Ielemia

43 I te otiga ne faipati atu ne Ielemia ki tino katoa a pati katoa konei mai i a Ieova te lotou Atua, ko pati takitasi katoa a Ieova te lotou Atua telā ne uga mai ne ia tou tagata ke fai atu ki a latou, 2 ne fai atu a Asalia te tama tagata a Hosaia, Ioananu+ te tama tagata a Kalia, mo tāgata fakamata‵mata katoa ki a Ielemia: “A te mea e fai mai ne koe se mea loi! A Ieova te motou Atua ne seki uga mai ne ia koe ke fai mai, ‘Sa olo ki Aikupito o ‵nofo i ei.’ 3 Kae ko Paluka+ te tama tagata a Nelia e fakamalosi ne ia koe ke ‵teke mai ki a matou ke tuku atu matou ki tino Kaletaia, ke tamate matou io me ave fakapagota matou ki Papelonia.”+

4 Tenā ne seki faka‵logo ei a Ioananu te tama tagata a Kalia mo takitaki kautau katoa mo tino katoa ki te leo o Ieova ke ‵nofo i te fenua o Iuta. 5 I lō te fai penā, ne puke ne Ioananu te tama tagata a Kalia mo takitaki kautau katoa a te ‵toega o tino Iuta kolā ne ‵foki mai o ‵nofo i te fenua o Iuta mai i atufenua kolā ne fakasalalau atu latou ki ei.+ 6 Ne puke ne latou a tāgata, fāfine, tama‵liki, mo tama fāfine a te tupu, mo tino katoa kolā ne tuku ne Nepusalatana+ te pule o leoleo ki a Ketalia+ te tama tagata a Aikamo+ te tama tagata a Safana,+ e pelā foki mo Ielemia te pelofeta mo Paluka te tama tagata a Nelia. 7 Kae ne olo atu latou ki te fenua o Aikupito, me seki faka‵logo latou ki te leo o Ieova, kae ne olo atu latou ke oko eiloa ki Tapenesa.+

8 Kae ne oko mai te fekau a Ieova ki a Ielemia i Tapenesa, ana muna: 9 “Puke i tou lima a fatu ‵lasi, kae ‵funa i te sameni o te fola puliki i te mataloa ki loto i te fale o te Falao i Tapenesa, kae ke lavea mai ne tāgata Iutaia. 10 Tenā ko fai atu ei ki a latou, ‘Konei a pati a Ieova o kautau, te Atua o Isalaelu ne fai mai: “Ko uga atu nei taku fekau ki a Nepukanesa* te tupu o Papelonia, taku tavini,+ kae ka tuku ne au tena nofogaaliki i luga o fatu konei ne ‵funa ne au, kae ka fakalasi aka ne ia tena faleie fakatupu i luga i ei.+ 11 Kae ka vau a ia ki loto o ‵ta a te fenua o Aikupito.+ So se tino e ‵tau o mate i te mala fakamataku ka mate i te mala fakamataku, so se tino e ‵tau o ave fakapagota ka ave fakapagota, so se tino e ‵tau o mate i te pelu ka mate eiloa i te pelu.+ 12 Kae ka ‵sunu ne au a fale o atua o Aikupito ki te afi,+ kae ka ‵sunu ne ia kae ave fakapagota latou. Ka pelu fakatamilo ne ia te fenua o Aikupito i tena foitino e pelā eiloa mo te tausi mamoe e pelu fakatamilo tena gatu i a ia, kae ka fano a ia mai i konā mo te filemu.* 13 Kae ka ofa likiliki ne ia a pou o Peta-semese* i te fenua o Aikupito, kae ka ‵sunu ne ia a fale* o atua o Aikupito ki te afi.”’”