Esoto

33 Ne toe fai atu a Ieova ki a Mose: “Olo kea‵tea mo te koga tenei fakatasi mo tino kolā ne ‵taki mai ne koe mai te fenua o Aikupito. Olo atu ki te fenua telā ne tauto au ki a Apelaamo, Isaako mo Iakopo kae fai atu, ‘Ka tuku atu ne au te fenua tenei ki otou tama.*+ 2 Ka uga atu ne au se agelu i mua o koe+ ke afuli kea‵tea ne ia a tino Kanana, tino Amoli, tino Heti, tino Pelise, tino Hivi mo tino Iepuse.+ 3 Olo atu ki te fenua telā e ‵tafe i ei a susu mo hani.+ Kae ka se fanatu au i a koutou, me i a koutou ne tino loto ma‵keke,*+ i te mea ma ‵ta fakapalele ne au koutou i te auala.”+

4 I te taimi ne lagona ei ne tino a pati ‵mafa konei, ne kamata o fanoa‵noa latou, kae seai eiloa se tino i a latou ne pei ki ana teuga fakagali‵gali. 5 Ne fai atu a Ieova ki a Mose: “Fai atu ki tino Isalaelu, ‘A koutou ne tino loto ma‵keke.+ Se mea faigofie fua ke fanatu fakavave au o ‵ta fakapalele koutou.+ Tela la, sa ‵pei ki otou teuga fakagali‵gali kae ke mafaufau aka au me se a taku mea ka fai ki a koutou.’” 6 Tela la, mai te mauga o Holepa o fano ki mua ne seki toe ‵pei eiloa a tino Isalaelu ki olotou teuga fakagali‵gali.

7 Ne puke ne Mose tena faleie kae fakatu i tua o te lotou koga ‵nofo, i se koga tai ‵mao mai i ei, kae ne fakaigoa ne ia ki te faleie o maopoopoga. So se tino e isi sena fesili ki a Ieova+ e ‵tau o fanatu ki te faleie o maopoopoga telā e tu i tua o te lotou koga ‵nofo. 8 I te taimi e fanatu ei a Mose ki te faleie, a tino katoa e ‵tu i mataloa o olotou faleie o ‵kilo atu ki a Mose ke oko ki te taimi e ulu atu ei a ia ki loto i te faleie. 9 I te taimi eiloa e ulu atu ei a Mose ki loto i te faleie, ko te pou kaumana+ eiloa ko fanaifo o tu i te mataloa o te faleie i te taimi e fai‵pati ei a te Atua mo Mose.+ 10 Kafai ko lavea ne tino katoa a te pou kaumana ko tu i te mataloa o te faleie, ko te mea eiloa ko ‵tu a latou katoa ki luga kae ifo ki lalo i mataloa o olotou faleie. 11 Ne faipati atu a Ieova ki a Mose mata ki mata,+ e pelā eiloa mo se tagata e faipati ki te suā tagata. Kafai e foki atu a ia ki te lotou koga ‵nofo, kae ko Iosua+ te tama tagata a Nuno, ko tena tavini mo tena tino fesoasoani+ e nofo eiloa i te faleie.

12 Ne fai atu a Mose ki a Ieova: “Kiloke, e fai mai koe ki a au, ‘‵Taki atu a tino konei ki te fenua tenā,’ kae e seki fakailoa mai eiloa ne koe ki a au a te tino telā ka olo fakatasi mo au. E se gata i ei, ne fai mai koe, ‘E iloa ne au koe i tou igoa* kae e fiafia foki au ki a koe.’ 13 Fakamolemole, kafai e fiafia mai koe ki a au, fakaasi mai la ki a au ou auala,+ ko te mea ke iloa ne au a koe kae ke tumau koe i te fiafia mai ki a au. Ke masaua foki la me i tino i te fenua tenei ko ou tino eiloa.”+ 14 Muna a te Atua: “Ka olo fakatasi eiloa tāua+ kae ka avatu ne au ki a koe se malōlōga.”+ 15 Tenā ne fai atu ei a Mose ki a ia: “Kafai a koe e se fano, sa tuku la ne koe matou ke olo. 16 E iloa pefea ne au me e fiafia mai koe ki a au, ko au mo ou tino? E a, e se ‵tu ‵kese matou mo ou tino+ mai nisi tino i luga i te lalolagi nei māfai e olo fakatasi tatou?”+

17 Ne toe fai atu a Ieova ki a Mose: “Ka fai foki eiloa ne au a tau fakamolemole tenā e fai mai, me i a au e fiafia ki a koe kae e iloa ne au koe i tou igoa.” 18 Kae ne fai atu a Mose: “Fakamolemole fakaasi mai ki a au a tou ‵malu.” 19 Kae ne fai atu a te Atua: “Ka fai ne au ke lavea ne koe ki ou mata a toku aga‵lei, kae ka folafola atu foki ne au i ou mua a te igoa o Ieova;+ kae ka fiafia au ki te tino telā e fiafia au ki ei, kae ka fakaasi atu ne au a te alofa fakamagalo ki te tino telā e fakaasi ne au ki ei te alofa fakamagalo.”+ 20 Kae ne toe fai atu a ia: “E se mafai o lavea ne koe oku mata, me e seai se tino e lavea ne ia au kae tumau i te ola.”

21 Ne toe fai atu a Ieova: “E isi se koga tenei i oku tafa. Tu i luga i te kaupapa tenā. 22 Kafai e fanatu toku ‵malu i ou tafa, ka tuku ne au koe ki loto i se pūga o te kaupapa, kae ka puipui ne au a koe ki toku lima ke oko ki te taimi ko seke ei au kea‵tea mai i a koe. 23 Mai tua i konā, ko tapale ei kea‵tea toku lima kae ka lavea ne koe toku tua. Kae ka se lavea ne koe oku mata.”+