Iona

4 Kae ko te mea tenei ne fai ei ke fanoanoa malosi a Iona, kae ne kaitaua malosi eiloa a ia. 2 Ne ‵talo atu a ia ki a Ieova: “Aa, nei la, e Ieova, e a, e se tenei eiloa te mea ne manavase au ki ei kae koi nofo atu au i toku fenua? Tenā te pogai ne taumafai ei au o tele ki Talasisi+ i te taimi muamua; me e iloa ne au i a koe se Atua alofa atafai kae alofa fakamagalo, e tuai o ita kae ‵fonu i te alofa fakamaoni,+ kae toka o ‵fuli tena mafaufau kae e se fakasala a tino. 3 Nei la, e Ieova, fakamolemole ave kea‵tea toku ola, me e ‵lei atu ke na mate au i lō te tumau i te ola.”+

4 Ne fesili atu a Ieova: “E mata, se mea ‵lei ke kaitaua malosi koe?”

5 Tenā ne fano ei a Iona ki tua mo te fakai kae sagasaga ki lalo i te feitu ki saegala o te fakai. Ne faite ne ia sena fakamalumalu i konā kae sagasaga i lalo o tena malūga o onoono ki te mea ka tupu ki te fakai.+ 6 Tenā ne fai ei ne Ieova te Atua a te lakau ko te kikaiona* ke ola mai luga o Iona, ke fakamalu ei tena ulu kae faka‵noga ei tena fanoanoa lasi. Kae ko Iona ne fiafia malosi ki te lakau ko te kikaiona.

7 Kae ko te Atua tonu ne uga mai ne ia se anufe i te vaveao ‵malu o te suā aso, kae ne kai ne ia te lakau ko te kikaiona, kae ne magemage i ei. 8 I te taimi ne kamata ei o ‵kasa te la, ne toe uga mai ne te Atua se matagi ‵vela mai i te feitu ki saegala, kae ne ‵kasa malosi te la ki luga i te ulu o Iona, kae ne tai matapo a ia. Ne tumau a ia i te fakamolemole atu ke na mate a ia, kae ne fai atu faeloa, “E ‵lei atu ke na mate au i lō te tumau i te ola.”+

9 Ne fesili atu te Atua ki a Iona: “E mata, se mea ‵lei ke kaitaua malosi koe ona ko te lakau ko te kikaiona?”+

Tenā ne fai atu ei a ia: “E isi soku saolotoga ke kaitaua, ke kaitaua malosi au telā ko manako ei au ke mate.” 10 Kae ne fai atu a Ieova: “A koe ne fanoanoa ona ko te lakau ko te kikaiona, telā ne seki galue koe ki ei, io me ne fai ne koe ke ola aka; ne ola aka i te po e tasi kae galo atu i te suā po. 11 E mata, e se ‵tau foki mo au o alofa ki Nineva te fakai lasi,+ telā e silia atu mo te toko 120,000 tāgata i ei kolā e se iloa ne latou te mea tonu mai te mea ‵se,* e pelā foki mo olotou manu e uke?”+