Ielemia
9 Aku muna eiloa i toku ulu ne vai,
Oku mata se punavai o loimata!+
Tenā ko tagi ei au i te ao mo te po
Ona ko tino o toku fenua kolā ne tamate.
2 Aku muna eiloa me e isi soku fale i te koga lavaki ke malō‵lo i ei a tino faima‵laga!
Tenā ko tiakina ei ne au oku tino kae fano kea‵tea mai i a latou,
Me i a latou ne tino mulilua katoa,+
Se potukau o tino faitogafiti.
3 E ofe olotou alelo e pelā me se kausana;
Ko ‵fonu a te fenua i te loi kae e se ko te fakamaoni.+
“E gasolo aka latou mai i te matagā ki te matagā atu,
Kae e se fia ‵saga mai latou ki a au,”+ ko te folafolaga a Ieova.
4 “Tino katoa, ke fakaeteete koutou i otou tuakoi,
Kae ke mo a foki ma talitonu ki tou taina.
5 A tino taki tokotasi e fakaloiloi ne latou olotou tuakoi,
Kae e seai se tino e faipati ki te munatonu.
Ko oti ne akoako ne latou olotou gutu ke fai‵pati ki te loi.+
E fakafi‵ta ne latou a latou eiloa mai te faiga o te mea ‵se.
6 A koe e sagasaga i te va o faifaiga ‵loi.
I olotou faifaiga ‵loi, ne ita latou ma iloa ne latou au,” ko te folafolaga a Ieova.
7 Tela la, konei a pati a Ieova o kautau ne fai mai:
“Ka faka‵ma ne au latou kae tofotofo aka latou,+
Me se a foki la taku mea e mafai o fai ki te tama fafine o toku fenua?
8 A te lotou alelo se matasana tamate tino telā e faipati ki te loi.
Mai i tena gutu, e faipati a te tino e uiga ki te filemu ki tena tuakoi,
Kae i loto i tena loto e lamalama ne ia te tino tenā o ta.”
9 “E a, e se ‵tau o fakasala ne au latou ona ko mea konei?” ko te folafolaga a Ieova.
“E a, e se ‵tau mo au o taui ma sui atu ki se vaegā fenua penā?+
10 Au ka tagi kae tagi fanoanoa i luga i mauga
Kae fai se pese fanoanoa i luga i laukele moukuā o te koga lavaki,
Me ko oti ne ‵sunu a koga konā ko te mea ke seai se tagata e fanatu i loto i ei,
Kae e se lagona atu a leo o lafu manu i ei.
A manu eva o te lagi mo manu fe‵kai ko ‵tele; ko ‵galo atu latou.+
11 Ka fai ne au a Ielusalema e pelā me se fakaputuga o fatu,+ te koga ‵nofo o manu ko tiakolo,+
Kae ka fai ne au a fakai o Iuta ke ma‵sei valevale, e aunoa mo se tino e nofo i ei.+
12 Ko oi e lava tena poto ke malamalama i te mea tenei?
Ko oi ne faipati atu ki ei te gutu o Ieova, ko te mea ke folafola atu ne ia te mea tenei?
Kaia ko fakaseai i ei te laukele:
Kaia ko ‵paku ei e pelā me se koga lavaki,
Ko seai ei se tino e fanatu i loto i ei?”
13 Ne tali mai a Ieova: “Ona ko te lotou ‵teke ki taku tulafono* telā ne tuku atu ne au i olotou mua, kae ona ko te mea e seki tau‵tali latou i ei kae faka‵logo mai ki toku leo. 14 I lō te fai penā, ne tau‵tali atu latou mo te loto ma‵keke i olotou loto,+ kae tau‵tali atu i tupua o Paala, e pelā mo mea ne akoako atu ne olotou tamana ke fai ne latou.+ 15 Tela la, konei a pati a Ieova o kautau, te Atua o Isalaelu, ne fai mai, ‘Ko fai nei ne au a tino konei ke ‵kai ki lakau ‵kona, kae ka fai ne au latou ke inu ki vai poisini.+ 16 Ka fakasalalau atu ne au latou ki atufenua kolā e seki iloa ne latou kae seki iloa foki ne olotou tupuga,+ kae ka uga atu ne au se pelu i tua o latou ke oko ki te taimi ka fakaseai ei ne au latou.’+
17 Konei a pati a Ieova o kautau ne fai mai,
‘Ke amio e pelā me se tino malamalama.
‵Kami mai a fāfine kolā e usu ne latou a pese fanoa‵noa,+
Kae fai atu ki fāfine atamai ke o‵mai,
18 Ko te mea ke fakava‵vave mai latou kae ‵tagi fanoanoa mō tatou,
Ko te mea ke ‵fonu ‵tou mata i loimata
Kae ‵sali ifo a vai mai i ‵tou fifimata.+
19 Me i te leo o te ‵tagi fanoanoa ko lagona mai i Siona:+
“A matou ko oti ne fakamaseigina!
Ko oko eiloa i te lasi o te motou masiasi!
Me ne tiakina ne matou te fenua, kae ofa ki lalo ne latou omotou fale.”+
20 Koutou e fāfine, faka‵logo mai ki muna a Ieova.
Ke talia ne otou taliga a muna mai i tena gutu.
Akoako atu ki otou tama fāfine te ‵tagi fanoanoa tenei,
Kae akoako atu te suā tino ki te suā tino a te pese fanoanoa tenei.+
21 Me i te mate ne fanaka mai i omotou famalama;
Ne ulu mai ki loto i omotou taoa ma‵losi
O puke kea‵tea omotou tama‵liki mai i auala
Kae ko tamataene mai i malae o te fakai.’+
22 Fai atu, ‘Tenei te folafolaga a Ieova:
“A foitino ‵mate o tino ka ta‵tela eiloa e pelā me ne kaiao ki luga i te laukele,
E pelā me se laina o saito ‵fou fatoa oti ne ‵kati i tua o te tino ‵kati saito,
Kae seai se tino e ‵luku mai ne ia a mea konā.”’”+
23 Konei a pati a Ieova ne fai mai:
“Ke mo a ma faipati fakamatamata te tagata poto e uiga ki tena poto;+
Ke mo a ma faipati fakamatamata te tagata mafi e uiga ki tena mafi;
Kae ke mo a ma faipati fakamatamata te tagata maumea e uiga ki tena maumea.”+
24 “Kae ko te tino telā e faipati fakamatamata ke faipati fakamatamata e uiga ki te mea tenei:
Me e ‵loto tena malamalama mo tena iloa e uiga ki a au,+
Me i a au ko Ieova, te Atua telā e fakaasi atu ne ia te alofa fakamaoni, te fai mea tonu, mo te amiotonu i te lalolagi,+
Me i a au e fiafia ki mea konei,”+ ko te folafolaga a Ieova.
25 “Kiloke! Ka oko mai a aso,” ko te folafolaga a Ieova, “kae ka taui atu ne au ki tino katoa kolā ne pilitome mo tino kolā koi tuai o pilitome,+ 26 fakatasi mo Aikupito+ mo Iuta+ mo Etoma+ mo tino Amoni+ mo Moapi+ mo latou katoa kolā ne ‵kati olotou laulu i feitu o olotou ulu kae ‵nofo i te koga lavaki;+ me i atufenua katoa e seki pilitome, kae e seki pilitome foki a loto+ o kāiga katoa o Isalaelu.”