Te Tusi a Maleko
8 I aso konā, ne toe mumu atu se vaitino kae seai ne olotou meakai. Tenā ne kalaga atu ei a Iesu ki ana soko kae fai atu ki a latou: 2 “Ko oko eiloa i toku alofa i te vaitino,+ me ko tolu nei aso ne ‵nofo ei au mo latou kae e seai eiloa ne olotou mea ne kai.+ 3 Kafai e uga ne au latou ki olotou fale mo te fia‵kai,* e mafai o mata‵po latou i te auala kae ko nisi o latou ne o‵mai i koga ‵mao.” 4 Ne tali atu ana soko ki a ia: “Tefea te koga e maua ei ne se tino a falaoa e lava i te koga ‵mao tenei ke fagai ki ei a tino konei ke ma‵kona?” 5 Ne fesili atu a ia ki a latou: “E fia otou falaoa? Olotou muna: “E fitu.”+ 6 Ne fakatonu atu a ia ke saga‵saga te vaitino ki lalo. Tenā ne puke ei ne ia a falaoa e fitu, fai te fakafetai, tofitofi, kae kamata o tuku atu ki ana soko ke tufa atu, kae ne tufa ne latou ki te vaitino.+ 7 Ne isi foki ne olotou tamā ika; kae i te otiga o te fakafetai, ne fai atu foki a ia ke tufa atu ne latou. 8 Ne ‵kai katoa latou kae ma‵kona, kae ko meakai kolā ne ‵toe ne faka‵fonu ki ei a tapola ‵lasi e fitu.+ 9 Kāti e nofo pelā ki se toko 4,000 tāgata i konā. Oti aka loa, uga ei ne ia latou ke olo.
10 Ne sopo fakavave a ia ki te pōti fakatasi mo ana soko kae olo atu ki se kogā koga i Talamanuta.+ 11 Ne olo atu a Falesaio kae kamata o kinau mo ia i konā, me ne ma‵nako latou ke fakaasi atu ne ia se fakailoga mai te lagi, ke tofotofo aka ei a ia.+ 12 Ne ‵pusi tena mānava i te lasi o tena fanoanoa, kae fai atu: “Kaia e ‵sala ei te kautama tenei ki se fakailoga?+ Au e fai ‵tonu atu ki a koutou, ka seai eiloa se fakailoga e tuku atu ki te kautama tenei.”+ 13 Oti aka, tiakina ei ne ia latou, toe sopo ki te pōti, kae fanatu ki te suā feitu.
14 Ne puli i a latou ke ave ne falaoa kae na ko te falaoa fua e tasi kae e seai aka foki se isi mea i te pōti.+ 15 Kae ne fakailoa faka‵lei atu a ia ki a latou: “Ke matapula‵pula koutou; kae fakaeteete i te mea faka‵fete a te kau Falesaio mo te mea faka‵fete a Helota.”+ 16 Tenā ne kamata ei o fakatau kinau latou ona ko te mea e seai ne olotou falaoa. 17 Ne iloa ne Iesu a te mea tenei, fai atu ei ki a latou: “Kaia e kinau ei koutou ona ko te mea e seai ne falaoa? E a, e seki malamalama loa koutou? E a, koi sē malamalama eiloa koutou i otou loto? 18 ‘E tiga eiloa e isi ne otou mata, e a, e se lavea ne koutou, e tiga eiloa e isi ne otou taliga, e a, e se lagona ne koutou?’ E a, e se masaua ne koutou 19 i te tofitofiga ne au o falaoa e lima+ mō te toko 5,000 tāgata, e fia tapola ne faka‵fonu ne koutou ki toegā meakai?” Ne fai atu latou ki a ia: “E sefululua.”+ 20 “I te taimi ne tofitofi ei ne au a falaoa e fitu mō tagata e toko 4,000, e fia tapola ‵lasi ne faka‵fonu ne koutou ki toegā meakai?” Ne fai atu latou ki a ia: “E fitu.”+ 21 Fai atu ei a ia ki a latou: “E a, e seki malamalama eiloa koutou?”
22 Ne olo atu latou ki Petesaita. Ne avatu ne tino ki a ia i konā se tino ‵kivi, kae fakamolemole atu latou ki a ia ke fakapatele aka ki ei.+ 23 Ne puke ne ia te tino ‵kivi i tena lima kae ‵taki ne ia ki tua mo te fakai. I te otiga ne puaki atu ki ana mata,+ ne tuku atu ana lima ki luga i a ia kae fesili atu: “E isi sau mea e lavea?” 24 Ne kilo aka te tagata kae fai atu: “E lavea ne au a tino, kae e foliga mai e pelā me ne lakau e oloolo sāle.” 25 Ne toe tuku atu ana lima ki luga i mata o te tagata tenā, lavea faka‵lei ei ne ia a mea. Ne ‵lei ana mata kae ko lavea faka‵lei ne ia a mea katoa. 26 Ne uga atu ne ia te tagata tenā ke fano ki tena fale, ana muna: “Sa toe foki ki te fakai.”
27 Ne olo atu a Iesu mo ana soko ki fakai fo‵liki o Kaisaleia Filipi, kae i te lotou auala, ne fakafesilisili ne ia ana soko, ana muna: “Ne a muna a tino me ko oi au?”+ 28 Olotou muna ki a ia: “Ko Ioane te Papatiso,+ kae ko nisi tino ne fai mai me ko Elia,+ kae e fai mai foki a nisi tino me se tino e tokotasi o te kau pelofeta.” 29 Fesili atu ei a ia ki a latou: “Kae ko koutou la, se a te otou faka‵tau, ko oi au?” Ne tali atu a Petelu ki a ia: “A koe ko te Keliso.”+ 30 Ne fakatonu malosi atu a ia ki a latou ke mo a ma fakailoa atu a mea e uiga ki a ia ki se isi tino.+ 31 Ne kamata a ia o akoako atu ki a latou me e ‵tau o logo‵mae a te Tama a te tagata i mea e uke kae ka ‵teke atu ki a ia a toeaina mo faitaulaga pule mo failautusi kae ka tamate a ia,+ kae ka toetu aka i te tolu o aso mai tua ifo.+ 32 E tonu, ne fakamalamalama faka‵lei atu ne ia te mea tenā. Kae ne ‵taki atu a ia ne Petelu ki se feitu e tasi kae kamata o ‵liko atu ki a ia.+ 33 Ne mafuli atu tou tagata, kilo atu ki ana soko kae ‵liko ne ia a Petelu, ana muna: “Fano kea‵tea mai i a au, e Satani! me i a koe e se mafaufau e pelā mo te Atua kae e pelā mo tāgata.”+
34 Ne kalaga atu a ia ki te vaitino mo ana soko ke olo atu ki a ia kae fai atu ki a latou: “So se tino e fia tautali mai i a au, ke se toe mafaufau ki a ia eiloa, kae ke amo tena pou fakasaua* kae tumau i te tautali mai i a au.+ 35 Me ko so se tino e manako o fakasao tena ola, ka se maua ne ia, kae ko so se tino e galo tena ola ona ko au mo te tala ‵lei ka maua ne ia.+ 36 Kae se a te mea ‵lei ka maua ne se tagata māfai e maua ne ia te lalolagi kātoa kae galo atu tena ola i ei?+ 37 Se a te mea e mafai o tuku atu ne se tagata ke sui ei tena ola?+ 38 Me ko so se tino e mā i a au mo aku pati i te kautama mulilua* kae agasala tenei, ka mā foki a te Tama a te tagata i a ia+ i te taimi e vau ei a ia i te ‵malu o tena Tamana fakatasi mo ana agelu tapu.”+