Te Tusi Muamua ki te Kau i Tesalonia

4 A te ‵toe mea, e oku taina, e pelā eiloa mo te fakatonuga ne maua ne koutou mai i a matou e uiga ki te auala e ‵tau o sa‵sale koutou i ei ko te mea ke fakafiafia atu ki te Atua,+ telā e sa‵sale i ei koutou nei, e fakatagi kae fakamolemole atu matou e auala i te Aliki ko Iesu ke tumau koutou i te fai faeloa o mea konā. 2 Me iloa ne koutou a fakatonuga kolā ne tuku atu ne matou ki a koutou e auala i te Aliki ko Iesu.

3 Me tenei eiloa te loto o te Atua, ko koutou ke tapu+ kae ke ‵kalo kea‵tea mai i amioga fakatauavaga sē ‵tau.*+ 4 E ‵tau o iloa ne tino taki tokotasi i a koutou o pule atu ki tena foitino+ ko te mea ke tapu+ kae fakaaloalogina, 5 e se i te kaimanako, te fina ki manakoga fakatauavaga sē pulea+ e pelā mo tino o fenua kolā e se iloa ne latou te Atua.+ 6 E seai se tino e ‵tau o silia atu i te tapula kae fakamasei ne ia tena taina i te mea tenei, me ko Ieova* eiloa e fai ne ia a fakasalaga ‵tau ki mea katoa konei, e pelā eiloa mo omotou pati ne fai atu muamua ki a koutou kae fakailoa faka‵lei atu foki ki a koutou. 7 Me ne kalagagina tatou ne te Atua, e se mō amioga lai‵lai, kae mō te tulaga tapu.+ 8 Tela la, a te tino telā e manatu māmā ki te mea tenei, e se manatu māmā a ia ki se tagata, kae ki te Atua+ telā ne tuku atu ne ia tena agaga tapu ki a koutou.+

9 Kae e se ‵tau o tusi atu matou ki a koutou e uiga ki te alofa fakataina,+ me e akoako eiloa koutou ne te Atua ke alofa te suā tino ki te suā tino.+ 10 E tonu, tenā eiloa te mea e fai ne koutou ki taina katoa i Maketonia. Kae e fakamalosi atu matou, e oku taina, ke momea aka te fai ne koutou a te mea tenā. 11 Ke taumafai malosi koutou o ola i te filemu+ kae ke mo a ma ‵saga koutou ki mea kolā e seai se otou fekau i ei+ kae ke ga‵lue malosi,+ e pelā eiloa mo te motou fakatonuga ki a koutou, 12 ko te mea ke sa‵sale faka‵lei koutou i te kilokiloga a tino i tua+ e aunoa mo te manavase ki so se mea.

13 E se gata i ei, e oku taina, e se ma‵nako matou ke se iloa ne koutou a mea e uiga ki a latou kolā ko ‵moe i te mate,+ ko te mea ke se fanoa‵noa koutou e pelā mo tino kolā e seai se lotou fakamoemoega.+ 14 Kafai e fakatuanaki tatou i a Iesu ne mate kae toetu aka,+ ka faka‵tu aka foki ne te Atua fakatasi mo ia a latou kolā ko oti ne ‵moe i te mate e auala i a Iesu.+ 15 Me tenei eiloa te mea e fai atu ne matou ki a koutou e auala i te muna a Ieova,* me i a tatou kolā e ola i te taimi e fakatasi mai ei a te Aliki ka se ‵mua atu i a latou kolā ko oti ne ‵moe i te mate; 16 me ka fanaifo te Aliki mai te lagi kae kalaga o fakatonu mai, i te leo o te agelu pule+ mo te pu a te Atua, kae ko latou kolā ko ‵mate i te ‵kau fakatasi mo Keliso ka toe‵tu muamua mai.+ 17 Fakamuli ifo, a te ‵toega o tatou kolā koi ola, ka avaka fakatasi mo latou i kaumana+ ke fetaui mo te Aliki+ i te ea; tenā ko ‵nofo faeloa i ei tatou fakatasi mo te Aliki.+ 18 Tela la, ke tumau i te fakamafanafana atu te suā tino ki te suā tino ki pati konei.