Te Lua o Tusi a Petelu
1 Au ko Simona Petelu, se pologa kae se apositolo foki a Iesu Keliso, ki tino kolā ko oti ne maua ne latou te fakatuanaki telā e ‵pau tena tāua mo te mea telā ko maua ne tatou* e auala i te amiotonu o te ‵tou Atua mo te ‵tou Fakaola ko Iesu Keliso:
2 Ke gasolo aka faeloa o lasi atu te alofa tauanoa mo te filemu i luga i a koutou e auala i te iloa tonu+ o te Atua mo Iesu te ‵tou Aliki, 3 me ko oti ne tuku mai* ne tena ‵mana ki a tatou a mea katoa kolā e maua ei te ola mo te tapuaki fakamaoni ki te Atua e auala i te iloaga tonu o te Atua telā ne kalagagina ne ia tatou+ i tena ‵malu mo amioga ‵lei. 4 E auala i mea konei ko oti ne tuku mai* ne ia ki a tatou a folafolaga tāua kae ‵gali,+ ko te mea ke fai koutou e pelā me ne agaga e pelā mo te Atua e auala i mea konei,+ me ko oti ne ‵sao koutou mai te masei o te lalolagi telā e tuku mai ne manakoga ‵se.*
5 Ko te pogai eiloa tenei e ‵tau ei o fakapalele otou mafi+ o tuku atu ki te otou fakatuanaki te amio ‵lei,+ ki te otou amio ‵lei te poto,+ 6 ki te otou poto te loto pulea, ki te otou loto pulea te kufaki,+ ki te otou kufaki te tapuaki fakamaoni ki te Atua,+ 7 ki te otou tapuaki fakamaoni ki te Atua te alofa fakataina, ki te otou a‵lofa fakataina te alofa.+ 8 Me kafai e maua a mea konei i a koutou kae e ‵fonu maligiligi i ei, ka fai ne mea konei ke ‵fua malosi mai koutou ke se paie+ e uiga ki te iloaga tonu o te ‵tou Aliki ko Iesu Keliso.
9 Me i so se tino e se maua i ei a mea konei e ‵kivi, e ‵moe ana mata ki te mainaga,*+ kae ko puli i a ia tena faka‵māga mai i ana agasala+ i se taimi ko leva. 10 Tela la, e taina, ga‵lue malosi o fakamautinoa faka‵lei te otou kalagaga+ mo te otou filifiliga, me kafai e fai faeloa ne koutou a mea konei ka se mafai eiloa o taka‵vale koutou.+ 11 E tonu, tenei te auala ka tuku atu ei te tauliaga lasi ki a koutou ke ulu ki loto i te Malo se-gata-mai+ o te ‵tou Aliki mo te Fakaola ko Iesu Keliso.+
12 Tenei te pogai e manako ei au ke fakamasaua atu faeloa ki a koutou e uiga ki mea konei, e tiga eiloa e iloa ne koutou a mea konā kae ‵mautakitaki i te munatonu tenā i loto i a koutou. 13 Kae e mafaufau au me se mea ‵tau, ke fakamalosi aka koutou e auala i fakamasauaga+ kae koi nofo au i te faleie tapu*+ tenei, 14 ona ko toku iloa me ko pili o ave kea‵tea toku faleie tapu, e pelā eiloa mo te mea ne fakaasi manino mai ne te ‵tou Aliki ko Iesu Keliso ki a au.+ 15 Ka fai faeloa ne au te ‵toe mea e mafai o fai ko te mea kafai ko fano au, ka mafai o masaua* ne koutou a mea konei.
16 Ikai, ne seki fakaasi atu ne matou ki a koutou a tala sē ‵tonu ne ‵fatu fakagali‵gali e uiga ki te ‵mana mo te fakatasi mai o te ‵tou Aliki ko Iesu Keliso, kae ona ko te mea ne molimau omotou mata ki tena ‵malu sili.+ 17 Me ne maua ne ia mai te Atua te Tamana te fakaaloalo mo te ‵malu, i te faiatuga o pati konei ki a ia mai tena ‵malu sili: “Tenei eiloa taku Tama, ko taku fagasele telā ko oti ne talia ne au.”+ 18 Ao, ne lagona ne matou a pati konei mai te lagi kae koi ‵nofo matou mo ia i te mauga tapu.
19 Tela la, ne fakapa‵tonu mai i ei ki a matou te muna fakavaloaga, kae ka ‵lei koutou māfai e ‵saga ‵tonu atu koutou ki ei e pelā me se moli+ e maina atu i se koga pouli (ke oko ki te mafāga o te ata mo te fanakaga o te fetū ao+) i otou loto. 20 Me ne iloa muamua ne koutou te mea tenei, e seai se valoaga i Tusitusiga Tapu ne maua mai i manatu o tino. 21 Me ne seki tuku mai a valoaga i so se taimi i te loto eiloa o te tagata,+ kae ne fai‵pati mai a tāgata mai te Atua e auala i te takitakiga a te agaga tapu.+