Te Tusi i te Lua ki te Kau Kolinito

7 Tela la, ona ko te mea ko maua ne tatou a folafolaga konei,+ e aku fagasele, ke faka‵ma la tatou mai i so se mea e fakalailai ei te foitino mo te agaga,+ ke katoatoa te ‵tou tulaga tapu i te ma‵taku ki te Atua.

2 Fakaavanoa se koga mō matou i otou loto.+ E seai se motou mea ‵se ne fai ki se tino, e seki fakamasei ne matou se tino, e seki fakaloiloi foki ne matou se tino.+ 3 E se fai atu ne au te mea tenei ke fakamasei ei koutou. Ko oti ne fai muamua atu au me e ‵nofo koutou i omotou loto ke ‵mate fakatasi tatou kae ke ola fakatasi tatou. 4 E lasi toku saolotoga o faipati atu ki a koutou. E lasi toku fakamatamata ona ko koutou. E ‵fonu toku loto i fakamafanafanaga; e ‵fonu maligiligi toku loto i te fiafia i omotou puapuaga katoa.+

5 E tonu, i te motou okoatuga ki Maketonia,+ e seai eiloa se motou fakatapūga ne maua i ei, kae ne logo‵mae faeloa matou i feitu katoa—ko taua mai tino i tua, kae ne ma‵taku matou. 6 Kae ko te Atua telā e fakamafanafana ne ia a tino loto vāi‵vai,+ e fakamafanafana ne ia matou e auala i te fakatasi mai o Tito; 7 e se gata fua i tena fakatasi mai kae e auala foki i fakamafanafanaga ne maua ne ia ona ko koutou, e pelā mo te lipoti ne fai mai ne ia ki a matou e uiga ki te otou loto naunau ke lavea ne koutou au, te lasi o te otou loto fanoa‵noa, mo te otou manava‵se e uiga ki a au; telā ko silia atu ei toku fiafia.

8 Kafai ne fanoa‵noa koutou ona ko taku tusi,+ e se salamō au i ei. Kafai foki loa ne salamō au i ei i te taimi muamua, (i te lavea atu me ne fanoa‵noa koutou ona ko te tusi tenā, kae mō se taimi toetoe fua), 9 kae nei la, ko fiafia au, e se ona fua ko te otou fanoa‵noa, kae ona ko te otou fanoa‵noa me i a koutou ko sala‵mo. Me i a koutou ne fanoa‵noa i te auala telā e fetaui ‵lei mo te loto o te Atua, ko te mea ke se logo‵mae koutou ona ko matou. 10 Me i te fanoanoa telā e fetaui mo te loto o te Atua e maua mai i ei te salamō kae iku atu ki te fakaolataga telā e se fakafanoanoa;+ kae ko te fanoanoa o te lalolagi e maua mai ei te mate. 11 Onoono la ki te lasi o te ‵lei telā ne maua ne koutou ona ko te otou fanoa‵noa i te auala telā e fetaui ‵lei mo te loto o te Atua, ke taku ‵lei koutou; ko te ita; ko te mataku; ko te olioli malosi; ko te loto finafinau; ko te fakatonuga o te mea ‵se!+ E fakaasi mai ne koutou i a koutou ko ‵ma i feitu katoa konei. 12 E tiga eiloa ne tusi atu au ki a koutou, ne seki fai fua ne au mō te tino telā ne fai ne ia te mea ‵se,+ io me ko te tino ne fai ki ei a te mea ‵se, kae ke fakaasi mai ei a te lasi o te otou taumafai o faka‵logo ki omotou pati i mua o te Atua. 13 Tenā te pogai ko fakamafanafanagina ei matou.

Kae i tafa o omotou fakamafanafanaga, ko lasi atu a te motou fia‵fia ona ko te fiafia o Tito, me ne fakamalosi ne koutou katoa a tena loto.* 14 Me kafai ko oti ne tavae ne au koutou ki a ia, e se mā au i ei; kae e pelā eiloa mo te ‵tonu o mea katoa kolā ne fakailoa atu ne matou ki a koutou, e penā foki te ‵tonu o omotou tavaega ne fai ki a Tito. 15 E se gata i ei, ko lasi atu foki a tena alofa atafai ki a koutou, me e masaua ne ia te faka‵logo o koutou katoa,+ mo te auala ne fakafetaui atu ei koutou ki a ia mo te fakaaloalo lasi. 16 E fiafia au me ko mafai o maua ne au te loto talitonu ki a* koutou i feitu katoa.