Te Tusi a Ioane

9 I tena sasaleatuga, lavea ei ne Iesu se tagata telā ne fanau mai e ‵kivi. 2 Ne fesili atu ana soko ki a ia: “Te Faiakoga,*+ ko oi ne agasala, ko te tagata tenei io me ko ana mātua, ko ala ei o fanau mai a ia e ‵kivi?” 3 Ne tali atu a Iesu: “E se ko te tagata tenei io me ko ana mātua, kae ne fai penei ko te mea ke fakaasi atu a galuega a te Atua e auala i a ia.+ 4 E ‵tau o fai ne tatou a galuega a te Atua telā ne uga mai ne ia au kae koi ao;+ me kafai ko oko mai te po e seai se tino e mafai o galue. 5 Au ko te mainaga o te lalolagi, i te taimi e nofo ei au i te lalolagi.”+ 6 I te otiga o ana pati konei, ne puaki atu a ia ki te laukele kae palu ne ia mo ana suavale ke liu pela, nani ei ne ia ki mata o te tagata tenā+ 7 kae fai atu ki a ia: “Fano o mulumulu i te vai o Siloama” (telā ne ‵fuli ki te “Uga Atu”). Fano ei tou tagata o mulumulu, kae toe foki mai ko ‵kite ana mata.+

8 Tenā ne fai aka ei ana tuakoi mo tino kolā ne iloa ne latou i a ia se tino akai mea: “E se ko ia tenei ne sagasaga sāle kae akai mea?” 9 Ne fai atu a nisi tino: “Ko ia eiloa tenei.” Kae fai mai a nisi tino: “Ikai, kae e pelā loa mo ia.” Ne fai atu te tagata tenā: “Ko au eiloa te tino tenā.” 10 Ne fai atu latou ki a ia: “Ne ‵kite la pefea ou mata?” 11 Ne tali atu a ia: “A te tagata telā e igoa ki a Iesu ne palu ne ia a te pela kae nini ki oku mata kae fai mai ki a au, ‘Fano ki Siloama o mulumulu i ei.’+ Ne fano au o mulumulu, ‵kite ei oku mata.” 12 Olotou muna ki a ia: “Tefea te tagata tenā?” Ana muna: “E se iloa ne au.”

13 Ne ‵taki atu ne latou te tagata telā ne ‵kivi ki te kau Falesaio. 14 A te aso telā ne palu ei ne Iesu a te pela ke fai ei ke ‵kite a mata o te tino tenā,+ ko te Sapati.+ 15 I konā loa, ne toe fesili atu foki a te kau Falesaio ki a ia me ne ‵kite pefea ana mata. Ana muna ki a latou: “Ne tuku ne ia a pela ki oku mata, mulumulu ne au, ‵kite ei oku mata.” 16 Ne fai atu a nisi Falesaio: “A ia tenei e sē se tagata mai te Atua, me e se tausi ne ia te Sapati.”+ Kae fai atu a nisi tino: “E mafai pefea o fai ne se tagata agasala a vaegā galuega ‵mana penā?”+ Tenā ne vaelua ei latou.+ 17 Ne toe fai atu latou ki te tagata ‵kivi: “Se a tau faka‵tau e uiga ki te tagata telā ne faka‵pula ne ia ou mata?” Muna a te tagata tenā: “A ia se pelofeta.”

18 Kae ne seki tali‵tonu a tino Iutaia i a ia ne ‵kivi muamua kae ko toe ‵kite ana mata, ke oko ki te taimi ne aumai ei ne latou a mātua o te tagata telā ko ‵kite ana mata. 19 Ne fesili atu latou ki a lāua: “Tenei te lua tama ne fai mai koulua me ne fanau mai e ‵kivi? Ne ‵kite pefea ana mata?” 20 Ne tali atu ana mātua: “E iloa ne māua me tenei te mā tama kae ko ia ne fanau mai e ‵kivi. 21 Kae e se iloa ne māua me ko oi ne fai ne ia ke ‵kite ana mata; io me ko oi ne faka‵pula ne ia ana mata. Fesili atu ki a ia. A ia ko matua ‵lei. E ‵tau o faipati a ia mō ia eiloa.” 22 Ne fai atu ne ana mātua a pati konei me ne ma‵taku lāua i tino Iutaia,+ me ko leva ne fakaiku aka ne tino Iutaia, ke fakatea mai te sunako+ so se tino e fakaasi ‵tonu mai ne ia i a Iesu ko te Keliso. 23 Tenei te pogai ne fai atu ei ana mātua: “A ia ko matua. Fesili atu ki a ia.”

24 Ne toe aumai ne latou i te lua o taimi a te tagata telā ne ‵kivi, kae fai atu ki a ia: “‵Viki atu ki te Atua; e iloa ne matou i te tagata tenei se tino agasala.” 25 Ne tali atu a ia: “E se iloa ne au me i te tino tenei se tino agasala io me ikai. E tasi fua te mea e iloa ne au, me i a au ne ‵kivi muamua, kae nei ko ‵kite oku mata. 26 Fai atu ei latou ki a ia: “Ne a ana mea ne fai ki a koe? Ne faka‵pula pefea ne ia ou mata?” 27 Ne tali atu a ia ki a latou: “Ko oti ne fai atu ne au ki a koutou, kae ne seki fia faka‵logo koutou. Kaia e toe ma‵nako ei koutou ke lagona ne koutou? E a, e ma‵nako foki koutou ke fai koutou mo ana soko?” 28 Ona ko te mea tenā, ne fakatauemu ne latou a ia kae fai atu: “A koe se soko o te tagata tenā, kae ko matou ko soko o Mose. 29 E iloa ne matou i te Atua ne faipati ki a Mose, kae e se iloa ne matou te koga ne vau ei te tagata tenā.” 30 Ne tali atu te tagata tenei ki a latou: “E fakaofoofogia eiloa te mea tenei, me e se iloa ne koutou a te koga ne vau ei a ia, kae ne faka‵pula eiloa ne ia oku mata. 31 E iloa ne tatou i te Atua e se fakalogo ki tino agasala,+ kae ko so se tino e mataku ki te Atua kae fai ne ia tena loto, e fakalogo eiloa a ia ki te tino tenā.+ 32 Ne seki lagona aka eiloa ne tatou i aso mua me ne faka‵pula ne se tino a mata o se tagata telā ne fanau mai e ‵kivi. 33 Kafai te tagata tenei e seki vau mai te Atua, e seai eiloa sena mea e mafai o fai.”+ 34 Ne tali atu latou ki a ia: “A koe ne fanau mai i te agasala, kae ko vau koe o akoako matou?” ‵Tuli ei ne latou a ia kea‵tea!+

35 Ne lagona ne Iesu me ko oti ne ‵tuli ne latou a ia, kae i te mauaga ne ia o tou tagata, fai atu ei a ia: “E a, e fakatuanaki koe ki te Tama a te tagata?” 36 Ne tali atu te tagata tenā: “Kae ko oi a ia, e tou ‵malu, ko te mea ke fakatuanaki au ki a ia?” 37 Ne fai atu a Iesu ki a ia: “Ko oti ne lavea ne koe a ia, kae ko te tino telā e faipati atu nei ki a koe ko ia tenā.” 38 Fai atu ei a ia: “Te Aliki, e fakatuanaki au ki a ia.” Kae ne ifo atu tou tagata ki a ia. 39 Ne fai atu a Iesu: “Au ne vau ki te lalolagi tenei ko te mea ke mafai o fakamasinogina te lalolagi, ko tino ‵kivi ke ‵kite+ kae ko tino ‵kite ke ‵kivi.”+ 40 Ne lagona ne nisi Falesaio kolā ne ‵nofo atu i konā a pati konei, kae fai atu ki a ia: “E a, a matou foki ne tino ‵kivi?” 41 Ne fai atu a Iesu ki a latou: “Moi ne ‵kivi koutou penei e seai ne otou agasala. Kae nei la e fai mai koutou, ‘A matou e ‵kite.’ Tela la, e tumau eiloa koutou i te agasala.”+