Ielemia

41 I te fitu o masina, ne vau ei a Isamaeli+ te tama tagata a Netania te tama tagata a Elisama, telā se tino mai te gafa o te tupu* kae se tokotasi o tāgata lauiloa a te tupu, fakatasi mo nisi tāgata e tokosefulu ki a Ketalia te tama tagata a Aikamo i Mesepa.+ I te taimi ne ‵kai fakatasi ei latou i se ‵kaiga i Mesepa, 2 a Isamaeli te tama tagata a Netania mo tāgata e tokosefulu kolā ne olo fakatasi atu mo ia ne ta ne latou ki te pelu a Ketalia te tama tagata a Aikamo te tama tagata a Safana. Tenā ne tamate ei ne ia a te tino telā ne ‵tofi aka ne te tupu o Papelonia ke pule i te fenua. 3 Ne ‵ta foki ne Isamaeli a tino Iutaia katoa kolā ne ‵nofo mo Ketalia i Mesepa, e pelā foki mo sotia Kaletaia kolā ne ‵nofo atu i konā.

4 I te lua o aso mai tua o te tamatega o Ketalia, kae koi tuai o iloa ne se tino te mea tenā, 5 ne o‵mai a tāgata e toko 80 mai i Sekema,+ mai i Sailo+ kae mai i Samalia.+ Ne ‵vele olotou talafa, ne saesae olotou gatu, ne katikati olotou foitino,+ kae puke mai i olotou lima a taulaga meakai mo pulu lipano+ ke avatu ki te fale o Ieova. 6 Tenā ne fanatu ei a Isamaeli te tama tagata a Netania mai i Mesepa o fakafetaui atu ki a latou, kae tagi i te taimi ne sasale atu ei a ia. I te taimi ne fetaui ei a ia mo latou, ne fai atu a ia ki a latou: “O‵mai ki a Ketalia te tama tagata a Aikamo.” 7 Kae i te lotou o‵maiga ki loto i te fakai, ne tamate latou ne Isamaeli te tama tagata a Netania mo ana tāgata kae ‵pei atu latou ki loto i te vaikeli.

8 Kae e isi ne tāgata e tokosefulu i a latou kolā ne fai atu ki a Isamaeli: “Sa tamate matou, me ne ‵funa ne matou a saito, kalite, sinu mo hani i te vao.” Tenā ne seki tamate ei ne ia latou fakatasi mo olotou taina. 9 Ne ‵pei ne Isamaeli a foitino ‵mate katoa o tāgata kolā ne tamate ne ia ki loto i te vaikeli lasi, telā ne faite ne te Tupu ko Asa ona ko te tupu o Isalaelu ko Paasa.+ Tenei te vaikeli ne faka‵fonu ne Isamaeli te tama tagata a Netania ki tāgata kolā ne tamate.

10 Ne ave fakapagota ne Isamaeli a te ‵toega o tino i Mesepa,+ e aofia i ei a tama fāfine a te tupu mo tino katoa kolā ne ‵toe i Mesepa, kolā ne tuku ne Nepusalatana te pule o leoleo ke tausi ne Ketalia+ te tama tagata a Aikamo. Ne ave fakapagota ne Isamaeli te tama tagata a Netania a latou konei kae olo atu ki te suā feitu ki tino Amoni.+

11 I te taimi ne ‵logo ei a Ioananu+ te tama tagata a Kalia mo takitaki kautau katoa kolā ne ‵nofo mo ia e uiga ki mea matagā katoa ne fai ne Isamaeli te tama tagata a Netania, 12 ne puke ne latou a tāgata katoa kae olo atu o taua ki a Isamaeli te tama tagata a Netania, kae ne maua ne latou a ia i tafa o vai ‵lasi i Kipeona.

13 A tino katoa kolā ne ‵nofo mo Isamaeli ne fia‵fia i te laveaga ne latou a Ioananu te tama tagata a Kalia fakatasi mo takitaki kautau katoa kolā ne o‵mai mo ia. 14 Tenā ne ‵fuli ei a tino katoa kolā ne ave fakapagota ne Isamaeli mai i Mesepa+ kae toe ‵foki mo Ioananu te tama tagata a Kalia. 15 Kae ko Isamaeli te tama tagata a Netania mo ana tāgata e tokovalu ne ‵sao mai i a Ioananu kae olo atu ki tino Amoni.

16 A Ioananu te tama tagata a Kalia mo takitaki kautau katoa kolā ne olo atu mo ia ne puke ne latou a te ‵toega o tino mai i Mesepa, ko tino kolā ne faka‵sao ne latou mai i a Isamaeli te tama tagata a Netania i te otiga ne tamate ne ia a Ketalia+ te tama tagata a Aikamo. Ne faka‵foki mai ne latou a tāgata, sotia, fāfine, tama‵liki mo ofisa mai i Kipeona. 17 Tenā ne olo atu ei latou o ‵nofo i se kogā fenua o Kimeama i tafa o Peteleema,+ mo te fakamoemoega ke olo ki Aikupito+ 18 ona ko tino Kaletaia. Me i a latou e ma‵taku i tino konā, me ne tamate ne Isamaeli te tama tagata a Netania a Ketalia te tama tagata a Aikamo, telā ne ‵tofi aka ne te tupu o Papelonia ke pule i te fenua.+