Te Tusi a Luka

3 I te 15 tausaga o te pulega a Tipelio Kaisala, i te taimi ne fai ei a Ponitio Pilato mo kovana o Iuta, a Helota*+ ko te pule o Kalilaia kae ko Filipo tena taina ko te pule o Itulea mo Telekoniti, kae ko Lusanio ko te pule o Apilene, 2 i aso o faitaulaga pule ko Anasa mo Kaiafa,+ ne faipati atu ei te Atua ki a Ioane+ te tama tagata a Sakalia i te koga lavaki.+

3 Tenā ne fanatu ei a ia ki fenua katoa i tafa o te Iolitana, o talai atu te papatisoga e pelā me se fakailoga o te salamō mō te fakamagaloga o agasala,+ 4 e pelā eiloa mo muna ne tusi i te tusi a te pelofeta ko Isaia: “E isi se leo e kalaga i te koga lavaki: ‘Fakatoka te auala o Ieova!* Fai ke ‵tonu ana auala.+ 5 A vanu katoa ka tanu, a mauga ‵lasi mo mauga fo‵liki katoa ka fakalaugatasi, kae ko auala piko‵piko e ‵tau o faka‵tonu, kae ko auala pona‵pona ka fakamaniania katoa; 6 kae ka lavea ne tino katoa a te fakaolataga a te Atua.’”*+

7 Tenā ne fai atu ei tou tagata ki te vaitino kolā ne olo atu ke papatiso latou ne ia: “A koutou ko tama a gata ‵poisini, ko oi ne fai atu ke ‵tele koutou kea‵tea mai te fakasalaga fakamataku telā ka oko mai?+ 8 Tela la, fakaasi mai ne faiga ke iloa ei i a koutou ko sala‵mo. Sa fai ifo eiloa ki a koutou penei, ‘A te motou tamana ko Apelaamo.’ Me e fai atu au ki a koutou me e mafai ne te Atua o faka‵tu aka ne tama‵liki ma Apelaamo mai i fatu konei. 9 E tonu, ko leva ne takato te takū i tafito o lakau. Tela la, a lakau katoa kolā e se ‵fua mai i ei a fuaga ‵lei ka ‵kati ki lalo kae ‵pei ki te afi.”+

10 Kae ne fesili atu te vaitino ki a ia: “Ne a la mea e ‵tau o fai ne matou?” 11 Ne tali atu a ia ki a latou: “Ko te tino telā e lua ana gatu ke tuku atu te suā gatu ki te tino telā e seai sena gatu, kae ke fai foki penā a te tino telā e isi ne ana meakai.”+ 12 Kae ne olo atu foki a tino ‵tae lafoga ke papatiso latou,+ kae fai atu ki a ia: “Te faiakoga, ne a mea e ‵tau o fai ne matou?” 13 Ne fai atu a ia ki a latou: “Ke se fakasilia* ne koutou te aofaki o te lafoga telā e ‵tau o ‵togi atu.”+ 14 Ne fesili atu foki a sotia ki a ia: “Ne a mea e ‵tau o fai ne matou?” Ne fai atu a ia ki a latou: “Sa fakapuapuaga* ne koutou so se tino io me ‵losi ‵se atu ki so se tino,+ kae ke lotoma‵lie ki mea ko maua ne koutou.”*

15 Ne ‵nofo fakatali‵tali eiloa a tino i aso konā ki te Keliso kae ne fai aka latou katoa i olotou loto e uiga ki a Ioane, “E mata, ko ia tenei te Keliso?”+ 16 Ne fai atu ne Ioane te tali, i ana pati ki a latou katoa: “E papatiso ne au koutou ki te vai, kae ko te tino telā e malosi atu i a au ka vau, e se ‵tau mo au o ‵tala a fusi o ana taka.+ Ka papatiso ne ia koutou ki te agaga tapu mo te afi.+ 17 Ko puke nei tena sevolo i tena lima ke faka‵ma pakipaki ne ia te fola e faka‵ma ei a saito, kae ka fakaputu ne ia a saito ki loto i tena fale saito kae ‵sunu ne ia a kaiga ki te afi telā e se mafai o mate.”

18 Ne tuku atu foki ne ia a nisi fakamalosiga e uke kae tumau i te folafola atu a te tala ‵lei ki tino. 19 Kae ona ko te mea ne polopoloki ne Ioane a Helota te pule o te kogā koga tenā, e uiga ki a Helotia te avaga a tena taina, mo amioga ma‵sei katoa a Helota ne fai, 20 ne toe fakaopoopo atu ne Helota te mea tenei ki ana faifaiga ma‵sei katoa konā: Ne ‵loka ne ia a Ioane i te falepuipui.+

21 I te otiga ne papatiso a tino katoa, ne papatiso foki a Iesu.+ Kae koi ‵talo a ia kae matala te lagi,+ 22 mo te agaga tapu ko fanaifo ki luga i a ia, e foliga mai e pelā me se lupe, kae ne lagona atu se leo mai te lagi e fai mai penei: “A koe ko taku Tama, ko taku fagasele; ko oti ne talia ne au a koe.”+

23 I te taimi ne kamata ei ne Iesu+ a tena galuega, kāti ko 30 ana tausaga,+ kae ne ma‵natu aka a tino i a ia ko te tama tagata