Ielemia

36 I te fa o tausaga o te pulega a Ieoiakimo+ te tama tagata a Iosia, te tupu o Iuta, ne oko mai ei te fekau tenei ki a Ielemia mai i a Ieova, ana muna: 2 “Puke se peluga tusi kae tusi ki loto i ei a pati katoa kolā ne fai atu ne au ki a koe e uiga ki Isalaelu mo Iuta+ mo atufenua katoa,+ mai i te aso muamua ne faipati atu ei au ki a koe i aso o Iosia ke oko mai ki te aso nei.+ 3 E se taumate, kafai e ‵logo a tino i te kāiga o Iuta e uiga ki fakalavelave kolā e mafaufau au o fakaoko atu ki a latou, kāti ka fulitua atu latou ki olotou amioga matagā, ko te mea ke fakamagalo ne au olotou mea ‵se mo olotou agasala.”+

4 Tenā ne kalaga atu ei a Ielemia ki a Paluka+ te tama tagata a Nelia, kae ne laulau atu ne Ielemia a pati katoa ne fai atu ne Ieova ki a ia, kae ne tusi ne Paluka a mea konā ki te peluga tusi.+ 5 Tenā ne fakatonu atu ei a Ielemia ki a Paluka: “Au nei e fakataputapu kae e se mafai o ulu ki loto i te fale o Ieova. 6 Tela la, ko koe te tino e ‵tau o fano ki loto kae faitau atu i se leo maluga a pati a Ieova mai i te peluga tusi telā ne tusi ne koe i ei a mea ne laulau atu ne au. Faitau atu ke lagona ne tino i te fale o Ieova i te aso o te fakalikilikiga; ka faitau ne koe a mea konā ki tino Iuta katoa kolā e o‵mai ki loto mai i olotou fakai. 7 E se taumate ka oko atu ki a Ieova a te lotou fakatagi mō se taliaga, kae ka fulitua atu a tino taki tokotasi ki olotou auala matagā, me ko oko eiloa i te lasi o te kaitaua mo te ita o Ieova telā ne folafola mai ne ia e uiga ki tino konei.”

8 Tenā ne fai ei ne Paluka te tama tagata a Nelia a mea katoa ne fakatonu atu ne Ielemia te pelofeta ki a ia; ne faitau atu ne ia i se leo maluga a pati a Ieova mai i te peluga tusi i te fale o Ieova.+

9 I konā loa, i te lima tausaga o te pulega a Ieoiakimo+ te tama tagata a Iosia, te tupu o Iuta, i te iva o masina, a tino katoa i Ielusalema mo tino katoa ne o‵mai ki Ielusalema mai i fakai o Iuta ne folafola atu ne latou te fakalikilikiga i mua o Ieova.+ 10 Tenā ne faitau atu ei ne Paluka i se leo maluga a pati a Ielemia mai i te peluga tusi i te fale o Ieova, i te potu o Kemalia+ te tama tagata a Safana+ te tino laga tusi, i te koga ateatea tafa ki luga, i te auala ki loto o te mataloa fou o te fale o Ieova,+ kae ne fakalogo‵logo a tino katoa ki a ia.

11 I te lagonaga ne Mikaio te tama tagata a Kemalia te tama tagata a Safana a pati katoa a Ieova mai i te peluga tusi, 12 ne fanaifo a ia ki te fale o te tupu, ki te potu o te failautusi. A pelenise katoa e saga‵saga mai i konā: ko Elisama+ te failautusi, Telaia te tama tagata a Semaia, Elenatano+ te tama tagata a Akopa,+ Kemalia te tama tagata a Safana, Setekaia te tama tagata a Hanania, mo nisi pelenise aka katoa. 13 Ne fai atu ne Mikaio ki a latou a pati katoa ne lagona ne ia i te faitauga ne Paluka a te peluga tusi kae fakalogo‵logo a tino katoa ki ei.

14 Tenā ne uga atu ei ne pelenise katoa a Ieuti te tama tagata a Netania te tama tagata a Selemia te tama tagata a Kuhi ki a Paluka, ana muna: “Vau kae puke mai ne koe a te peluga tusi telā ne faitau ne koe kae fakalogo‵logo ki ei a tino katoa.” Tenā ne puke ei ne Paluka te tama tagata a Nelia a te peluga tusi i tena lima kae fanatu ki loto i a latou. 15 Ne fai atu latou ki a ia: “Fakamolemole, sagasaga ki lalo, kae faitau mai aka ki a matou i se leo maluga a te mea tenā.” Tenā ne faitau atu ei a Paluka ki a latou.

16 I te lagonaga ne latou a pati katoa, ne kilo atu te suā tino ki te suā tino mo te ma‵taku, kae ne fai atu latou ki a Paluka: “E ‵tau eiloa mo matou o fakailoa atu ki te tupu a pati katoa konei.” 17 Kae ne fesili atu latou ki a Paluka: “Fakamolemole, fakailoa mai ki a matou me ne tusi pefea ne koe a pati katoa konei. E a, ne laulau atu ne ia ki a koe?” 18 Ne tali atu a Paluka ki a latou: “Ne laulau mai ne ia a pati katoa konei, kae ne tusi ne au ki te vaitusi ki lalo i te peluga tusi tenei.” 19 Ne fai atu a pelenise ki a Paluka: “Olo o ‵muni, ko koe mo Ielemia, kae sa fakailoa ki se tino te koga e ‵muni ei koulua.”+

20 Tenā ne olo atu ei latou ki te tupu, ki te koga ateatea, kae tuku a te peluga tusi i loto i te potu o Elisama te failautusi, kae fai atu ne latou ki te tupu a mea katoa ne lagona ne latou.

21 Ne uga atu ne te tupu a Ieuti+ ke fano o puke mai te peluga tusi, kae ne aumai ne ia mai i te potu o Elisama te failautusi. Ne kamata o faitau atu ne Ieuti a mea i ei kae fakalogologo mai te tupu ki ei mo pelenise katoa kolā e ‵tu i tafa o te tupu. 22 A te tupu ne sagasaga i te fale o te tau ‵moko, i te iva o masina,* mo te afi e ka i ana mua. 23 I te otiga ne faitau atu ne Ieuti a itulau e tolu io me fa, kae ‵kati ne te tupu a te vaega tenā ki te naifi a te failautusi kae ‵pei atu ki loto i te afi, ke oko ki te taimi ko palele ei te peluga tusi kātoa ki loto i te afi. 24 Kae ne seki ma‵taku eiloa latou; a te tupu mo ana tavini katoa kolā ne lagona ne latou a pati katoa konei ne seki saesae olotou gatu. 25 E ui eiloa ne fakamolemole atu a Elenatano,+ Telaia+ mo Kemalia+ ki te tupu ke se ‵sunu a te peluga tusi, ne seki fakalogo eiloa a ia ki a latou. 26 E se gata i ei, ne fakatonu atu a te tupu ki a Ielameele te tama tagata a te tupu, Selaia te tama tagata a Asilieelu, mo Selemia te tama tagata a Apateeli ke puke mai a Paluka te failautusi mo Ielemia te pelofeta, kae ne faka‵muni eiloa ne Ieova a lāua.+

27 Kae ne toe oko mai te muna a Ieova ki a Ielemia i te otiga ne ‵sunu ne te tupu a te peluga tusi telā e tusi i ei a pati ne laulau atu ne Ielemia ki a Paluka ke tusi ki lalo,+ penei: 28 “Puke te suā peluga tusi kae tusi ki luga i ei a pati eiloa kolā ne tusi i te peluga tusi muamua, telā ne ‵sunu+ ne te tupu o Iuta ko Ieoiakimo. 29 Kae e ‵tau o fai atu koe e uiga ki te tupu o Iuta ko Ieoiakimo, ‘Konei a pati a Ieova ne fai mai: “Ne ‵sunu ne koe te peluga tusi tenei kae fai aka, ‘Kaia ne tusi ei ne koe: “A te tupu o Papelonia ka vau eiloa o fakamasei te fenua tenei kae ‵ta fakapalele a tino mo manu i ei”?’+ 30 Tela la, konei a pati a Ieova ne fai mai e uiga ki te tupu o Iuta ko Ieoiakimo, ‘Ka seai sena tino e sagasaga i te nofogaaliki o Tavita,+ kae ko tena foitino mate ka tuku faka‵sau atu ki te ‵vela o te la mo te ‵moko o te po.+ 31 Ka toe taui atu ne au ki a ia mo tino ne ‵tupu mai i ei mo ana tavini mō te lotou mea ‵se ne fai, kae ka fakaoko atu ne au ki a latou mo tino kolā e ‵nofo i Ielusalema mo tāgata o Iuta a fakalavelave katoa kolā ne fai atu ne au ki a latou,+ kae ne seki faka‵logo mai latou.’”’”+

32 Tenā ne toe puke ei ne Ielemia te suā peluga tusi kae tuku atu ki a Paluka te tama tagata a Nelia, te failautusi,+ kae ne tusi ne ia a pati ne laulau atu ne Ielemia ko pati katoa i te peluga tusi telā ne ‵sunu ki te afi+ ne te tupu o Iuta ko Ieoiakimo. Kae ne toe fakaopoopo atu foki a nisi pati penā ki ei.