Ielemia

33 Ne oko mai te fekau a Ieova ki a Ielemia i te lua o taimi, kae koi taofi ei a ia i te Koga Ateatea o te Leoleo,+ ana muna: 2 “Konei a pati a Ieova te Atua telā ne faite ne ia te lalolagi, ko Ieova telā ne fai ne ia kae faka‵mautakitaki ne ia; a tena igoa ko Ieova, 3 ‘Kalaga mai ki a au, kae ka tali atu au ki a koe kae ko toka au o fakamatala atu ki a koe a mea sili kae faiga‵ta o malamalama i ei, ko mea kolā e seki iloa ne koe.’”+

4 “Me konei a pati a Ieova te Atua o Isalaelu ne fai e uiga ki fale i te fakai tenei mo fale o tupu o Iuta kolā ko oti ne ofa ki lalo ona ko meatau ma‵luga mo te pelu,+ 5 kae e uiga ki a latou kolā ka o‵mai o taua ki tino Kaletaia, kae faka‵fonu a koga konei ki foitino o tino ‵mate kolā ne ‵ta ne au i toku ita mo toku kaitaua, ko latou kolā ne fai ei ke ‵funa oku mata mai te fakai tenei ona ko olotou amioga matagā: 6 ‘Ko aumai nei ne au te malōlōga mo te malosi ‵lei ki a ia,+ kae ka faka‵lei aka ne au a latou kae fakaasi atu ki a latou a te filemu lasi mo te munatonu.+ 7 Kae ka toe faka‵foki mai ne au a tino o Iuta kolā ne ave fakapagota mo tino o Isalaelu kolā ne ave fakapagota,+ kae ka toe ati aka ne au latou e pelā mo te mea ne fai ne au i te kamataga.+ 8 Kae ka faka‵ma pakipaki ne au latou mai i mea ‵se katoa o olotou agasala ne fai ki a au,+ kae ka fakamagalo ne au a mea ‵se katoa o olotou agasala mo olotou amioga solitulafono ne fai ki a au.+ 9 Kae ka fai tou fafine e pelā me se igoa fakafiafia ki a au, se vikiga, kae se mea gali i mua o atufenua katoa i te lalolagi kolā ka ‵logo i te aga‵lei o oku telā ko fakaoko atu ne au ki luga i a latou.+ Kae ka ma‵taku latou kae pole‵pole+ ona ko toku aga‵lei mo te filemu kolā ka fakaoko atu ne au ki luga i tou fafine.’”+

10 “Konei a pati a Ieova ne fai mai: ‘I te koga tenei, telā e fai mai koe me se laukele sē aoga, kae e seai se tagata io me se lafu manu i ei, i loto i fakai o Iuta mo auala o Ielusalema kolā e seai ne mea i ei, kae seai se tagata io me se tino io me se lafu manu i ei, ka toe lagona atu i ei 11 a te leo o te fiafia mo te leo o te ‵lifu,+ te leo o te tagata ka fakaipoipo mo te leo o te fafine ka fakaipoipo, ko leo o latou kolā e fai mai: “Fakafetai atu ki a Ieova o kautau, me i a Ieova e ‵lei;+ a tena alofa fakamaoni e tumau ki te se-gata-mai!”’+

“‘Ka aumai ne latou a taulaga fakafetai ki te fale o Ieova,+ me ka faka‵foki mai ne au a tino o te fenua kolā ne ave fakapagota, e pelā eiloa mo te kamataga,’ ko muna a Ieova.”

12 “Konei a muna a Ieova o kautau ne fai mai: ‘I te laukele sē aoga tenei, telā e seai se tagata io me se lafu manu i ei, mo ana fakai katoa, ka toe isi eiloa ne laukele moukuā mō tausi mamoe ke takatokato i ei olotou lafu mamoe.’+

13 “‘I fakai o koga maugā, i fakai ma‵lalo, i fakai i te feitu ki saute, i te fenua o Peniamina, i koga i tafatafa o Ielusalema,+ mo fakai o Iuta,+ ka toe olo atu a lafu mamoe i lalo o lima o te tino telā e lau aka ne ia latou,’ ko muna a Ieova.”

14 “‘Kiloke! Ka oko mai a aso,’ ko te folafolaga a Ieova, ‘ka fakataunu ei ne au a te tautoga ‵lei ne fai ne au e uiga ki te kāiga o Isalaelu mo te kāiga o Iuta.+ 15 I aso konā kae i te taimi tenā ka fai ne au ke sae aka se tino* amiotonu mai te gafa o Tavita,+ kae ka fai ne ia te fakamasinoga tonu mo te amiotonu i te fenua.+ 16 I aso konā ka fakasao+ ei a Iuta kae ko Ielusalema ka nofo mo te saogalemu.+ Kae ka taku a ia ki te igoa tenei: A Ieova ko te Motou Amiotonu.’”+

17 “Me konei a pati a Ieova ne fai mai: ‘Ka isi faeloa se tagata i te gafa o Tavita e sagasaga i luga i te nofogaaliki o te kāiga o Isalaelu,+ 18 kae ka isi faeloa se faitaulaga mai te kau Levi ka tu i oku mua o ofo mai ki a au a taulaga ‵sunu, o ‵sunu a taulaga meakai kae ofo atu a nisi taulaga.’”

19 Kae ne toe oko mai te muna a Ieova ki a Ielemia, ana muna: 20 “Konei a muna a Ieova ne fai mai, ‘Kafai e mafai o ofa ne koe taku feagaiga e uiga ki te ao mo taku feagaiga e uiga ki te po, ke taofi ei a te ao mo te po ke mo a ma oko mai i lā taimi tonu,+ 21 tenā ko mafai ei o ofa taku feagaiga ne fai mo taku tavini ko Tavita,+ ko te mea ke seai sena tama tagata e pule pelā me se tupu i tena nofogaaliki,+ e penā foki taku feagaiga mo faitaulaga Levi, ko aku tavini.+ 22 E pelā eiloa mo kautau o te lagi kolā e se mafai o lau aka mo one o te tai kolā e se mafai o fua, ka fakatokouke penā ne au a tama* a taku tavini ko Tavita mo tino Levi kolā e tavini mai ki a au.’”

23 Kae ne toe oko mai te fekau a Ieova ki a Ielemia, ana muna: 24 “E a, e se iloa ne koe a pati e fai ne tino konei, ‘Ka ‵teke ne Ieova a kāiga e lua kolā ne filifili ne ia’? Kae e fai ne latou a faifaiga sē āva ki oku tino, kae e se toe ma‵natu aka me i a latou se fenua.

25 “Konei a pati a Ieova ne fai mai: ‘E pelā eiloa mo taku feagaiga ne fai e uiga ki te ao mo te po,+ ko tulafono o te lagi mo te lalolagi,+ 26 ka se ‵teke atu eiloa au ki tama* a Iakopo mo taku tavini ko Tavita, ko te mea ke puke mai i ana tama* ne tino ke pule atu ki tino ne ‵tupu mai i a Apelaamo, Isaako mo Iakopo. Me ka toe fakamaopoopo mai ne au olotou tino ne ave fakapagota+ kae ka alofa au ki a latou.’”+