Se Fakaasiga ki a Ioane

2 “Tusi atu penei ki te agelu+ o te fakapotopotoga i Efeso:+ Konei a pati a te tino telā e puke ne ia a fetū e fitu i tena lima fakaatamai kae sasale i va o tugamoli aulo e fitu:+ 2 ‘E iloa ne au au mea ne fai, mo au galuega mo tou kufaki, kae e se mafai o talia ne koe a tāgata ma‵sei, kae e tofotofo ne koe a latou kolā e fai mai i a latou ne apositolo,+ kae e se ne apositolo, kae ne maua aka ne koe i a latou ne tino ‵loi. 3 E fakaasi mai foki ne koe te kufaki, kae ne fa‵ki eiloa koe ona ko toku igoa,+ kae ne seki fi‵ta koe.+ 4 Kae e tiga te feitu tenā, tenei te mea e se fiafia ei au ki a koe, me ko oti ne tiakina ne koe te alofa telā ne maua muamua ne koe.

5 “‘Tela la, ke masaua a te mea telā ne fakatamala koe i ei, kae salamō+ kae fai a faifaiga ne fai muamua ne koe. Kafai e se fai ne koe, ka fanatu au ki a koe, kae ka ave kea‵tea ne au tau tugamoli+ mai i tena tulaga, seiloga ke salamō koe.+ 6 Kae tenei eiloa te mea koi ‵lei ei koe: me e takalialia koe ki faifaiga a te potukau fakalotu a Nikolaitani,+ telā e takalialia foki au ki ei. 7 A te tino telā e isi ne ana taliga ke na fakalogo ki muna a te agaga ki fakapotopotoga:+ Ka talia ne au te tino telā e manumalo+ ke kai ki te fuaga o te lakau o te ola,+ telā e tu i te palataiso o te Atua.’

8 “Kae ke tusi atu penei ki te agelu o te fakapotopotoga i Semulana: Konei a pati a ia, telā ko ‘te tino Muamua mo te tino Fakaoti,’+ ko ia telā ne mate kae ne toe ola mai:+ 9 ‘E iloa ne au ou puapuaga mo tou mativa​—kae e maukoloa eiloa koe+​—mo muna ma‵sei ne fai atu ne tino kolā e fai mai i a latou ne tino Iutaia, kae tagaila e se ne tino Iutaia, kae ko latou ko te sunako o Satani.+ 10 Sa mataku ki mea kolā ko pili o logo‵mae koe i ei.+ Kiloke! Ka ‵pei faeloa ne te Tiapolo a nisi tino i a koutou ki te falepuipui ko te mea ke katoatoa te otou tofotofoga, kae ka puapuaga koutou i aso e sefulu. Ke na fakamaoni koe ke oko eiloa ki te mate, kae ka tuku atu ne au ki a koe te foualiki o te ola.+ 11 A te tino telā e isi ne ana taliga ke na fakalogo+ ki muna a te agaga ki fakapotopotoga: Ko te tino telā e manumalo+ e se mafai lele eiloa o pakia i te mate fakalua.’+

12 “Tusi atu penei ki te agelu o te fakapotopotoga i Pelekamo: Konei a muna a te tino telā e isi sena pelu mata ‵kai kae loa telā e ‵kai i feitu e lua:+ 13 ‘E iloa ne au te koga telā e nofo koe i ei, ko te koga telā e tu i ei te nofogaaliki o Satani; kae koi puke ‵mau eiloa koe ki toku igoa,+ kae e seki fakafiti ne koe tou fakatuanaki ki a au+ i aso foki eiloa o Anitipa, taku molimau fakamaoni,+ telā ne tamate+ i otou tafa, i te koga telā e nofo ei a Satani.

14 “‘Kae ui i ei, e isi ne nai mea kolā e se fiafia ei au ki a koe, me e ‵nofo i a koe a latou kolā e puke ‵mau ki akoakoga a Palaamo,+ telā ne akoako ne ia a Palako+ ke fakaagasala ne ia a fanau a Isalaelu, ke ‵kai ki taulaga ne ofo atu ki tupua kae ke fai a amioga fakatauavaga sē ‵tau.*+ 15 Kae e isi foki ne tino i a koutou kolā e puke ‵mau ki akoakoga a te potukau fakalotu a Nikolaitani.+ 16 Ke na salamō. Kafai e se salamō koe, ka fanatu fakavave au ki a koe, kae ka taua atu au ki tino konā mo te pelu loa e vau mai toku gutu.+

17 “‘A te tino telā e isi ne ana taliga ke na fakalogo ki muna a te agaga ki fakapotopotoga:+ Ka avatu ne au ki te tino telā e manumalo+ a nisi vaega o te manai ‵funa,+ kae ka avatu ne au ki a ia se tamā fatu ‵kena, kae e tusi i luga i te tamā fatu tenā se igoa fou telā e se iloa ne se isi tino kae na ko te tino telā e maua ne ia.’

18 “Tusi atu penei ki te agelu o te fakapotopotoga i Tuatila:+ Konei a muna a te Tama a te Atua ne fai mai, ko ia telā e ‵ka ana mata e pelā me se ulaga afi+ kae ko ana alofivae e pelā mo te kopa ‵lei:+ 19 ‘E iloa ne au au mea ne fai, mo tou alofa mo tou fakatuanaki mo tau taviniga mo tou kufaki, kae e uke atu au mea ne fai fakamuli nei i lō au mea ne fai muamua.

20 “‘Kae ui i ei, tenei eiloa te mea e se fiafia ei au ki a koe, me e talia ne koe te fafine ko Iesepela,+ telā e fai mai i a ia se pelofeta fafine, kae e akoako kae takitaki ‵se ne ia aku tavini ke fai a amioga fakatauavaga sē ‵tau*+ kae ke ‵kai ki mea ne ofo atu ki tupua. 21 Kae ko oti ne tuku atu ne au te avanoaga ki a ia ke salamō, kae e se fia salamō eiloa tou fafine i ana amioga fakatauavaga sē ‵tau.* 22 Kiloke! Ko pili o fai ne au a ia ke masaki malosi, kae ko latou kolā e mulilua fakatasi mo ia ka uke olotou puapuaga, seiloga ke sala‵mo latou i olotou faifaiga mo te fafine tenā. 23 Kae ka tamate ne au ana tama‵liki ki se mala fakamataku, ko te mea ke iloa ne fakapotopotoga katoa i a au ko te tino e sukesuke ki mafaufauga ‵loto* mo loto o tino, kae ka toe taui atu ne au ki a koutou taki tokotasi e ‵tusa eiloa mo otou faifaiga.+

24 “‘Kae e fai atu au ki te ‵toega o koutou kolā e ‵nofo i Tuatila, ko latou katoa kolā e se tau‵tali i te akoakoga tenei, ko latou kolā ne seki fakamasani ki “mea ‵loto a Satani”:+ E se fakaeke atu ne au se isi amoga ‵mafa ki luga i a koutou. 25 Ke puke ‵mau koutou ki mea kolā ko oti ne maua ne koutou ke oko eiloa ki te taimi e oko atu ei au.+ 26 Kae ko te tino telā e manumalo kae e tautali i aku faifaiga ke oko eiloa ki te gataga, ka tuku atu ne au ki ei a te pulega ki fenua o te lalolagi,+ 27 kae ka tausi ne ia a tino ki te tokotoko fiti+ ko te mea ke foafoa latou ke malipi‵lipi e pelā me ne fagu kele, e pelā mo te pulega telā ko oti ne maua ne au mai i toku Tamana. 28 Kae ka tuku atu ne au ki a ia a te fetū o te vaveao.+ 29 A te tino telā e isi ne ana taliga ke na fakalogo ki muna a te agaga ki fakapotopotoga.’