Teutelonome

16 “Ke masaua te masina o Apipa,* kae ke fakamanatu a te Paseka ki a Ieova tou Atua,+ me i te masina o Apipa ne aumai ei ne Ieova tou Atua a koe ki tua mo Aikupito i te po.+ 2 Kae e ‵tau o ofo atu ne koe te taulaga o te Paseka ki a Ieova tou Atua,+ mai te lafu mamoe mo te lafu pulumakau,+ i te koga telā e filifili ne Ieova ke tuku i ei tena igoa.+ 3 E se ‵tau mo koe o kai ki se mea faka‵fete fakatasi mo te mea tenā;+ e ‵tau o kai koe ki falaoa sē faka‵fete i aso e fitu, ko te falaoa o te puapuaga, me i a koe ne fano fakavave ki tua mo te fenua o Aikupito.+ Fai a te mea tenei ko te mea ke masaua ne koe a te aso ne fano kea‵tea ei koe mai te fenua o Aikupito i tou olaga kātoa.+ 4 E se ‵tau o maua atu i a koe a falaoa ne palu ki te isi i te kogā fenua e nofo koe i ei i aso e fitu,+ io me tuku i te po kātoa ke oko ki te tafataeao a ‵kano o manu kolā ka ofo atu ne koe i te afiafi o te aso muamua.+ 5 Ka se talia eiloa ke ofo atu ne koe a te taulaga o te Paseka i so se fakai telā ka tuku atu ne Ieova tou Atua ki a koe. 6 Kae e ‵tau o fai i te koga telā e filifili ne Ieova tou Atua ke tuku i ei tena igoa. E ‵tau o ofo atu ne koe a te taulaga o te Paseka i te fakaafiafi i te taimi ko tō ei te mata o te la,+ ko te taimi tonu telā ne olo kea‵tea ei koutou mai Aikupito. 7 E ‵tau mo koe o ‵tunu a te mea tenā kae kai+ ki ei i te koga telā ka filifili ne Ieova tou Atua,+ kae i te tafataeao ko mafai ei o foki atu koe ki ou faleie. 8 E ‵tau o kai koe ki falaoa sē faka‵fete i aso e ono, kae i te fitu o aso ka fai i ei se maopoopoga ‵malu ki a Ieova tou Atua. E se ‵tau mo koe o fai ne galuega i ei.+

9 “E ‵tau o lau ne koe a vaiaso e fitu. E ‵tau o kamata o lau ne koe a vaiaso e fitu i te taimi muamua e ‵kati ei ne koe a fuataga saito ki te naifi ‵kati saito.+ 10 Tenā ko fakamanatu ei ne koe a te ‵Kaiga Fiafia o Vaiaso ki a Ieova tou Atua+ fakatasi mo te taulaga telā e ofo atu ne koe mo te lotomalie mai ou lima e ‵tusa mo te auala ne fakamanuia ei koe ne Ieova tou Atua.+ 11 Kae e ‵tau o fiafia koe i mua o Ieova tou Atua, ko koe mo tau tama tagata, tau tama fafine, tau pologa tagata, tau pologa fafine, te tino Levi telā e nofo i loto i ou fakai, te tino fakaa‵tea, te tamaliki e seai sena tamana, mo te fafine ko mate tena avaga, ko tino kolā e ‵nofo mo koe, i te koga telā e filifili ne Ieova tou Atua ke tuku i ei tena igoa.+ 12 Ke masaua me i a koe ne fai pelā me se pologa i Aikupito,+ kae ne tausi kae fakalogo ki tulafono fo‵liki konei.

13 “E ‵tau o fakamanatu ne koe a te ‵Kaiga Fiafia o Fale Fakamalumalu+ i aso e fitu māfai ko fakamaopoopo mai au mea mai tau koga tuki saito mo tau mea ‵tau sinu mo uaina. 14 Ke fiafia koe i te taimi o ‵kaiga fia‵fia,+ ko koe mo tau tama tagata, tau tama fafine, tau pologa tagata, tau pologa fafine, te tino Levi, te tino fakaa‵tea, te tamaliki e seai sena tamana, mo te fafine ko mate tena avaga, ko tino kolā e ‵nofo i ou fakai. 15 E fitu aso ka fakamanatu ei ne koe te ‵kaiga fiafia+ ki a Ieova tou Atua i te koga ka filifili ne Ieova, me i a Ieova tou Atua ka fakamanuia ne ia au fuataga katoa mo au mea katoa e fai,+ kae ko koe ka fiafia eiloa.+

16 “E tolu taimi i te tausaga e ‵tau ei o ‵tu otou tāgata katoa i mua o Ieova tou Atua i te koga ka filifili ne ia: i te ‵Kaiga Fiafia o Falaoa sē Faka‵fete,+ te ‵Kaiga Fiafia o Vaiaso,+ mo te ‵Kaiga Fiafia o Fale Fakamalumalu,+ kae e seai se tino i a latou e ‵tau o tu i mua o Ieova e aunoa mo ne mea i ana lima. 17 A te meaalofa telā e puke mai ne tino taki tokotasi e ‵tau o fetaui mo fakamanuiaga kolā ne tuku atu ne Ieova tou Atua ki a koe.+

18 “E ‵tau o faka‵sopo ne koe a famasino+ mo ofisa mō matakāiga takitasi i fakai katoa kolā ne tuku atu ne Ieova tou Atua ki a koe, kae e ‵tau mo latou o fakamasino a tino ki fakamasinoga amio‵tonu. 19 E se ‵tau mo koe o ‵fuli fakakotua a fakamasinoga ‵tonu,+ io me fakailoga tino,+ io me talia se ‵togi fakakolekole, me i ‵togi fakakolekole e faka‵kivi i ei a mata o tino ‵poto+ kae ‵fuli fakakotua ne ia a pati a tino amio‵tonu. 20 Te fakamasinoga tonu​—ko te fakamasinoga tonu e ‵tau o ‵sala ne koe,+ ko te mea ke tumau koe i te ola kae puke mō koe a te fenua telā ka tuku atu ne Ieova tou Atua ki a koe.

21 “E se ‵tau o ‵toki ne koe so se vaegā lakau ke fai pelā me se pou lakau tapu*+ i tafa o te fatafaitaulaga a Ieova tou Atua telā ne faite ne koe mō koe eiloa.

22 “E se ‵tau foki o faite ne koe se pou fatu tapu mō koe,+ se mea telā e takalialia ki ei a Ieova tou Atua.