Isaia
66 Konei a pati a Ieova ne fai mai:
“A te lagi ko toku nofogaaliki, kae ko te lalolagi ko te mea e tuku ei oku vae.+
2 “A mea katoa konei ne faite ne au ki oku lima eiloa,
Kae tenei te auala ne māfua mai i ei a mea katoa konei,” ko te folafolaga a Ieova.+
“Ka kilo atu au ki te tino tenei,
Ki te tino loto maulalo kae loto mafatia telā e mataku ki* taku pati.”+
3 A te tino e tamate ne ia te pulumakau tagata e fai pelā me se tino e ta ne ia se tagata.+
A te tino e ofo atu ne ia se mamoe e fai pelā me se tino e ‵fati ne ia te ua o se kuli.+
A te tino e ofo atu ne ia se meaalofa—e fai pelā mo toto o se puaka!+
A te tino e tuku atu ne ia se taulaga o fakamasauaga o te pulu lipano+ e fai pelā me se tino e fakamanuia atu ki pati fakataulaitu.*+
Ne filifili ne latou olotou auala,
Kae e fia‵fia latou ki mea fakatakalia‵lia.
4 Tela la, ka filifili ne au a auala ke fakasala ei latou,+
Kae ko mea eiloa e ma‵taku latou ki ei ka aumai ne au ki luga i a latou.
Me i te taimi ne kalaga atu ei au, e seai se tino ne tali mai;
I te taimi ne faipati atu ei au, e seai se tino ne fakalogologo.+
Ne tumau eiloa latou i te faiga o mea ma‵sei i taku kilokiloga,
Kae ne filifili ne latou ke fai a mea kolā e fakafanoanoa mai ki a au.”+
5 Faka‵logo mai ki pati a Ieova, koutou kolā e ma‵taku ki* ana pati:
“A otou taina kolā e takalia‵lia ki a koutou kae ‵vae kea‵tea ne latou koutou ona ko toku igoa ne fai mai, ‘Ke faka‵malu atu ki a Ieova!’+
Kae ka fakasae mai a Ia o aumai te fiafia ki a koutou,
Kae ko latou ko tino kolā ka fakamasiasigina.”+
6 E isi ne leo e logoa mai i te fakai, se leo e vau mai i te faletapu!
Ko te leo o Ieova e taui atu ki ana fili a te mea e ‵tau o maua ne latou.
7 Koi tuai o ‵mae tou fafine, kae ko oti ne fanau a ia.+
Koi tuai o oko mai te puapuaga o te fanau, kae ne fanau ne ia se tamaliki tagata.
8 Ko oi ne logo i se vaegā mea penei?
Ko oi ne lavea ne ia se vaegā mea penei?
E a, e mafai o fanau mai se laukele i se aso e tasi?
E a, e mafai foki o fanau mai se fenua i se taimi eiloa e tasi?
Kae i te taimi eiloa ne ‵mae ei a Siona, ne fanau ne ia ana tama tāgata.
9 “E mata, ka aumai ne au te tamaliki ki te tulaga ka fanau mai kae taofi ne au ke se fanau?” ko muna a Ieova.
“Io me e mata, ka fakamāfua aka ne au ke fanau mai kae ‵pono ne au te moegatama?’ ko muna a te Atua.
10 Ke fia‵fia fakatasi mo Ielusalema kae ‵lifu fakatasi mo ia,+ koutou katoa kolā e a‵lofa ki a ia.+
Ke fia‵fia malosi fakatasi mo tou fafine, koutou katoa kolā e fanoa‵noa ona ko ia.
11 Me i a koutou ka ū kae ma‵kona mai i ana ū o te fakamafanafanaga,
Kae ka inu malosi koutou kae fia‵fia i te lasi o tena ‵malu.
12 Me konei a pati a Ieova ne fai mai:
“Nei la, ko fakalauefa atu ne au tena filemu e pelā me se vaitafe+
Kae ko te ‵malu o atufenua e pelā me se vaitafe e ‵tafe malosi.+
Ka tausi faka‵lei koe kae tauave i ana taugasulu,
Kae ka lūlū koe i luga i ana tulivae.
13 E pelā me se mātua e fakamafanafana ne ia tena tama tagata,
Ka tumau eiloa au i te fakamafanafana atu ki a koe;+
Kae ona ko Ielusalema ka fakamafanafana ei koe.+
14 Ka lavea ne koe te mea tenei kae ka fiafia tou loto,
Ou ivi ka ‵tupu olaola e pelā eiloa me ne mouku ‵fou.
15 “Me i a Ieova ka vau pelā me se afi,+
Kae ko ana kaliota e fai pelā me se matagi malosi,+
O taui atu i tena kaitaua malosi,
Ke fakasala ki ulaga o te afi.+
16 Me i a Ieova ka fai tena fakamasinoga tonu ki te afi,
Ao, ki tena pelu, o taua atu ki tino;
Kae e tokouke a tino ka tamate ne Ieova.
17 “A latou kolā e fakatapu kae faka‵ma ne latou a latou eiloa ke ulu atu ki loto i fatoaga*+ mai te tau‵tali atu i te tino telā e tu i te kogaloto, ko latou kolā e ‵kai ki ‵kano o puaka+ mo mea fakatakalia‵lia mo kimoa,+ ka oko katoa latou ki te lotou gataga,” ko te folafolaga a Ieova. 18 “Ona ko te mea e iloa ne au olotou galuega mo olotou mafaufauga, ko vau ei au o fakamaopoopo mai a tino mai i atufenua katoa mo ‵gana, kae ka o‵mai latou kae lavea ne latou toku ‵malu.”
19 “Ka fakatu aka ne au se fakailoga mō latou, kae ka uga atu ne au a nisi tino i a latou kolā ne ‵sao ki nisi fenua—ki Talasisi,+ Pulu mo Luti,+ ko latou kolā e ofe ne latou te kausana, ki Tupalu mo Iavana+ mo fenua fo‵liki kolā e ‵mao ‵ki—ko fenua kolā e seki ‵logo i se lipoti e uiga ki a au io me lavea ne latou toku ‵malu; kae ka folafola atu ne latou toku ‵malu i atufenua katoa.+ 20 Ka aumai ne latou otou taina katoa mai i atufenua katoa+ e pelā me se meaalofa ki a Ieova, i luga i solofanua, i loto i kaliota, i ka e ufi faka‵lei, i luga i miula mo kamela ma‵kini ki luga i toku mauga tapu, ko Ielusalema,” ko muna a Ieova, “e pelā eiloa mo tino Isalaelu māfai ko aumai olotou meaalofa i se pōla ‵ma ki loto i te fale o Ieova.”
21 “Ka puke foki ne au ne mea ma faitaulaga mo tino Levi,” ko muna a Ieova.
22 “Me e pelā eiloa mo te lagi fou mo te lalolagi fou+ kolā e faite ne au ka tumau eiloa i oku mua,” ko te folafolaga a Ieova, “ka tumau foki penā a tau tama* mo tou igoa.”+
23 “Kae mai te masina sae ki te suā masina sae kae mai te sapati ki te suā sapati,
A tino katoa ka o‵mai o ifo ki lalo i oku mua,”+ ko muna a Ieova.
24 “Kae ka olo latou ki tua kae ‵kilo atu ki foitino ‵mate o tāgata kolā ne ‵teke mai ki a au;
Me ka se ‵mate a ilo i luga i a latou konā,
Kae ka se mafai o tamate te lotou afi,+
Kae ka fai latou e pelā me se mea fakatakalialia ki tino katoa.”