Te Lua Nofoaiga Tupu

26 Tenā ne puke ei ne tino Iuta katoa a Usia+ telā ko 16 ana tausaga, kae fai a ia mo tupu e sui ei tena tamana ko Amasia.+ 2 Ne toe faite ne ia a Elata+ kae fakafoki atu ki Iuta mai tua o te takatoifoga a te tupu* o malō‵lo fakatasi mo ana tupuga.+ 3 Ko 16 tausaga o Usia+ i te taimi ne fai ei a ia mo tupu, kae ne pule a ia i Ielusalema i tausaga e 52. A te igoa o tena mātua ko Iekolia mai Ielusalema.+ 4 Ne tumau a ia i te faiga o mea ‵tonu i te kilokiloga a Ieova, e pelā eiloa mo mea ne fai ne tena tamana ko Amasia.+ 5 Kae ne ‵sala atu faeloa a ia ki te Atua i aso o Sakalia, telā ne akoako ne ia a ia ke mataku ki te Atua tonu. I te taimi ne ‵sala ei a ia ki a Ieova, ne fakamanuia+ a ia ne te Atua tonu.

6 Ne fanatu a ia o taua ki tino Filisitia+ kae fakapu ne ia a te ‵pui o Kata,+ te ‵pui o Iapene+ mo te ‵pui o Asetota.+ Oti aka, faite ei ne ia a fakai i kogā koga o Asetota mo kogā koga o tino Filisitia. 7 Ne tumau eiloa a te Atua tonu i te fesoasoani atu ki a ia i te taua atu ki tino Filisitia, tino Alapi+ kolā ne ‵nofo i Kulupaala mo tino Meunima. 8 Ne kamata a tino Amoni+ o avatu a meaalofa ke fakaaloalo atu ki a Usia. Ne salalau fakamuli atu tena takutakua ke oko eiloa ki Aikupito, me ne gasolo eiloa a ia o malosi ‵ki. 9 E se gata i ei, ne faite ne Usia a taoa+ i Ielusalema i te Mataloa o Matulimanu,+ te Mataloa ki te Vanu,+ mo te Maofega o te ‵Pui, kae fakamalosi aka ne ia a mea konā. 10 Oti aka, ne faite ne ia a taoa+ i te koga lavaki kae keli a vaikeli e uke (me uke ‵ki ana lafu manu); ne fai foki a ia penā i te Sefila penā foki loa mo koga laugatasi. E isi ne ana tino fai fatoaga mo tino ga‵lue i te togavine i luga i mauga mo Kalamelu, me i a ia se tino e fiafia ki te ‵toki lakau.

11 E se gata i ei, e isi foki se kautau a Usia mō te taua. E olo atu sāle latou i olotou kautau kolā ko oti ne fakatoka ki potukau. Ne lau te lotou aofaki kae fakamau+ olotou igoa ne Ieiela te failautusi+ mo Maseia te ofisa, mai lalo i te takitakiga a Hanania, se pelenise e tokotasi a te tupu. 12 A te aofaki kātoa o ulu o kāiga i olotou tamana kolā e pule atu ki toa ‵mafi konei e toko 2,600. 13 A kautau kolā e ‵nofo mai lalo i te lotou takitakiga e toko 307,500 tāgata kolā ko toka mō te taua, se kautau malosi kolā e ‵lago atu ki te tupu o taua ki te fili.+ 14 Ne avatu ne Usia ki te kautau kātoa a talita, tao,+ puloutau, gatu tau fiti,+ kausana mo siligi fatu.+ 15 E se gata i ei, ne faite foki ne ia i Ielusalema a masini o te taua kolā ne fai ne initinia; ne tuku a mea konā i luga i taoa+ mo ‵kōna o ‵pui kae mafai o sana i ei a matasana mo fatu ‵lasi. Tenā ne salalau atu ei a tena takutakua ki koga ‵mao, me ne lasi te fesoasoani ne maua ne ia kae ne gasolo eiloa o malosi tou tagata.

16 Kae i te taimi ko malosi ei a ia, ne oko a ia ki te tulaga masei ona ko tena loto fakamaualuga, kae ne seki fakamaoni a ia ki a Ieova tena Atua mai te ulu atu ki loto i te faletapu o Ieova o ‵sunu a mea ma‵nogi i luga i te fatafaitaulaga o mea ma‵nogi.+ 17 I konā eiloa ne ulu atu i ana tua a Asalia te faitaulaga mo nisi faitaulaga loto ‵toa a Ieova e toko 80. 18 Ne fakafesagai atu latou ki te Tupu ko Usia kae fai atu ki ei: “Usia, e se ‵tau mo koe o ‵sunu a mea ma‵nogi ki a Ieova!+ Ko faitaulaga fua e ‵tau o ‵sunu ne latou a mea ma‵nogi, me i a latou ne ‵tupu mai i a Alona,+ ko latou kolā ko oti ne fakatapu. Fano ki tua mo te koga tapuaki, me ko oti ne fai ne koe a faifaiga sē fakamaoni kae ka seai se ‵malu e maua ne koe mai i a Ieova te Atua ona ko te mea tenei.”

19 Kae ko Usia, telā e isi se mea tuku afi i tena lima mo ‵sunu a mea ma‵nogi, ne kaitaua malosi;+ kae i te taimi ne kaitaua ei a ia ki faitaulaga, ne oko atu te lepela+ ki tena lae i mua eiloa o faitaulaga i loto i te fale o Ieova i tafa o te fatafaitaulaga o mea ma‵nogi. 20 I te taimi ne ‵saga atu ei a Asalia te faitaulaga pule mo faitaulaga katoa ki a ia, ne lavea ne latou me ko oko atu te lepela ki tena lae! Tenā ne ave fakavave ei ne latou a ia ki tua, kae ne fano fakavave foki a ia ki tua, me ne fai ne Ieova ke poko tou tagata i te lepela.

21 Ne tumau eiloa a te tupu ko Usia i te fai pelā me se lepela ke oko ki te aso ne mate ei, kae ne nofo faeloa a ia i se isi fale e pelā me se lepela,+ me ko oti ne ‵vae kea‵tea a ia mai te fale o Ieova. A tena tama tagata ko Iotama ne pule ki te fale* o te tupu, kae fakamasino ne ia a tino o te fenua.+

22 Kae ko te tala fakasolopito kātoa o Usia, mai te kamataga ke oko ki te fakaotiga, ne tusi ki lalo ne te pelofeta ko Isaia+ te tama tagata a Amota. 23 Tenā ne takato ifo ei a Usia o malō‵lo fakatasi mo ana tupuga, kae ne tanu ne latou a ia fakatasi mo ana tupuga, i te laukele o tupu telā e tanu ei a tino ‵mate, me ne fai aka latou: “A ia se lepela.” Kae ko tena tama tagata ko Iotama+ ne fai mo tupu e sui ei a ia.