusi tena toe manavaga, mate atu ei, kae ne fakatasi atu a ia ki ana tino.* 18 Kae ne ‵nofo atu latou i te koga e kamata mai i Havila+ i tafa o Sula+, telā e pili ki Aikupito, ke oko eiloa ki Asulia. Ne nofo a ia i tafa o ana taina* katoa.+

19 Kae tenei te tala fakasolopito o Isaako te tama a Apelaamo.+

A Apelaamo ko te tamana o Isaako. 20 Ko 40 tausaga o Isaako i te taimi ne avaga ei a ia ki a Lepeka te tama fafine a Petueli+ te tino Alamea mai Patana-alama, te tuagane o Lapana te tino Alamea. 21 Kae ne fakatagi atu faeloa a Isaako ki a Ieova e uiga ki tena avaga, me i a ia e se afu; tenā ne tali atu ei a Ieova ki tena fakatagi, faitama ei a tena avaga ko Lepeka. 22 Kae ne kamata eiloa o fakatau taua a tama‵liki i loto i te moegatama o tou fafine,+ kae ne fai aka tou fafine: “Kafai tenei te mea ka tupu, se a te pogai e ‵tau ei au o ola?” Tenā ne fesili atu ei a ia ki a Ieova. 23 Kae ne fai atu a Ieova ki tou fafine: “E lua a atufenua konā i loto i tou moegatama,+ kae e lua a atufenua ka ma‵vae mai loto i a koe;+ e tasi te atufenua ka malosi atu i te suā atufenua,+ kae ko te tamaliki matua ka tavini atu ki te tamaliki foliki.”+

24 I te taimi ne fanau ei a ia, kiloke! e isi se masaga i loto i tena moegatama. 25 Ne tō mai te tamaliki muamua ki tua kae kula katoa, kae ko tena foitino kātoa e pelā me se laugatu fulufulua;+ ne fakaigoa ne latou a ia ki a Esau.*+ 26 Mai tua i konā ne tō mai tena taina ki tua mo tena lima e ‵piki ki te mulivae o Esau,+ fakaigoa ei ne ia ki a Iakopo.*+ A Isaako ko 60 ana tausaga i te taimi ne fanau ei ne Lepeka a lāua konei.

27 I te taimi ko ma‵tua ei a tama‵liki tāgata konei, ne fai a Esau mo fai se tino apo i te tuli manu,+ se tagata o te vao, kae ko Iakopo se tagata amio ‵lei kae nofo sāle i faleie.+ 28 Kae ne alofa a Isaako ki a Esau me e kai sāle a ia i ‵kano o manu ona ko tou tagata, kae ko Lepeka ne alofa ki a Iakopo.+ 29 I te taimi e tasi ne ‵tunu ne Iakopo se supu kae ko Esau ko foki mai i te vao mo te fi‵ta. 30 Ne fai atu a Esau ki a Iakopo: “Fakamolemole, aumai fakavave ne mu supu kula a koe ma aku, me i a au ko fi‵ta!”* Tenā te pogai ne fakaigoa ei a ia ki a Etoma.*+ 31 I konā loa ne fai atu a Iakopo: “‵Togi mai muamua ki a au tou tofi toekimua!”+ 32 Kae ne toe fai atu a Esau: “Au ko pili o mate! Se a te aoga o te tofi toekimua ki a au?” 33 Ne toe fai atu a Iakopo: “Tauto muamua mai ki a au!” Ne tauto atu a Esau ki a ia kae ‵togi atu tena tofi toekimua ki a Iakopo.+ 34 Tenā ne tuku atu ei ne Iakopo ki a Esau a falaoa mo supu piini,* ne kai kae inu a ia ki ei, kae ne tu aka a ia o fano. Tela la, ne manatu māmā eiloa a Esau ki tena tofi toekimua.