Iopu
4 Tenā ne tali atu ei a Elifasa+ te tino Timanu:
2 “Kafai e taumafai se tino o faipati atu ki a koe, e a, ka se lava eiloa tou kufaki?
Me ko oi la e mafai o taofi ne ia tena fia faipati?
3 E tonu, ko oti ne fakatonutonu ne koe a tino e tokouke,
Kae ne masani o fakamalosi ne koe a lima o tino vāi‵vai.
4 So se tino telā ne siga e fakatu aka ne au pati,
Kae e fakamalosi ne koe a tino kolā ko vāi‵vai olotou tulivae.
5 Kae nei, ko tupu te mea tenā ki a koe, kae ko koe e manavase malosi* i ei;
E patele atu ki a koe, kae ko koe e fanoanoa i ei.
6 E a, e se fai ne tou āva ki te Atua ke maua ne koe te loto talitonu?
E a, e se fai ne tou fai mea tonu+ ke maua ne koe te fakamoemoega?
7 Fakamolemole, ke masaua: Ko oi te tino e seai sena ‵se ne mate atu?
Anafea ne fakaseai atu ei a te tino fai mea tonu?
8 A te mea telā ne lavea ne au me i tino e fakamalū ne latou te laukele o mea ma‵sei
Mo latou kolā ne ‵toki ne latou a fakalavelave e ‵pau eiloa te mea ka toe tau ne latou.
9 E auala i te mānava o te Atua ka ‵mate ei latou,
Kae e auala i tena kaitaua lasi ka palele atu ei latou.
10 E ‵gulu te leona, kae tagi te tamā leona,
Kae ko nifo o leona ma‵losi e ‵fati eiloa.
11 E mate te leona me ko seai se manu mo ana kai,
Kae ko tama a te leona ko salalau valevale.
12 Ne oko mai se fekau ki a au i se auala ‵funa,
Kae ne oko mai tena musumusuga ki toku taliga.
13 Ona ko te manavase i fakaasiga o te po,
I te taimi e ‵moe pala‵pala ei a tāgata,
14 Ne oko mai te polepole i te mataku ki a au,
Kae ‵fonu i ei oku ivi katoa i te mataku.
15 E isi se mea* ne fakaseke ifo i mua o oku mata;
Kae ne ‵fiti ei a kili o toku foitino.
16 Ne tu te mea tenā,
Kae e se lavea ‵lei ne au ana foliga.
E isi se mea ne tu mai i mua o oku mata;
Ne filemu a mea, tenā ne lagona ei ne au se leo:
17 ‘E a, e mafai o sili atu te amiotonu o se tagata i lō te Atua?
E a, e mafai o ‵ma atu se tagata i lō te Tino ne Faite ne ia a ia?’
18 Kiloke! E seai sena fakatuanaki ki ana tavini,
Kae e ‵sala a ia ki mea ‵se a ana agelu.*
19 Kae sili atu la i ei ko latou kolā e ‵nofo i fale e faite ki kele,
Kae ko te lotou fakavae e tu i te ‵pefu,+
Kae faigofie o tuki palapala e pelā me se kaveau!*
20 E tuki mo‵momo latou mai te tafataeao ke oko ki te afiafi;
E fakaseai atu latou ki se-gata-mai, kae seai se tino e iloa ne ia.
21 E a, e se fai latou e pelā me se faleie telā ne ‵futi ke tō tena uka?
E ‵mate latou e aunoa mo te poto.