Te Tusi Muamua ki te Kau Kolinito
4 A te tagata e ‵tau o kilo mai ki a māua e pelā me ko tino fesoasoani a Keliso mo situati o mea ‵funa kae tapu a te Atua.+ 2 E se gata i ei, a te mea telā e manakogina i situati ko te lotou fakamaoni. 3 Nei la, ko se tāua malosi ki a au māfai e fakamasino au ne koutou io me i fono fakamasino a tāgata. A te ‵tonuga loa, e se fakamasino ne au a au eiloa. 4 Me e se iloa ne au se mea masei e uiga ki a au. Kae e se fai ne te mea tenei ke amiotonu au; a te tino telā e fakamasino ne ia au ko Ieova.+ 5 Tela la, ke se fakamasino+ ne koutou se mea kae koi tuai o oko ki tena taimi tonu, ko te taimi e oko mai ei te Aliki. Ka aumai ne ia a mea ‵funa o te pouliga ki tua i te mainaga kae fakaasi mai a mea i loto o tino, ko maua ei ne tino taki tokotasi ana tavaega mai te Atua.+
6 Nei la, e oku taina, ko fakaaoga ne au a mea konei ki a māua mo Apolo+ mō te ‵lei o koutou, ko te mea ke iloa ne koutou te tulafono tenei e auala i a māua: “Ke mo a ma silia otou mea e fai i lō mea kolā ne tusi i te tusi,” ko te mea ke mo a ma ‵fete koutou i te fakamatamata,+ mai te mafau‵fau me e sili atu te tino e tokotasi i te suā tino. 7 Me ko oi ne fai ne ia koe ke ‵kese mai te suā tino? E tonu, se a tau mea ne maua telā e seki tuku atu ki a koe?+ Kafai la e tonu me ne tuku atu fua ki a koe, kaia la e fakamatamata ei koe, e pelā eiloa me ne seki tuku atu te mea tenā ki a koe?
8 E a, ko lotoma‵lie koutou? E a, ko mau‵mea koutou? E a, ko oti koutou ne pule mai e pelā me ne tupu+ e aunoa mo matou? Aku muna eiloa me ko oti koutou ne kamata o pule mai e pelā me ne tupu, ko te mea ke pule fakatasi foki tatou e pelā me ne tupu.+ 9 E foliga mai ki a au me ko oti ne fai ne te Atua a matou, te kau apositolo, ke fakaasi fakamuli atu e pelā me ne tāgata ko fakasala ke tamate,+ me ne fai matou e pelā me ne mea fakamaimoa ki te lalolagi+ mo agelu mo tino. 10 A matou ne tino va‵lea+ ona ko Keliso, kae ko koutou e ‵poto i a Keliso; a matou e vāi‵vai kae ko koutou e ma‵losi; a koutou e fakaaloalogina kae ko matou e se fakaaloalogina. 11 Ke oko mai ki te itula tenei e tumau eiloa matou i te fia‵kai+ mo te fiainu+ kae ma‵sei omotou gatu kae fakasauagina+ kae seai ne fale e ‵nofo i ei, 12 kae ga‵lue fi‵ta i galuega e fai ki omotou lima.+ Kafai e fakaitaita mai a tino, e fakamanuia atu matou;+ kafai e fakasaua mai, e kufaki matou;+ 13 kafai e fatufatu mai, e tali atu matou mo te filemu;+ ko oti ne fai a matou e pelā me ne kaiga o te lalolagi, ko mea kolā e tiaki ne tino ke oko mai eiloa ki te aso nei.
14 E tusi atu ne au a mea konei, ke se fakamasiasi atu ki a koutou, kae ke fakamalosi atu ki a koutou e pelā me ko aku tama fagasele. 15 Me e tiga eiloa e mafai o maua ne koutou a faiakoga* e toko 10,000 i a Keliso, e se maua eiloa ne koutou a tamana e tokouke; me ko oti au ne fai mo fai te otou tamana i a Keliso Iesu e auala i te tala ‵lei.+ 16 Tela la, au e fakamalosi atu ki a koutou ke fakaakoako mai ki a au.+ 17 Tenā te pogai e uga atu ei ne au a Timoteo ki a koutou, i a ia ko taku tama fagasele kae fakamaoni i te Aliki. Ka fakamasaua atu ne ia ki a koutou oku auala e uiga ki a Keliso Iesu,+ e pelā eiloa mo aku akoakoga ki fakapotopotoga i koga katoa.
18 E ‵fete a nisi tino i te fakamata‵mata e pelā eiloa me ka se fanatu au ki a koutou. 19 Kae ko pili o fanatu au ki a koutou, māfai e fetaui mo te loto o Ieova, kae ka iloa ei ne au a te malosi o tino kolā e ‵fete i te fakamata‵mata, kae e se ko olotou pati fua. 20 Me e se maua te Malo o te Atua i pati kae i te malosi o te Atua. 21 Se a te mea e ma‵nako koutou ki ei? Ke fanatu au ki a koutou mo se lakau ‵kini,+ io me ko te alofa mo te agaga o te agamalu?