Esela
1 I te tausaga muamua o te tupu o Pelesia ko Kulesa,+ ne fakamalosi aka ne Ieova a te loto* o te tupu o Pelesia ko Kulesa ke fai se faka‵pulaga i tena malo kātoa, ko te mea ke fakataunu ei a pati a Ieova ne fai e auala i a Ielemia+ kae ne tusi foki ne ia ki lalo,+ ana muna:
2 “Konei a pati a te tupu o Pelesia ko Kulesa ne fai mai, ‘A Ieova te Atua o te lagi ne tuku mai ne ia ki a au a malo katoa o te lalolagi,+ kae ne fakatonu ne ia au ke faite se fale mō ia i Ielusalema,+ i Iuta. 3 So se tino i a koutou e aofia i ana tino, ke fakatasi atu tena Atua ki a ia, kae ke fano a ia ki Ielusalema, i Iuta, o toe faite te fale o Ieova te Atua o Isalaelu—a ia ko te Atua tonu—telā e tu tena fale i Ielusalema.* 4 So se tino fakaa‵tea+ telā e nofo i so se koga, ke fesoasoani atu ana tuakoi* ki a ia mai te tuku atu ne latou ki a ia a siliva mo aulo, koloa mo lafu manu, fakatasi mo mea kolā e tuku atu mo te lotomalie ki te fale o te Atua tonu,+ telā ne tu i Ielusalema.’”
5 Tenā ne fakatoka ei a ulu o kāiga o Iuta mo Peniamina mo faitaulaga mo tino Levi—ko tino katoa kolā ne fakamalosi aka olotou loto ne te Atua tonu—ke faima‵laga atu o toe faite a te fale o Ieova, telā ne tu i Ielusalema. 6 A tino katoa i olotou tafa ne ‵lago atu ki a latou mai te tukuatuga ki a latou a mea e faite ki siliva mo aulo, koloa, lafu manu mo mea tāua, i tafa o mea katoa kolā ne tuku atu mo te lotomalie.
7 Ne aumai foki ne te Tupu ko Kulesa a meāfale mai te fale o Ieova kolā ne puke ne Nepukanesa mai Ielusalema kae tuku atu ki loto i te fale o tena atua.+ 8 Ne aumai ne te tupu o Pelesia ko Kulesa a mea konā ki tua mai lalo i te takitakiga a Meteleta te ‵teutupe, telā ne lau aka ne ia a mea konā mō Sesepasa*+ te takitaki o Iuta.
9 Tenei te aofaki o te lauga o mea konā: e 30 pōla aulo e foliga pelā me ne ato, e 1,000 pōla siliva e foliga pelā me ne ato, e 29 nisi pōla, 10 e 30 tamā pōla aulo, e 410 tamā pōla siliva, e 1,000 a nisi meāfale. 11 A meāfale aulo katoa mo siliva e 5,400. Ne aumai ne Sesepasa a mea katoa konei i te taimi ne o‵mai ei ki tua a tino kolā ne ‵nofo fakapagota+ i Papelonia o olo ki Ielusalema.