Iosua

4 I te taimi ko palele atu ei te fenua kātoa ki te suā feitu o te Iolitana, ne fai atu a Ieova ki a Iosua: 2 “Puke ne tāgata e toko 12 mai i tino, e taki tokotasi mai matakāiga takitasi,+ 3 kae fai atu ki a latou a te fakatonuga tenei: ‘Puke ne fatu e 12 mai te kogaloto o te Iolitana, i te koga telā ne ‵tu i ei a vae o faitaulaga,+ kae sau ne koutou o tuku i te koga telā ka ‵nofo koutou i ei ma po nei.’”+

4 Tenā ne kalaga atu ei a Iosua ki tāgata e toko 12 kolā ne filifili aka ne ia mai tino Isalaelu, e taki tokotasi mai matakāiga takitasi, 5 kae ne fai atu a Iosua ki a latou: “Olo i mua o te Pusa a Ieova te otou Atua ki te kogaloto o te Iolitana, kae e ‵tau o sau ne koutou taki tokotasi se fatu ki tena tuauma, e ‵tusa mo te aofaki o matakāiga o tino Isalaelu, 6 ke fai pelā me se fakailoga mō koutou. Kafai e fesili fakamuli mai otou tama‵liki* ki a koutou, ‘Kaia e tuku ei ne koutou a fatu konei i te koga tenei?’+ 7 e ‵tau mo koutou o fai atu ki a latou: ‘Ona ko te taofiga o vai o te Iolitana i mua o te pusa+ o te feagaiga a Ieova. I te taimi ne avatu ei ki te suā feitu o te Iolitana, ne taofi aka ei a vai o te Iolitana. E fai a fatu konei mo fai se fakamasauaga tumau ki tino Isalaelu.’”+

8 Tenā ne fai eiloa ne tino Isalaelu a mea kolā ne fakatonu atu ne Iosua ke fai. Ne puke ne latou a fatu e 12 mai te kogaloto o te Iolitana, e pelā eiloa mo te fakatonuga ne fai ne Ieova ki a Iosua, ke fetaui mo te aofaki o matakāiga o tino Isalaelu. Ne avatu ne latou ki te koga telā ka ‵nofo latou i ei i te po tenā kae tuku i ei.

9 Ne faka‵tu foki ne Iosua i te kogaloto o te Iolitana a fatu e 12 i te koga telā ne ‵tu i ei a vae o faitaulaga kolā ne sau ne latou te pusa o te feagaiga,+ kae koi ‵tu eiloa a fatu i te koga tenā ke oko mai ki te aso nei.

10 Ne ‵tu eiloa a faitaulaga kolā ne sau ne latou te Pusa i te kogaloto o te Iolitana ke oko ki te taimi ne palele faka‵lei ei a mea katoa kolā ne fakatonu atu ne Ieova ki a Iosua ke fai ne tino konā, e ‵tusa eiloa mo mea katoa ne fakatonu atu ne Mose ki a Iosua. I te taimi tenā, ne olo fakavave eiloa a tino ki te suā feitu. 11 I te taimi ko palele atu ei a tino katoa ki te suā feitu, ne olo atu ei a faitaulaga fakatasi mo te Pusa a Ieova ki te suā feitu i mua o tino katoa.+ 12 Kae ko tino Leupena, tino Kato, mo te āfa o te matakāiga o Manase ne olo atu ki te suā feitu e pelā me se kautau+ i mua o nisi tino Isalaelu, e pelā eiloa mo te fakatonuga a Mose ki a latou.+ 13 Kāti e toko 40,000 sotia kolā ko toka ki se taua ne olo atu ki te suā feitu i mua o Ieova ki koga laugatasi o Ieliko.

14 I te aso tenā ne faka‵malu ne Ieova a Iosua i mua o tino Isalaelu katoa,+ kae ne āva* malosi latou ki a ia i aso katoa o tena olaga e pelā eiloa mo te lotou āva malosi ki a Mose.+

15 Tenā ne fai atu ei a Ieova ki a Iosua: 16 “Fakatonu atu ki faitaulaga kolā e sau ne latou te pusa+ o te Feagaiga ke olo aka ki luga mai i te Iolitana.” 17 Tenā ne fakatonu atu ei a Iosua ki faitaulaga konā: “Olo aka ki luga mai i te Iolitana.” 18 I te taimi ne olo aka ei a faitaulaga kolā ne sau ne latou a te pusa+ o te feagaiga a Ieova ki luga mai te kogaloto o te Iolitana kae ‵laka atu a alofivae o faitaulaga konā ki te laukele malō, ne toe ‵tafe ei a vai o te Iolitana kae lofia+ foki ei ana kaugutu e pelā eiloa mo te taimi muamua.

19 Ne olo aka a tino mai te Iolitana i te po sefulu o te masina muamua kae ‵nofo atu i Kilikala+ i te tuakoi o Ieliko ki saegala.

20 Kae pelā mo fatu e 12 kolā ne puke mai ne latou mai te Iolitana, ne faka‵tu aka ne Iosua a fatu konā i Kilikala.+ 21 Kae ne fai atu a ia ki tino Isalaelu: “I aso mai mua, kafai e fesili atu otou tama‵liki ki olotou tamana, ‘Se a te uiga o fatu konei?’+ 22 e ‵tau mo koutou o fakamatala atu ki otou tama‵liki: ‘Ne olo atu a tino Isalaelu ki te suā feitu o te Iolitana i luga i te laukele malō+ 23 i te taimi ne faka‵masa ei ne Ieova te otou Atua a vai o te Iolitana i mua o latou ke oko ki te taimi ko palele ei latou ki te suā feitu, e pelā eiloa mo mea ne fai ne Ieova te otou Atua ki te Tai Kula i te taimi ne faka‵masa ei ne ia i mua o tatou ke oko ki te taimi ko palele ei tatou ki te suā feitu.+ 24 Ne fai ne ia te mea tenei ko te mea ke iloa ne tino katoa o te lalolagi a te malosi o te lima+ o Ieova ko te mea ke ma‵taku faeloa koutou ki a Ieova te otou Atua.’”