Numela
4 Ne faipati atu a Ieova ki a Mose mo Alona, ana muna: 2 “E ‵tau o lau aka te aofaki o tama tāgata a Koate+ mai i tino Levi, i olotou kāiga mo kāiga i olotou tamana, 3 ko latou katoa mai te 30+ ki te 50 tausaga te ma‵tua+ kolā e aofia i te potukau ne ‵tofi aka ke ga‵lue i te faleie o maopoopoga.+
4 “Tenei te taviniga a tama tāgata a Koate i te faleie o maopoopoga.+ Se mea telā e tafasili i te tapu: 5 E ‵tau o ulu atu a Alona mo ana tama tāgata ki loto i ei i te taimi ko fakatoka ei a tino o tiaki te koga tenā, kae ke tuku ifo a ‵pui laugatu+ kae ufi ki ei te pusa+ o te Feagaiga. 6 Ka pulou ne latou ki se pa‵kili o te takesa kae ‵fola atu i luga i ei se laugatu lanu moana, kae faulu atu ana amo+ ki loto i ei.
7 “Ka ‵fola atu foki ne latou se laugatu lanu moana i luga i te taipola o falaoa+ ne ofo atu ki te Atua, kae tuku atu ki luga i ei a tifa, ipu, pōla, mo tiā o te taulaga meainu;+ e ‵tau o tuku faeloa i luga i ei a te falaoa+ mō taulaga. 8 Ka ‵fola atu foki ne latou se filo lanu kula i luga i ei kae ufi atu ki se pa‵kili o te takesa kae faulu atu ana amo+ ki loto i ei. 9 Tenā ko puke ei ne latou se laugatu lanu moana kae pulou atu ki ei te tugamoli,+ fakatasi mo ana moli,+ ana sikofi, ana mea tuku malala ‵ka,+ mo mea katoa kolā e utu ki ei a sinu kolā e fakaaoga mō te faka‵kaga o moli. 10 Ka pelu aka ne latou a te mea tenā mo ana meāfale katoa ki loto i se pa‵kili o te takesa kae tuku ki luga i se lakau telā e ave sāle. 11 Kae e ‵tau o ‵fola ne latou se laugatu lanu moana i luga i te fatafaitaulaga aulo,+ ufi atu ki se pa‵kili o te takesa, kae faulu ana amo+ ki loto i ei. 12 Tenā ko puke ei ne latou a meāfale+ katoa kolā e fakaaoga faeloa ne latou i te lotou galuega i te koga tapu, kae tuku atu ki loto i se laugatu lanu moana ko ufi atu ei ki se pa‵kili o te takesa, kae tuku ki luga i se lakau telā e ave sāle.
13 “E ‵tau o asu kea‵tea ne latou a lefu* mai te fatafaitaulaga+ kae ‵fola atu se laugatu vulu lanu violeta i luga i ei. 14 E ‵tau o tuku ne latou ki luga i ei ana meāfale katoa kolā e fakaaoga māfai ko ga‵lue latou i te fatafaitaulaga: ko mea tuku malala ‵ka, ko foka, ko sevolo mo pōla, ko meāfale katoa o te fatafaitaulaga;+ kae e ‵tau o ‵fola ne latou se pa‵kili o te takesa ki luga i ei kae faulu atu ana amo+ ki loto i ei.
15 “E ‵tau mo Alona mo ana tama tāgata o fakaoti te ufiga o te koga tapu+ mo meāfale katoa o te koga tapu i te taimi ka olo atu ei latou. Tenā ko o‵mai ei a tama tāgata a Koate o sau a mea konā,+ kae e se ‵tau eiloa o fakapa‵tele latou ki te koga tapu i a latou ma ‵mate.+ A mea konei ko te tiute* o tama tāgata a Koate e ‵tusa mo galuega e fai i te faleie o maopoopoga.
16 “A Eleasalo+ te tama tagata a Alona te faitaulaga, e ‵tau o onoono ki sinu e faka‵ka ei a moli,+ mea ma‵nogi,+ te taulaga meakai masani, mo te sinu mo faū+ a tino. E onoono a ia ki te faleie tapu kātoa mo mea katoa i loto i ei, e aofia i ei te koga tapu mo ana meāfale.”
17 Ne toe faipati atu a Ieova ki a Mose mo Alona, ana muna: 18 “Ke mo a eiloa e ‵kati kea‵tea a te matakāiga o kāiga o tino Koate+ mai i tino Levi. 19 Kae fai te mea tenei mō latou ko te mea ke tumau latou i te ola kae ke se ‵mate ona ko te lotou fakapili‵pili atu ki mea tafasili i te tapu.+ Ka olo atu a Alona mo ana tama tāgata ki loto kae ‵tofi aka a galuega a latou taki tokotasi mo mea a latou e ‵tau o amo. 20 E se ‵tau mo latou o ‵mai ki loto kae ‵kilo ki mea tapu ke oko ki te ‵kilo fakavave atu ki ei, i a latou ma ‵mate.”+
21 Tenā ne faipati atu ei a Ieova ki a Mose, ana muna: 22 “E ‵tau o lau aka te aofaki o tino Kelesona+ i kāiga i olotou tamana mo olotou kāiga. 23 E ‵tau o fakamau ne koe a igoa o latou mai te 30 ki te 50 tausaga te ma‵tua, kolā e aofia i te potukau ne ‵tofi aka ke tavini atu i te faleie o maopoopoga. 24 Konei a mea ne ‵tofi aka ke tausi kae amo ne tino o te kāiga o Kelesona:+ 25 Ka amo ne latou a laugatu o te faleie tapu,+ te faleie o maopoopoga, ana ufi mo te ufi telā ne faite mai pa‵kili o te takesa telā e pulou i luga i ei,+ te ‵pui laugatu o te mataloa o te faleie o maopoopoga,+ 26 ko ‵pui laugatu kolā e tau‵tau ki lalo o te koga ateatea,+ te ‵pui laugatu o te mataloa o te koga ateatea+ telā e fakatamilo ne ia te faleie tapu mo te fatafaitaulaga, olotou uka mo meāfale mo mea katoa kolā e fakaaoga i te taviniga tenā. Tenei eiloa te lotou galuega e ‵tau o fai. 27 A te taviniga mo amoga katoa a tino Kelesona+ e ‵tau o onoono ki ei a Alona mo ana tama tāgata; e ‵tau o ‵tofi ne koe a amoga katoa konei e pelā me ko te lotou tiute. 28 Tenei te taviniga e ‵tau o fai ne kāiga o tino Kelesona i te faleie o maopoopoga,+ kae ko olotou tiute e ‵tau o fai mai lalo i te takitakiga a Itamala+ te tama tagata a Alona te faitaulaga.
29 “E pelā mo tama tāgata a Melali,+ e ‵tau mo koe o fakamau olotou igoa i olotou kāiga mo kāiga i olotou tamana. 30 E ‵tau o fakamau ne koe a latou mai te 30 ki te 50 tausaga te ma‵tua, ko latou katoa kolā e aofia i te potukau ne ‵tofi aka ki te taviniga i te faleie o maopoopoga. 31 Konei a mea e ‵tau o amo+ ne latou e ‵tusa mo te lotou taviniga i te faleie o maopoopoga: ko felemi laupapa+ o te faleie tapu, ana lakau faka‵lava,+ ana pou,+ ana lagolago,+ 32 ko pou+ kolā e fakatamilo i te koga ateatea, olotou lagolago,+ olotou pine+ mo olotou uka fakatasi mo mea faigaluega katoa o te faleie mo galuega katoa kolā e fai ki ei a mea konei. E ‵tau o fai atu ne koe ki a latou a igoa o mea kolā e ‵tau o amo ne latou. 33 Tenei te auala e ‵tau ei o tavini atu a kāiga o tama tāgata a Melali+ i te faleie o maopoopoga, mai lalo i te takitakiga a Itamala te tama tagata a Alona te faitaulaga.”+
34 Tenā ne fakamau ei ne Mose mo Alona mo takitaki+ o te fakapotopotoga a igoa o tama tāgata o tino Koate+ i olotou kāiga mo kāiga i olotou tamana, 35 ko latou katoa mai te 30 ki te 50 tausaga te ma‵tua kolā e aofia i te potukau ne ‵tofi aka ki te taviniga i te faleie o maopoopoga.+ 36 A te aofaki o latou kolā ne fakamau olotou igoa i olotou kāiga e toko 2,750.+ 37 Ne fakamau a igoa o latou konei mai i kāiga o tino Koate, ko latou katoa kolā e tavini atu i te faleie o maopoopoga. Ne fakamau ne Mose mo Alona olotou igoa i te fakatonuga a Ieova e auala i a Mose.+
38 A tama tāgata a Kelesona+ ne fakamau olotou igoa i olotou kāiga mo kāiga i olotou tamana, 39 ko latou katoa mai te 30 ki te 50 tausaga te ma‵tua kolā e aofia i te potukau ne ‵tofi aka ki te taviniga i te faleie o maopoopoga. 40 A te aofaki o latou kolā ne fakamau olotou igoa i olotou kāiga mo kāiga i olotou tamana e toko 2,630.+ 41 Tenei te fakamauga o igoa o kāiga o tama tāgata a Kelesona, ko latou katoa kolā e tavini atu i te faleie o maopoopoga. Ne fakamau olotou igoa ne Mose mo Alona i te fakatonuga a Ieova.+
42 A tama tāgata a Melali ne fakamau olotou igoa i olotou kāiga mo kāiga i olotou tamana, 43 ko latou katoa mai te 30 ki te 50 tausaga te ma‵tua kolā e aofia i te potukau ne ‵tofi aka ki te taviniga i te faleie o maopoopoga.+ 44 A te aofaki o latou kolā ne fakamau olotou igoa i olotou kāiga e toko 3,200.+ 45 Tenei te fakamauga o igoa o kāiga o tama tāgata a Melali, kolā ne fakamau ne Mose mo Alona i te fakatonuga a Ieova e auala i a Mose.+
46 Ne fakamau ne Mose mo Alona mo takitaki o tino Isalaelu a tino Levi katoa konei i olotou kāiga mo kāiga i olotou tamana; 47 ko latou mai te 30 ki te 50 tausaga te ma‵tua, kae ne ‵tofi aka a latou katoa ke tavini kae amo a mea e ‵tusa mo galuega e fai i te faleie o maopoopoga.+ 48 A te aofaki o latou kolā ne fakamau olotou igoa e toko 8,580.+ 49 Ne fakamau olotou igoa i te fakatonuga a Ieova e auala i a Mose, ko tino taki tokotasi e ‵tusa mo tena galuega mo tena amoga; ne fakamau olotou igoa e ‵tusa mo te fakatonuga a Ieova ki a Mose.