Ielemia
50 Ko pati a Ieova ne fai e uiga ki Papelonia,+ e uiga ki te fenua o tino Kaletaia, e auala i a Ielemia te pelofeta:
2 “Folafola atu ki atufenua kae fakasalalau atu.
Fakatu aka se fakailoga kae fakasalalau atu.
Ke mo a ma ‵funa se mea!
Fai atu, ‘A Papelonia ko oti ne puke.+
A Pele ko oti ne fakamasiasigina.+
A Melotaka ko mataku.
Ana mea fakatusa ko oti ne fakamasiasigina.
Ana tupua fakatakalia‵lia* ko ma‵taku.’
3 Me e isi se atufenua ne taua mai ki ei mai i te feitu ki mātū.+
E fai ei tena fenua e pelā me se mea fakamataku;
E seai se tino e nofo i loto i ei.
A tino mo manu fe‵kai ko oti ne ‵tele;
Ko olo kea‵tea latou.”
4 “I aso konā kae i te taimi tenā,” ko te folafolaga a Ieova, “ka o‵mai fakatasi a tino o Isalaelu mo tino o Iuta.+ Ka ‵tagi mautuutu latou i te taimi e sa‵sale ei latou,+ kae ka ‵sala fakatasi atu latou ki a Ieova te lotou Atua.+ 5 Ka fesili atu latou e uiga ki te auala ki Siona, mo olotou mata e ‵fuli atu ki te feitu tenā,+ olotou muna, ‘O‵mai ‵tou olo o ‵kau fakatasi mo Ieova i se feagaiga ki te se-gata-mai telā ka se mafai o puli.’+ 6 Oku tino ko fai pelā me se lafu mamoe o mamoe kolā ko ‵galo.+ Ko olotou tausi mamoe eiloa ne fai ne latou ke takase‵se a latou.+ Ne takitaki ne latou a mamoe ki luga i mauga, kae olo atu mai te mauga e tasi ki te tamā mauga. Ko puli i a latou te lotou koga malōlō. 7 Ne kai latou ne tino katoa kolā ne maua ne latou a latou,+ kae ne fai aka olotou fili, ‘A matou e se ‵se, me ne agasala latou ki a Ieova, ki te koga e nofo i ei te amiotonu mo te fakamoemoega o olotou tupuga, ko Ieova.’”
8 “‵Tele kea‵tea mai i Papelonia,
Olo kea‵tea mai i te fenua o tino Kaletaia,+
Kae ke fai pelā mo manu kolā e olo atu i mua o te lafu mamoe.
9 Me ko faka‵tu aka ne au a tino kae aumai latou ke taua atu ki Papelonia
Se fakapotopotoga o atufenua ma‵losi mai i te fenua i te feitu ki mātū.+
Ka o‵mai latou e pelā me ne tino e olo atu i se taua o taua atu ki a ia;
Kae ka puke a ia i konā.
A olotou matasana e pelā eiloa mo matasana a se toa mafi
E fakamāfua ei te ‵galo atu o tama‵liki;+
E se ‵foki mai latou e aunoa mo ne ikuga.
10 A Kaletaia ka fai pelā me se mea ne maua i te taua.+
A tino katoa kolā e puke olotou mea mai i ei ka lotoma‵lie katoatoa,”+ ko te folafolaga a Ieova.
11 “Me i a koutou ne fia‵fia faeloa,+ a koutou ne ‵lifu faeloa
I te taimi ne ‵fao ei ne koutou a toku tofi.+
Me i a koutou ne evaeva faeloa e pelā me se tamā pulumakau i mouku,
Kae ne ‵tagi faeloa koutou e pelā me ne solofanua tāgata.
12 A tou mātua ko oti ne fakamasiasigina.+
A ia telā ne fanau ne ia koe ko oko eiloa i te fanoanoa.
Kiloke! Ko ia te ‵toe tino fatauva i atufenua katoa,
Se koga lavaki e seai ne vai i ei mo se toafa.+
13 Ona ko te kaitaua o Ieova ka seai eiloa ne tino e ‵nofo i ei;+
Ka fakaseai katoatoa atu eiloa a ia.+
So se tino e ui atu i Papelonia ka kilo atu mo te ofo ki ei
Kae fakatauemu atu ki ei ona ko ana mala katoa.+
14 O‵mai o taua ki Papelonia i ana feitu katoa e pelā me olo atu koutou ki se taua,
A koutou katoa kolā e ofe te kausana.
15 Kalaga atu i te kalaga o te taua ki a ia i ana feitu katoa.
Ko oti ne fakamalalo a ia.
Ke taui ma sui atu koutou ki a ia.
Fai atu ki a ia a mea kolā ko oti ne fai ne ia.+
16 Ave kea‵tea te tino ‵toki fuaga mai i Papelonia
Mo te tino e puke i te naifi ‵kati saito i te taimi e ‵kati ei fuataga.+
Ona ko te pelu saua, a tino taki tokotasi ka ‵foki ki olotou tino tonu,
A tino taki tokotasi ka ‵tele ki olotou fenua tonu.+
17 “A tino Isalaelu ne mamoe ko salalau valevale.+ Ko oti ne fakasalalau latou ne leona.+ Muamua la, ka kai latou ne te tupu o Asulia;+ ka oti ko gugu ei olotou ivi ne te tupu o Papelonia ko Nepukanesa.*+ 18 Tela la, konei a pati a Ieova o kautau, te Atua o Isalaelu ne fai mai: ‘Ka fakasala nei ne au a te tupu o Papelonia mo tena fenua i te auala ne fakasala ei ne au a te tupu o Asulia.+ 19 Kae ka fakafoki mai ne au a Isalaelu ki ana laukele moukuā,+ kae ka kaikai a ia i Kalamelu mo Pasana,+ kae ka makona a ia i luga i mauga o Efalaima+ mo Kileata.’”+
20 “I aso konā mo te taimi tenā,” ko te folafolaga a Ieova,
“Ka salasala atu ei ki te mea ‵se a Isalaelu,
Kae ka seai eiloa,
Kae ka se maua atu a agasala a Iuta,
Me ka fakamagalo ne au a latou kolā ne faka‵toe mai ne au.”+
21 “Fano ki luga o taua ki te fenua o Melataima kae taua atu ki tino e ‵nofo i Pekota.+
Ke tamate atu latou kae fakaseai katoatoa atu,” ko te folafolaga a Ieova.
“Fai a mea katoa ne fakatonu atu ne au ki a koe.
22 E isi se kalaga o te taua i te fenua
Se fakalavelave lasi ‵ki.
23 A te samala o te lalolagi kātoa ko oti ne tuki ki lalo kae ‵fati!+
A Papelonia ko fai pelā me se mea fakamataku ki atufenua!+
24 Ko oti ne fakatakato ne au se malei mō koe, kae ko oti ne ‵poa aka koe, e Papelonia,
Kae e se iloa ne koe.
Ne maua aka a koe kae puke,+
Me i a koe ne ‵teke ki a Ieova.
25 A Ieova ko oti ne ‵tala ana fale ‵teu koloa,
Kae e aumai ki tua ne ia a meatau o tena kaitaua.+
Me i te Aliki Sili, ko Ieova o kautau, e isi sena galuega
I te fenua o tino Kaletaia.
26 O‵mai o taua ki ei mai i koga ‵mao.+
‵Tala aka ana fale ‵teu saito.+
Fakaputu aka a ia e pelā me ne fakaputuga saito.
Fakaseai katoatoa atu a ia.+
Ke seai eiloa sena tino e ‵toe mai.
27 Tamate atu ana tamā pulumakau katoa;+
Ke na ave ifo latou ki te koga e tamate ei.
Ka‵lofa eiloa i a latou, me ko oko mai te lotou aso,
Ko te lotou taimi o te fakasalaga!
28 E lagona atu te ‵tagi o latou kolā e ‵tele kea‵tea,
Ko latou kolā ko ‵sao mai i te fenua o Papelonia,
Ke folafola atu i Siona a te taui ma sui a Ieova te ‵tou Atua,
Ko te taui ma sui mō tena faletapu.+
29 Fai atu ki tino sana matasana ke taua atu ki Papelonia,
Ko latou katoa kolā e ofe te kausana.+
‵Nofo fakatamilo atu i a ia; fai ke seai eiloa se tino e sao.
Toe ‵togi atu ki a ia e ‵tusa mo ana mea ne fai.+
Fai atu ki a ia a mea kolā ko oti ne fai ne ia.+
Me ne fai ne ia a mea fakamata‵mata o ‵teke atu ki a Ieova,
O ‵teke atu ki te Atua Tapu o Isalaelu.+
30 Tela la, ka ‵siga ana tamataene i loto i ana malae,+
Kae ko ana sotia katoa ka fakaseai* atu i te aso tenā,” ko te folafolaga a Ieova.
31 “Kiloke! Au e ‵teke ki a koe,+ e te tino ‵teke,”+ ko te folafolaga a te Aliki Sili, ko Ieova o kautau,
“Me i tou aso e ‵tau eiloa o oko mai, ko te taimi telā ka fakasala ei ne au koe.
32 A koe e te tino ‵teke ka pakū kae siga,
Kae seai se tino ke fakatu aka ne ia koe.+
Kae ka ‵sunu ne au ou fakai ki te afi,
Kae ka ‵ka i ei a mea katoa i ou tafa.”
33 Konei a pati a Ieova o kautau ne fai mai:
“A tino o Isalaelu mo Iuta ko fakasauagina,
Kae ko tino katoa kolā ne puke fakapagota ne latou a latou ne taofi ‵mau atu ki a latou.+
Ne ita ma tiaki atu latou ke olo.+
34 Kae ko te Atua telā e ‵tau o toe ‵togi mai ne ia latou e malosi.+
A tena igoa ko Ieova o kautau.+
Ka fesoasoani atu eiloa a ia ki te lotou tagi,+
Ko te mea ke maua ne te fenua se malōlōga+
Kae ke avatu te manavase ki tino e ‵nofo i Papelonia.”+
35 “E isi se pelu telā e ‵teke atu ki tino Kaletaia,” ko te folafolaga a Ieova,
“E ‵teke atu ki tino e ‵nofo i Papelonia kae ‵teke atu ki ana pelenise mo ana tino ‵poto.+
36 E isi se pelu telā e ‵teke atu ki tino e fai‵pati ki mea sē aoga,* kae ka ga‵sue latou mo te va‵lea.
E isi se pelu telā e ‵teke atu ki ana toa ‵mafi, kae ka ma‵taku latou.+
37 E isi se pelu telā e ‵teke atu ki olotou solofanua mo olotou kaliota tau,
Kae ‵teke atu ki tino valevale i loto i a ia,
Kae ka fai latou e pelā me ne fāfine.+
E isi se pelu telā e ‵teke atu ki ana koloa, kae ka ‵fao olotou mea.+
38 E isi se fakamaseiga e fai ki ana vai, kae ka ‵masa a vai konā.+
Ona ko te mea se fenua o tupua faite,+
Kae ona ko olotou fakaasiga fakama‵taku, e gasue‵sue faeloa latou mo te va‵lea.
39 Tela la, a manu o te toafa ka ‵nofo fakatasi mo manu tagi‵tagi,
Kae ka ‵nofo i loto i a ia a manu ko osetelite.+
Ka se toe ai eiloa ne tino e ‵nofo i ei,
Io me ka toe fai a ia mo koga ‵nofo i kautama katoa.”+
40 “E pelā eiloa mo te fakatakavalega ne te Atua a Sotoma mo Komolo+ mo fakai i lā tafa,”+ ko te folafolaga a Ieova, “ka seai se tino e nofo i konā, kae ka seai eiloa se tino e nofo tumau i konā.+
41 Kiloke! E isi ne tino e o‵mai mai i te feitu ki mātū;
Ka fakatu aka se atufenua lasi mo tupu sili+
Mai i toe koga ‵mao o te lalolagi.+
42 E tauave ne latou a kausana mo tao.+
E amio fakasaua latou kae seai se lotou alofa fakamagalo.+
A te ‵gulu o latou e pelā mo te ‵gulu o te tai,+
Māfai ko ‵tele i olotou solofanua.
E pelā me se tagata e tokotasi, e fakalaina latou e pelā me olo ki se taua o taua atu ki a koe, e te tama fafine o Papelonia.+
Ne oko ki a ia te mafatia,
Te logo‵mae e pelā me se fafine ko fanau.
44 “Kiloke! Ka vau se tino o taua mai ki laukele moukuā kae tokagamalie e pelā me se leona mai i togavao ma‵tolu i tafa o te Iolitana, kae i se taimi vave ka fai ne au latou ke ‵tele kea‵tea mai i a ia. Kae ka fakasopo aka ne au te tino filifilia ke pule atu ki a ia.+ Ko oi te tino e ‵pau mo au, kae ko oi foki e toa mai ki a au? Ko oi te tausi mamoe e mafai o tu i oku mua?+ 45 Tela la, faka‵logo mai e tino, ki te fakaikuga ko oti ne fai ne Ieova ki Papelonia+ mo te mea ne mafaufau a ia ke fakaoko atu ki te fenua o tino Kaletaia.
E mautinoa eiloa me ka toso kea‵tea a tamā mamoe o te lafu.
Ka fai ne ia te lotou koga ‵nofo ke seai ne mea i ei ona ko latou.+
46 Ka galulu te lalolagi i te ‵tagi o te pukega o Papelonia,
Kae ka lagona atu se kalaga i atufenua.”+