Te Tusi i te Lua ki te Kau Kolinito

1 Au ko Paulo, se apositolo a Keliso Iesu e ‵tusa eiloa mo te loto o te Atua, fakatasi mo Timoteo+ te ‵tou taina. Au e tusi atu ki te fakapotopotoga a te Atua i Kolinito, e aofia i ei a tino tapu katoa i Akaia kātoa:+

2 Ke i luga i a koutou a te alofa tauanoa mo te filemu o te Atua te ‵tou Tamana mo te Aliki ko Iesu Keliso.

3 Ke vikia te Atua telā ko te Tamana o te ‵tou Aliki ko Iesu Keliso,+ te Tamana o te alofa fakamagalo+ mo te Atua o fakamafanafanaga katoa,+ 4 telā e fakamafanafana* mai ki a tatou i ‵tou tofotofoga*+ katoa, ko te mea ke mafai o fakamafanafana atu tatou ki nisi tino+ kolā e pokotia i so se tofotofoga* e auala i fakamafanafanaga kolā e maua ne tatou mai te Atua.+ 5 Me e pelā eiloa mo te uke o logo‵maega e maua ne tatou mō Keliso,+ e penā foki te uke o fakamafanafanaga e maua ne tatou e auala i a Keliso. 6 Nei la, kafai e fe‵paki matou mo tofotofoga,* e fai a mea konā mo fai te otou fakamafanafanaga mo te otou fakaolataga; kae kafai ko fakamafanafanagina matou, e fai te mea tenā mo fai te otou fakamafanafanaga telā e galue o fesoasoani atu ki a koutou ke kufaki i logo‵maega kolā e logo‵mae foki i ei matou. 7 Kae ko te motou fakamoemoega mō koutou e ‵mautakitaki, me e iloa ne matou te otou ‵kau fakatasi i logo‵maega, ka penā foki te otou ‵kau fakatasi i fakamafanafanaga.+

8 Me e se ma‵nako matou ke se iloa ne koutou, e oku taina, a puapuaga ne fe‵paki mo matou i te kogā fenua o Asia.+ Ne silia atu a te fakamataku o te motou tulaga i lō te motou malosi o kufaki i ei, kae ne fakalotolotolua malosi matou e uiga ki omotou ola.+ 9 E tonu, ne oko ifo ki a matou a te lagonaga me ko maua ne matou a te fakasalaga ki te mate. Ne tupu te mea tenei ko te mea ke se tali‵tonu matou ki a matou eiloa, kae ke tali‵tonu matou ki te Atua+ telā ka faka‵tu aka ne ia a tino ‵mate. 10 Mai te tulaga fakamataku o te mate ne faka‵sao ne ia matou kae ka faka‵sao eiloa ne ia matou, kae e fakamoe‵moe matou ki a ia me ka faka‵sao faeloa ne ia matou,+ 11 E mafai foki o fesoasoani mai koutou ki a matou e auala i otou ‵talo mō matou,+ ko te mea ke tokouke a tino e fakafetai atu mō matou ke maua ei ne matou te taui ona ko ‵talo a tino e tokouke.+

12 A te mea telā e fai‵pati fakamata‵mata matou ki ei tenei, e molimau atu omotou loto lagona me i omotou amioga ne fai i te lalolagi, kae maise eiloa mō koutou, e ‵malu kae fakamaoni, e se i poto o tāgata+ kae mai i te alofa tauanoa o te Atua. 13 Me e se tusi atu matou ki a koutou e uiga ki se isi mea kae na ko mea e mafai o fai‵tau ne koutou* kae malamalama i ei, kae e fakamoemoe au ke tumau te otou malamalama katoatoa i mea konei,* 14 e pelā eiloa mo nai mea kolā ko oti ne malamalama koutou i ei me ko fai matou mo pogai e fai‵pati fakamata‵mata ei koutou, e pelā eiloa mo matou ki a koutou i te aso o te ‵tou Aliki ko Iesu.

15 Tela la, ona ko te loto talitonu tenei, ne manako au o fanatu muamua ki a koutou, ko te mea ke toe maua ne koutou se taimi fiafia i te lua o taimi;* 16 me ne manako au o āsi atu ki a koutou i toku auala ki Maketonia, ke toe foki atu ki a koutou mai i Maketonia, ko uga ei ne koutou au ki Iuta.+ 17 Tela la, i te faiga o taku fakaikuga tenā, e a, ne manatu māmā au ki ei? E a, e se fai ne au a fuafuaga e pelā me se tagata, ko te mea ke fai atu au “Ao, ao” kae fakamuli ko fai atu “Ikai, ikai”? 18 Kae ko te Atua e fakamaoni ko te mea ke se fai te motou “ao” mo fai te motou “ikai.” 19 Me i te Tama a te Atua, ko Iesu Keliso, telā ne talai atu ki a koutou e auala i a matou, ko tena uiga ko matou mo Suliano* mo Timoteo,+ ne seki fai mo fai te “ao” kae fakamuli ifo ko te “ikai,” kae ko te “ao” ne fai mo fai te “ao” i te feitu tenei. 20 Me faitalia te uke o folafolaga a te Atua ne fai mai, ne fai katoa eiloa mo fai te “ao” e auala i a ia.+ Tela la, e auala foki i a ia ne fai atu ei matou penei “Amene” ki te Atua,+ e avatu ei ki a ia a te ‵malu e auala i a matou. 21 Kae ko te tino telā ne fakamautinoa aka ne ia koutou mo matou ke fai mo tino o Keliso, ko te tino foki telā ne fakaeke ne ia tatou, ko te Atua eiloa.+ 22 Ko oti foki ne tuku mai ne ia tena fakamailoga ki luga i a tatou+ kae fakatalitonu mai ki a tatou e uiga ki te mea telā ka oko mai,* ko te agaga+ i loto i ‵tou loto.

23 Nei la, e molimau atu au ki a koutou i mua o te Atua me ka se fanatu au ki Kolinito ko te mea ke se fanoa‵noa koutou. 24 E se fakauiga i ei i a matou e fia pule atu ki te otou fakatuanaki,+ kae ko matou ne tino e ga‵lue fakatasi mo koutou mō te otou fia‵fia, me ko te otou fakatuanaki eiloa tenā e ‵tu ei koutou.