Ielemia
14 Konei a pati a Ieova ne oko mai ki a Ielemia e uiga ki te tau la:+
2 A Iuta ko tagi fanoanoa,+ kae ko ana mataloa ko ‵pala.
Ko ‵goto ifo latou ki te laukele mo te fanoa‵noa,
Kae ne vau se tagi mai i Ielusalema.
3 Kae ne uga ne olotou matai a olotou tavini ke aumai a vai.
Ne olo latou ki vaikeli kae seai ne vai ne maua ne latou.
Ne toe ‵foki latou mo olotou tiā ‵masa.
A latou ko ma‵vale kae fanoa‵noa,
Kae e ufi ne latou olotou ulu.
4 Ona ko te laukele ko mafāfā,
Me seai ne vaiua i te fenua,+
E fanoa‵noa a tino fai fatoaga kae ufi olotou ulu.
5 Ke oko foki ki te tia i te vao e tiakina ne ia tena tama ne fatoa fanau
Ona ko te mea ko seai ne mouku.
6 A asini vao e ‵tu i luga i tamā mauga e seai ne lakau i ei.
E mānava latou ki te ea e pelā mo manu ko tiakolo;
A olotou mata e gasolo ifo o vāi‵vai ona ko te seai ne lakau kaina.+
7 E tiga eiloa e molimau omotou mea ‵se ki a matou eiloa,
Ieova, gasuesue aka la mō te ‵lei o tou igoa.+
Me i faifaiga sē fakamaoni a matou ko oko eiloa i te uke,+
Kae ko koe eiloa ne agasala matou ki ei.
8 Te fakamoemoega o Isalaelu, ko tena Fakaola+ i taimi o puapuaga,
Kaia ko fai ei koe pelā me se tino fou i te fenua,
E pelā me se tino faimalaga telā e nofo fua mō se po e tasi?
9 Kaia e fai ei koe pelā me se tagata e ofo malosi,
E pelā me se tagata mafi telā e se mafai o fakasao se tino?
Sa tiakina mai matou.
10 Konei a pati a Ieova ne fai mai e uiga ki tino konei: “E fia‵fia latou o olo valevale;+ ne seki fakatalave eiloa olotou vae.+ Tela la, e se fiafia a Ieova ki a latou.+ Nei la, ka masaua ne ia olotou mea ‵se kae fakasala latou ona ko olotou agasala.”+
11 Tenā ne fai mai ei a Ieova ki a au: “Sa ‵talo ke oko mai ki tino konei a te mea ‵lei.+ 12 Kafai e fakaliki‵liki latou e se fakalogologo au ki olotou fakatagi,+ kae kafai e ofo mai ne latou a taulaga ‵sunu kātoa mo taulaga meakai, e se fiafia au ki mea konā,+ me e auala i te pelu, e auala i te oge, kae e auala i te famai,* ka fakaseai ei ne au latou.”+
13 Ne fai aka au e uiga ki te mea tenei: “Oi aue, e te Aliki Sili ko Ieova! A pelofeta konei e fai atu olotou pati ki a latou, ‘Ka se lavea ne koutou a te pelu, kae ka se oko mai te oge ki a koutou, kae ka tuku atu ne au a te filemu tonu ki a koutou i te koga tenei.’”+
14 Tenā ne fai mai ei a Ieova ki a au: “A pelofeta e fai a valoaga ‵loi i toku igoa.+ E seki uga atu ne au latou io me fakatonu atu latou io me faipati atu ki a latou.+ A mea konā e ‵valo atu ne latou ne fakaasiga ‵loi, ne mea fakataulaitu sē aoga mo mea ‵loi mai i olotou loto.+ 15 Tela la, konei a pati a Ieova ne fai e uiga ki pelofeta kolā e ‵valo atu i toku igoa, faitalia me ne seki uga atu ne au a latou, kae e fai mai me e seai se pelu io me se oge ka poko i te fenua tenei: ‘E auala i te pelu kae e auala i te oge ka fakaseai atu ei a pelofeta konā.+ 16 Kae ko tino kolā e fai olotou valoaga ki ei ka ‵pei ki tua i auala o Ielusalema ona ko te oge mo te pelu, kae ka seai se tino e tanu ne ia latou+—ko latou, olotou avaga fāfine, olotou tama tāgata, io me ko olotou tama fāfine—me ka ‵ligi atu ne au ki luga i a latou a te puapuaga e ‵tau o maua ne latou.’+
17 “E ‵tau mo koe o fai atu a pati konei ki a latou,
‘A oku mata ke ‵fonu eiloa i loimata i te po mo te ao, ke mo a eiloa e gata,+
Me i te tamafine ‵ma o toku fenua ko oti ne tuki palapala kae fatifati,+
Fakatasi mo se pakiaga lasi.
18 Kafai e fanatu au ki te vao kae onoono atu,
E lavea ne au a latou kolā ne tamate i te pelu!+
Kae kafai e vau au ki loto i te fakai,
E lavea ne au a masaki e māfua mai i te oge!+
Me i te pelofeta mo te faitaulaga ko oti ne olo ki se fenua e se iloa ne lāua.’”+
19 E a, ko oti ne ‵teke katoatoa atu koe ki Iuta, io me e a, ko takalialia koe ki Siona?+
Kaia ne ta ei ne koe a matou, ko te mea ke se toe ai se faka‵leiga mō matou?+
E isi se fakamoemoega ke maua te filemu, kae e seai se mea ‵lei ne oko mai,
Ke maua se taimi o te faka‵leiga, kae ne oko mai eiloa te mataku!+
20 Ieova, e iloa ne matou omotou amioga ma‵sei,
Mo mea ‵se a omotou tupuga,
Me i a matou ne agasala ki a koe.+
21 Ona ko tou igoa, sa ‵teke mai matou;+
Ke mo a ma takalialia koe ki tou nofogaaliki ‵malu.
Ke masaua a te feagaiga ne fai ne koe mo matou kae sa ofa ne koe.+
22 E a, e mafai ne tupua sē aoga o atufenua o faka‵to se vaiua,
Io me e a, e mafai ne te lagi o faka‵to ifo ne ia a vaiua i a ia eiloa?
E a, e se ko koe fua tokotasi, e Ieova te motou Atua?+
Kae ko matou e fakamoe‵moe ki a koe,
Me ko koe tokotasi fua ne fai ne koe a mea katoa konei.