Te Muamua Nofoaiga Tupu

17 I te taimi eiloa ne nofo ei a Tavita i tena fale,* ne fai atu a ia ki a Natano+ te pelofeta: “Au tenei e nofo i te fale e faite ki lakau ko alasi+ kae ko te pusa o te feagaiga a Ieova e tuku i loto i te faleie.”+ 2 Ne tali atu a Natano ki a Tavita: “Fai so se mea e loto koe ki ei, me i te Atua tonu e fakatasi atu eiloa ki a koe.”

3 I te po eiloa tenā, ne oko mai te fekau a te Atua ki a Natano, ana muna: 4 “Fano o fai ki taku tavini ko Tavita, ‘Konei a pati a Ieova ne fai mai: “E se ko koe te tino ka faite ne ia te fale mo oku nofo.+ 5 I a au ne seki nofo eiloa i se fale mai te aso ne aumai ei ne au a tino Isalaelu kea‵tea ke oko mai ki te aso nei, kae ne fano faeloa au mai te faleie e tasi ki te suā faleie kae mai te faleie tapu e tasi ki te suā faleie tapu.+ 6 I taimi katoa ne olo ei au mo Isalaelu kātoa, e a, kai fai atu aka loa ne au se pati ki se famasino o Isalaelu telā ne ‵tofi aka ne au ke tausi oku tino, penei, ‘Kaia ne seki faite ei ne koutou se fale mō oku ki lakau ko alasi?’”’

7 “Nei la, fai atu a pati konei ki taku tavini ko Tavita, ‘Konei a pati a Ieova o kautau ne fai mai: “Ne puke ne au koe mai laukele moukuā, mai te tautali atu i tua o te lafu mamoe, ke fai koe mo takitaki o oku tino Isalaelu.+ 8 Kae ka fakatasi atu faeloa au ki a koe i so se koga e fano koe ki ei,+ kae ka fakaseai ne au ou fili katoa i ou mua;+ kae ka fai ne au ke takutakua tou igoa e pelā mo igoa o tāgata takutakua i te lalolagi.+ 9 Ka fili ne au se koga mō oku tino Isalaelu ke ‵nofo i ei, ka ‵nofo latou i ei kae e se toe ai se mea e fakalavelave atu ki a latou; kae ka se toe fakasaua foki latou* ne tino amio ma‵sei e pelā mo mea ne fai sāle ne latou i aso mua,+ 10 mai te aso ne faka‵sopo aka ei ne au a famasino ke pule i oku tino Isalaelu.+ Kae ka fakatakavale ne au otou fili+ katoa. E se gata i ei, au e fai atu ki a koe, ‘Ka faite ne Ieova se fale* mō koe.’

11 “‘“Kafai ko oti atu ou aso kae fano koe o fakatasi mo ou tupuga, ka fakatu aka ne au tau tama* i ou tua, se tokotasi o au tama tāgata,+ kae ka faka‵mautakitaki ne au tena pulega fakatupu.+ 12 Ko ia tenā ka faite ne ia se fale mō oku,+ kae ka faka‵mautakitaki ne au tena nofogaaliki ki te se-gata-mai.+ 13 Ka fai au mo fai tena tamana, kae ka fai a ia mo fai taku tama.+ Ka se ave kea‵tea ne au toku alofa fakamaoni mai i a ia+ e pelā mo te avega kea‵tea ne au mai te tino mai mua atu i a koe.+ 14 Ka fai ne au a ia ke tu i loto i toku fale mo taku pulega fakatupu ki te se-gata-mai,+ kae ko tena nofogaaliki ka tumau eiloa ki te se-gata-mai.”’”+

15 Ne fai atu ne Natano ki a Tavita a pati katoa konei mo te fakaasiga kātoa tenei.

16 I konā loa, ne ulu mai te Tupu ko Tavita, sagasaga ki lalo i mua o Ieova kae fai atu: “Ko oi au, e Ieova te Atua? Kae ko oi foki toku kāiga ke fai ne koe a mea katoa konei ki a au?+ 17 E pelā eiloa me e se lava a mea konei, e te Atua, ne faipati mai foki koe e uiga ki te kāiga o tau tavini ke oko ki aso mai mua,+ kae ne kilo mai koe ki a au e pelā me se tagata telā e ‵tau o fakamaluga aka, e Ieova te Atua. 18 Ne a foki la a nisi pati ka fai atu ne tau tavini ko Tavita ki a koe e uiga ki te ‵malu ne tuku mai ki a au me e iloa faka‵lei ne koe tau tavini?+  19 Ieova, ona ko tau tavini mo te mea e loto koe ki ei ne fai ei ne koe a mea fakaofoofogia katoa konei kae fakaasi mai i ei i a koe e sili.+ 20 Ieova, e seai se tino e ‵pau mo koe,+ kae e seai foki se Atua i ou tafa;+ a mea katoa ko oti ne lagona ne matou ki omotou taliga e fakamaoni mai ei a te ‵tonu o te mea tenei.  21 Se a te fenua i te lalolagi nei e ‵pau mo ou tino Isalaelu?+ Ne fanatu te Atua tonu kae faka‵sao ne ia latou e pelā me ne ana tino.+ Ne fai ne koe tou igoa ke takutakua mai te faiga o mea sili kae fakaofoofogia,+ kae afuli kea‵tea ne koe a atufenua i mua o ou tino+ kolā ne faka‵sao ne koe mai Aikupito. 22 Ne fai ne koe ou tino Isalaelu ke fai mo ou tino tonu i taimi katoa;+ kae ko koe, e Ieova ne fai mo fai te lotou Atua.+ 23 Nei la e Ieova, ke fakataunu eiloa ne koe te tautoga ne fai ne koe e uiga ki tau tavini mo tena kāiga i taimi katoa, kae ke fai eiloa ne koe a te mea ko oti ne tauto koe ki ei.+ 24 Ke tumau eiloa tou igoa kae ke fakamaluga+ aka ki te se-gata-mai, ko te mea ke fai aka a tino, ‘A Ieova o kautau ko te Atua o Isalaelu,’ kae ke faka‵mautakitaki eiloa ne koe te kāiga o tau tavini ko Tavita i ou mua.+ 25 Me ko oti ne fakaasi mai ne koe e toku Atua ki tau tavini a te pogai ka faite ei ne koe se fale mō ia. Tenā te pogai e loto talitonu ei tau tavini o fai atu a te ‵talo tenei ki a koe. 26 Kae nei la, e Ieova, a koe ko te Atua tonu, kae ko oti ne folafola ne koe a mea ‵lei konei e uiga ki tau tavini. 27 Tela la, ke fiafia eiloa koe o fakamanuia te kāiga o tau tavini, kae ke tumau faeloa ki te se-gata-mai i ou mua, me ko oti ne fakamanuia ne koe e Ieova, kae ka manuia faeloa ki te se-gata-mai.”