Te Muamua Nofoaiga Tupu

11 Fakamuli ifo, ne maopoopo a tino Isalaelu katoa ki a Tavita i Hepelona+ kae fai atu: “Kiloke! A matou ko ou ivi mo ou ‵kano.*+ 2 I taimi ko ‵teka, kae koi fai ei a Saulo mo tupu, ko koe eiloa ne takitaki ne koe a Isalaelu i ana taua.*+ Kae ne fai atu a Ieova tou Atua ki a koe: ‘Ka tausi ne koe oku tino Isalaelu, kae ka fai koe mo takitaki o oku tino Isalaelu.’”+ 3 Tenā ne o‵mai ei a toeaina katoa o Isalaelu ki te tupu i Hepelona, kae ne fai ne Tavita se feagaiga mo latou i Hepelona i mua o Ieova. Tenā ne ‵tofi ei ne latou a Tavita ke fai mo tupu o Isalaelu,+ e ‵tusa eiloa mo te fakatonuga a Ieova e auala i a Samuelu.+

4 Fakamuli ifo, ne olo atu a Tavita mo tino Isalaelu katoa ki Ielusalema, telā ko Iepuse,+ te koga ne ‵nofo i ei a tino Iepuse+ i te fenua. 5 Ne fakaitaita ne tino kolā e ‵nofo i Iepuse a Tavita: “Ka se mafai lele eiloa o ulu mai koe ki loto i konei!”+ Kae ne ‵fao eiloa ne Tavita a ‵pui malosi o Siona,+ telā ko taku nei ko te Fakai o Tavita.+ 6 Tenā ne fai atu ei a Tavita: “A te tino muamua e tamate ne ia a tino Iepuse ka fai mo fai se takitaki mo se pelenise.” Kae ne mua atu a Ioapo+ te tama tagata a Seluia, kae ne fai a ia mo fai se takitaki. 7 Tenā ne nofo ei a Tavita i loto i te fakai telā e ma‵losi ana ‵pui. Tenā te pogai ne fakaigoa ei ne latou ki te Fakai o Tavita. 8 Ne kamata o faite fakatamilo ne ia te fakai, mai te Koga Maluga ki kogā koga i ana tafa, kae ne toe fakafou ne Ioapo a te ‵toega o te fakai. 9 Tenā ne gasolo aka faeloa o malosi atu+ a Tavita, kae ne ‵kau fakatasi eiloa a Ieova o kautau ki a ia.

10 Konei a takitaki o toa ‵mafi a Tavita, kolā ne ‵lago malosi atu ki a ia i tena pulega fakatupu, fakatasi mo tino Isalaelu katoa, ke fai a ia mo tupu e ‵tusa mo te fakatonuga a Ieova e uiga ki Isalaelu.+ 11 Tenei te fakasologa o igoa o toa ‵mafi a Tavita: ko Iasopeamo+ te tama tagata a te tino Hakamoni, te takitaki o te tokotolu.+ Ne fakaaoga ne ia tena tao ke tamate ki ei a tino e sili atu mo te toko 300 i te taimi eiloa e tasi.+ 12 E tafa atu ki a ia ko Eleasalo+ te tama tagata a Toto te tino Ahoi.+ A ia se tokotasi o toa ‵mafi e tokotolu. 13 Ne ‵nofo a ia mo Tavita i Pase-tamime,+ te koga ne maopoopo fakatasi ei a tino Filisitia mō te taua. E isi se laukele i konā e ‵fonu i kalite, kae ne ‵tele kea‵tea a tino ona ko tino Filisitia. 14 Kae ne tu a ia i tena tulaga i te kogaloto o te malae kae ‵pulu ne ia latou kae ne tamate faeloa ne ia a tino Filisitia, tenā ne aumai ei ne Ieova se manumaloga*+ lasi.

15 E tokotolu tāgata mai te toko 30 takitaki ne olo ifo ki lalo i te kaupapa, ki a Tavita i te ana o Atulama,+ kae ko te kautau o Filisitia ne ‵nofo atu i te Vanu o Lefaima.+ 16 I te taimi tenā, a Tavita ne nofo atu i se koga telā e isi sena ‵pui malosi, kae e isi se potukau leoleo o tino Filisitia i Peteleema. 17 Tenā ne fai aka ei ne Tavita a te mea telā ne manako malosi a ia ki ei: “Aku muna eiloa ke inu au ki vai mai te vaikeli i tafa o te mataloa o te ‵pui o Peteleema!”+ 18 Tenā ne ‵sala ei ne te tokotolu konā se lotou auala ke olo atu ki te koga e ‵nofo ei te kautau a Filisitia kae asu mai a vai mai te vaikeli i tafa o te mataloa o te ‵pui o Peteleema kae avatu ki a Tavita; kae ne ita a Tavita ma inu ki ei, ‵ligi ei ne ia ki tua i mua o Ieova. 19 Ana muna: “E seki mafaufau eiloa au mai te kilokiloga a toku Atua ke fai te mea tenei! E mata, e ‵tau au o inu ki toto o tāgata konei, kolā ne talia ne latou ke ‵tu olotou ola+ i se tulaga fakamataku? Ne ‵tu olotou ola i se tulaga fakamataku i te aumaiga ne latou a vai konei.” Tenā ne ita ei a ia ma inu ki ei. Konei a mea ne fai ne ana toa ‵mafi e tokotolu.

20 Apisai+ te taina o Ioapo+ ko te takitaki o te suā tokotolu; ne fakaaoga ne ia tena tao ke tamate ki ei a tino e sili atu i te toko 300, kae ne ‵pau eiloa ana mea ne fai mo te tokotolu+ muamua. 21 Mai te suā tokotolu, ne sili atu tena takutakua i lō te suā tokolua, kae ko ia foki ko te lotou takitaki; kae ne seki maua ne ia te tulaga o te tokotolu muamua.

22 A Penaia+ te tama tagata a Ieoiata se tagata loto toa telā ne fai ne ia a mea e uke i Kapaseele.+ Ne tamate ne ia a tama tāgata e tokolua a Alielu mai Moapi, kae ne fanaifo a ia ki lalo i se vaikeli ‵masa o tamate te leona+ i te aso ne ‵to ei te kiona. 23 Ne tamate foki ne ia te matugā tagata lasi mai Aikupito—e lima kupita* te loa.+ E tiga eiloa e isi se tao a te tagata Aikupito i tena lima e pelā mo te fiti o te mea ‵laga laugatu,+ ne fanatu tou tagata mo tena tokotoko kae ‵fao ne ia te tao+ mai lima o te tagata Aikupito kae tamate ne ia tou tagata ki ei. 24 Konei a mea ne fai ne Penaia te tama tagata a Ieoiata, kae e ‵pau eiloa ana mea ne fai mo te tokotolu toa ‵mafi. 25 E tiga eiloa e sili atu tenā takutakua i lō te toko tolusefulu, ne seki maua ne ia te tulaga o te tokotolu+ toa ‵mafi. Kae ne fakasopo aka a ia ne Tavita mo fai se leoleo e tokotasi a ia.

26 A toa ‵mafi o te kautau ko Asaelu+ te taina o Ioapo, Eleana te tama tagata a Toto mai Peteleema,+ 27 Samota te tino Halali, Helesa te tino Pelona, 28 Ila+ te tama tagata a Ikesi te tino Tekoa, Apiese+ te tino Anatota, 29 Sipekai+ te tino Husa, Ilai te tino Ahoi, 30 Malai+ te tino Netopa, Heleta+ te tama tagata a Paana te tino Netopa, 31 Itaia te tama tagata a Lipai o Kipea mai tino Peniamina,+ Penaia te tino Pilatonu, 32 Hulai mai te vanu o Kaasa,+ Apielu te tino Peta-alapa, 33 Asimaveta te tino Paulima, Eliapa te tino Salepono, 34 ko tama tāgata a Hasema te tino Kisoni, Ionatana te tama tagata a Sake te tino Halala, 35 Aiama te tama tagata a Saka te tino Halala, Elifala te tama tagata a Ulo, 36 Hefa te tino Mekala, Aita te tino Pelona, 37 Heselo te tino Kalamelu, Nalai te tama tagata a Esepai, 38 Ioelu te taina o Natano, Mipa te tama tagata a Hakili, 39 Seleka te tino Amoni, Nahalai te tino Pelota, ko te tino ave meatau a Ioapo te tama tagata a Seluia; 40 Ila te tino Itelo, Kalipo te tino Itelo, 41 Ulia+ te tino Heti, Sapata te tama tagata a Alai, 42 Atina te tama tagata a Sisai te tino Leupena, se takitaki o tino Leupena, mo te toko 30 kolā ne olo tasi mo ia; 43 Hananu te tama tagata a Maaka, Iosafata te tino Metini, 44 Usiia te tino Asatalota, Siama mo Ieiela, ko tama tāgata a Hotama te tino Aloela; 45 Ietiaelu te tama tagata a Similai, mo tena taina ko Ioha te tino Tisa; 46 Elielu te tino Mahava, Ielipai mo Iosavia ko tama tāgata a Elenama, mo Itama te tino Moapi; 47 Elielu, Opeta mo Iasieli te tino Mesopa.