Isaia
46 A Pele ko totuli ifo,+ a Nepo ko punou ifo.
Ko tuku atu a lā tupua ki tua o manu, ko manu fai galuega ‵mafa,+
E pelā me ne kope e faka‵mafa atu ki manu ko vāi‵vai.
2 E pu‵nou kae to‵tuli ifo fakatasi lāua;
E se mafai o faka‵sao ne lāua a amoga,*
Kae ko lāua ko ave fakapagota.
3 “Faka‵logo mai ki a au, e te kāiga o Iakopo, mo koutou katoa kolā e ‵toe mai i te kāiga o Isalaelu,+
Ko koutou kolā ne ‵lago au ki ei mai te fa‵naumaiga kae tauave i te moegatama.+
4 Ke oko ki te taimi ko matua ei koe ka tumau eiloa au;+
Ke oko ki te taimi e sinā ei tou ulu ka tauave faeloa ne au koe.
E pelā mo te mea ko oti ne fai ne au, ka sau ne au koe kae tauave koe kae fakasao koe.+
5 Ko oi te tino ka fakatusa ne koe au ki ei io me faka‵pau mo au io me fakatusatusa au ki ei,+
Ko te mea ke tai ‵pau māua?+
6 E isi ne tino e fakaaoga valevale a aulo mai i olotou taga tupe;
E fua ne latou a siliva i te fua fakatautau.
E ‵togi ne latou se tino faite mea ki fiti, kae faite ne ia mai i ei se atua.+
Tenā ko to‵tuli ifo ei latou, ao, e tapuaki latou ki ei.*+
7 E amo aka ne latou ki luga i olotou tuauma;+
E sau aka ne latou kae tuku atu ki tena tulaga, ko tu fua ei i konā.
E se gasue eiloa mai tena tulaga tenā.+
E ‵tagi atu latou ki ei, kae e se tali mai;
E se mafai o fakasao ne ia se tino mai i puapuaga.+
8 Ke masaua te mea tenei, kae ke loto ‵toa.
Faka‵goto ifo ki otou loto, koutou e tino solitulafono.
9 Ke masaua a mea mua i aso ko ‵teka,
Me i a au ko te Atua, kae seai aka foki se isi atua.
Au ko te Atua, kae e seai se atua e ‵pau mo au.+
10 Ne ‵valo ne au te mea ka tupu mai te kamataga,
Mo mea kolā e seki fai ne au mai i aso mua eiloa.+
11 E kalaga atu au ki se manu eva fekai mai te feitu ki saegala,*+
Mai i se fenua ‵mao ko te tagata e tauave ne ia taku fakaikuga.*+
Ko oti au ne faipati, kae ka fakataunu eiloa ne au.
Ko oti ne fuafua ne au, kae ka fakataunu foki eiloa ne au.+
12 Faka‵logo mai ki a au, koutou kolā e loto ma‵keke,
Koutou kolā e ‵mao mai te amiotonu.
Ka tuku atu ne au te fakaolataga ki Siona, ko toku gali ki Isalaelu.”+