Te Tusi Muamua ki te Kau i Tesalonia
5 E uiga ki taimi mo tau o aso e se manakogina ke tusi atu ki a koutou, e oku taina. 2 Me e iloa ‵lei ne koutou i te aso o Ieova*+ e oko mai e pelā me se tino kaisoa i te po.+ 3 Ko te taimi eiloa e fai mai ei latou: “Ko filemu kae tokagamalie a mea katoa!” ko te mea eiloa ko oko fakapoi atu te fakaseaiga ki luga i a latou+ e pelā eiloa mo te ‵mae o se fafine ka fai o fanau, kae ka se ‵sao eiloa latou. 4 Kae ko koutou, e oku taina, e se ‵nofo koutou i te pouliga ko te mea ke ‵poa aka koutou i te aso tenā e pelā me ne tino kai‵soa, 5 me i a koutou ko fanau katoa o te mainaga mo te ao.+ A tatou e se ne tino o te po io me ko te pouliga.+
6 Tela la, ke mo a tatou ma ‵moe e pelā eiloa mo nisi tino,+ kae ke ala faeloa tatou+ kae tausi ‵tou mafaufau ke ‵lei.+ 7 Me i tino kolā e ‵moe e ‵moe i te po, kae ko latou kolā e ko‵nā e ko‵nā i te po.+ 8 Kae ko tatou kolā ne tino o te ao, ke tausi faka‵lei ‵tou mafaufau kae ‵pei ki te ufi fatafata o te fakatuanaki mo te alofa mo te fakamoemoega o te fakaolataga e pelā me se puloutau.+ 9 Me ne ‵tofi tatou ne te Atua, e se mō tena kaitaua, kae mō te mauaga o te fakaolataga+ e auala i te ‵tou Aliki ko Iesu Keliso. 10 Ne mate a ia mō tatou,+ ko te mea ke ola fakatasi tatou mo ia faitalia me e ala io me e ‵moe* tatou.+ 11 Tela la, tumau i te fakamalosi* atu te suā tino ki te suā tino,+ e pelā eiloa mo te mea e fai nei ne koutou.
12 Nei la, ko fakatagi atu matou ki a koutou, e oku taina, ke fakaasi atu te āva ki a latou kolā e ga‵lue malosi mō koutou kae tausi atu ki a koutou i te Aliki kae e fakamalosi atu ki a koutou; 13 kae ke tuku atu te āva lasi i te alofa ki a latou ona ko olotou galuega.+ Ke tausi te filemu i te va o te suā tino ki te suā tino.+ 14 I te suā feitu, e fakamalosi atu matou ki a koutou, e oku taina, ke polopoloki* atu a tino fakalogoga‵ta,+ fakamafanafana atu ki tino loto mafatia,* ‵lago atu ki tino vāi‵vai, kae kufaki i tino katoa.+ 15 Onoono ke mo a ma taui atu ne se tino te masei ki te masei,+ kae ke kausaki faeloa o fai te mea ‵lei te suā tino ki te suā tino e pelā foki ki tino katoa.+
16 Ke fia‵fia faeloa.+ 17 ‵Talo i taimi katoa.+ 18 Fakafetai atu mō mea katoa.+ Tenei te loto o te Atua mō koutou i a Keliso Iesu. 19 Ke mo a ma tamate te afi o te agaga.+ 20 Ke mo a ma manatu māmā ki valoaga.+ 21 Ke tofotofo aka a mea katoa;+ puke ‵mau ki mea ‵lei. 22 ‵Kalo kea‵tea mai i vaega katoa o amioga ma‵sei.+
23 Ke na fakatapu katoatoa koutou ne te Atua o te filemu. Kae fai otou agaga mo otou ola mo otou foitino ke ‵lei i feitu katoa, e oku taina, tausi ke mo a ma isi se pona i a koutou i te taimi e fakatasi mai i ei te ‵tou Aliki ko Iesu Keliso.+ 24 A te tino telā e kalaga atu ki a koutou e fakamaoni, kae ka fakataunu eiloa ne ia te mea tenā.
25 Oku taina, ‵talo faeloa mō matou.+
26 Fakatalofa atu ki taina katoa i te sogi tapu.
27 E fakamalosi atu au ki a koutou i te igoa o te Aliki ke faitau atu te tusi tenei ki taina katoa.+
28 Ke i luga i a koutou a te alofa tauanoa o te ‵tou Aliki ko Iesu Keliso.