Ielemia
49 Ki tino Amoni,+ konei a pati a Ieova ne fai mai:
“E a, e seai ne tama tāgata a Isalaelu?
E a, e seai sena sui?
Kaia ne puke ei ne Malikama+ a Kato?+
Kae kaia e ‵nofo ei ana tino i fakai o Isalaelu?”
2 “‘Tela la, kiloke! ka oko mai a aso,’ ko te folafolaga a Ieova,
‘Kae ka fai ne au ke tagi te fakailoga o te taua ke lagona mai i Lāpa+ te fakai o tino Amoni.+
Ka fai a ia mo koga maluga e seai ne mea i ei,
Kae ko fakai i ana tafa ka ‵sunu ki te afi.’
‘Kae ka puke ne Isalaelu a tino kolā ne puke ne latou tena fenua,’+ ko pati a Ieova.
3 ‘Tagi fanoanoa, e Hesepono, me ko oti ne fakamasei a Ai!
‵Tagi, koutou e fakai fo‵liki o Lāpa.
‵Pei ki gatu lautaga.
‵Tagi fanoa‵noa kae oloolo valevale i koga e ‵tu i ei a lulu fatu,
Me i a Malikama ka ave fakapagota,
Fakatasi mo ana faitaulaga mo ana pelenise.+
4 Kaia e fai‵pati fakamata‵mata ei koutou e uiga ki vanu,
E uiga ki te ‵tafe mai o tou koga laugatasi, e te tama fafine sē fakamaoni,
Telā e talitonu ki ana koloa
Kae fai aka: “Ko oi ka vau o taua mai ki a au?”’”
5 “‘Ko aumai nei ne au se mea fakamataku ki luga i a koe,’ ko te folafolaga a te Aliki Sili, ko Ieova o kautau,
‘Mai i a latou katoa kolā e fakatamilo ne latou koe.
A koe ka fakasalalau atu ki feitu katoa,
Kae ka seai se tino e fakamaopoopo mai ne ia latou kolā ne ‵tele kea‵tea.’”
6 “‘Kae mai tua ifo i ei, ka fakamaopoopo ne au a tino Amoni kolā ne puke fakapagota,’ ko te folafolaga a Ieova.”
7 Ki Etoma, konei a pati a Ieova o kautau ne fai mai:
“E a, ko seai eiloa se poto i Timanu?+
E a, ko ‵galo atu a pati fakatonutonu ‵lei mai i a latou kolā e malamalama?
E a, ko se aoga te lotou poto?
8 ‵Tele kea‵tea, toe ‵fuli mai!
Olo o ‵nofo i koga ‵poko, koutou e tino e ‵nofo i Titana!+
Me ka aumai ne au te fakalavelave ki a Esau
Māfai ko oko ki te taimi e saga atu ei au ki a ia.
9 Kafai e o‵mai a tino tau fuagavine ki a koe,
E a, ka se faka‵toe ne latou ne mea ke taetae ne tino?
Kafai e o‵mai a tino kai‵soa i te po,
Ka fakamasei fua ne latou a mea kolā e ma‵nako latou ki ei.+
10 Kae ka fai ne au ke seai ne mea a Esau e ‵toe mai.
Ka fakaasi ne au ana koga ‵muni,
Ko te mea ke se mafai a ia o ‵muni.
11 Tuku au tama‵liki kolā e seai ne olotou tamana,
Kae ka tausi ne au latou,
Kae ko au fāfine kolā ko ‵mate olotou avaga ka tali‵tonu mai ki a au.”
12 Me konei a pati a Ieova ne fai mai: “Kiloke! Kafai e ‵tau o inu ki te ipu a latou kolā ne seki fakasala ke inu ki ei, e a, e se ‵tau eiloa o fakasala koe? A koe ka fakasala eiloa, me e ‵tau mo koe o inu ki ei.”+
13 “Me ko oti au ne tauto i a au eiloa,” ko te folafolaga a Ieova, “me ka fai a Posala e pelā me se mea fakamataku,+ se mea fakamasiasi, se mea fakamasei, mo se mala; kae ko ana fakai katoa ka tumau te fakamaseiga ki ei.”+
14 Ko oti ne lagona ne au se lipoti mai i a Ieova,
E isi se sui o atufenua ko oti ne uga mai, ana muna:
“Fakamaopoopo fakatasi koutou kae o‵mai o taua ki ei;
Fakatoka mō te taua.”+
15 “Kiloke! Ko oti ne fai ne au koe ke se tāua i atufenua,
E takalia‵lia ki ei a tino.+
16 A te mataku telā ne fakamāfua ne koe ne faka‵se i ei a koe,
Ko te loto fakamaualuga o koe,
A koe telā e nofo i koga filemu o te kaupapa,
E nofo i te ‵toe mauga ma‵luga ‵ki.
E tiga eiloa ne faite tou ofaga ke maluga e pelā mo te ofaga o se aeto,
Ka tuku ifo ne au koe ki lalo mai i konā,” ko te folafolaga Ieova.
17 “Kae e ‵tau o fai a Etoma e pelā me se mea fakamataku.+ So se tino e ui atu i konā ka kilo atu mo te ofo mo te fakatauemu ona ko ana mala katoa. 18 E pelā eiloa mo te fakatakavalega o Sotoma mo Komolo mo fakai i lā tafa,”+ muna a Ieova, “ka seai se tino e nofo i konā, kae ka seai eiloa se tino e nofo tumau i konā.+
19 “Kiloke! Ka vau se tino o taua mai ki laukele moukuā kae tokagamalie e pelā me se leona+ mai i togavao ma‵tolu i tafa o te Iolitana, kae i se taimi vave ka fai ne au tou tagata ke tele kea‵tea mai i a ia. Kae ka fakasopo aka ne au te tino filifilia ke pule atu ki a ia. Ko oi te tino e ‵pau mo au, kae ko oi foki e toa mai ki a au? Ko oi te tausi mamoe e mafai o tu i oku mua?+ 20 Tela la, faka‵logo mai e tino, ki te fakaikuga ko oti ne fai ne Ieova ki Etoma mo te mea ne mafaufau a ia ke fakaoko atu ki tino e ‵nofo i Timanu:+
E mautinoa eiloa me ka toso kea‵tea a tamā mamoe o te lafu.
Ka fai ne ia te lotou koga ‵nofo ke seai ne mea i ei ona ko latou.+
21 Ona ko te logoa o te lotou pa‵kūga, ne galulu ei te lalolagi.
E isi se kalaga!
Ne lagona mai i koga ‵mao ke oko eiloa ki te Tai Kula.+
22 Kiloke! E pelā me se aeto ka fanaka a ia kae toe fakatō ifo ki lalo,+
Kae ka ‵fola ana kapakau i luga i Posala.+
I te aso tenā, a loto o toa ‵mafi o Etoma
Ka fai pelā mo te loto o se fafine telā ko fai o fanau.”
23 Ki Tamaseko:+
“A Hamata+ mo Apaata ko oti ne fakamasiasigina,
Me ne ‵logo lāua i se lipoti sē ‵lei.
Ne ma‵taku lāua.
A te tai ko manavase valevale kae e se mafai o fakafilemu aka.
24 A Tamaseko ko galo tena loto toa.
Ne mafuli a ia o tele, kae ko oko ki a ia te polepole i te mataku.
A te puapuaga mo te logo‵mae ko oko atu ki a ia,
E pelā me se fafine ka fai o fanau.
25 Ne mafai pefea o se tuku tiaki te fakai o vikiga,
Te fakai o te fiafia?
26 Me i ana tamataene ka ‵siga i loto i ana malae,
Kae ko sotia katoa ka fakaseai atu i te aso tenā,” ko te folafolaga a Ieova o kautau.
27 “Ka ‵sunu ne au a ‵pui o Tamaseko ki te afi,
Kae ka ‵ka i ei a taoa ma‵losi o Peniata.”+
28 Ki Ketala+ mo malo o Hasola, kolā ne fakatakavale ne te tupu o Papelonia ko Nepukanesa,* konei a pati a Ieova ne fai mai:
“‵Tu ki luga, olo ki luga i Ketala,
Kae fakaseai atu a tama tāgata o te feitu ki Saegala.
29 A olotou faleie mo olotou lafu mamoe ka puke kea‵tea,
Ko laugatu o olotou faleie mo olotou mea ‵lei katoa.
A olotou kamela ka ave kea‵tea,
Kae ko tino ka ka‵laga atu ki a latou, ‘A te mataku ko oko ki koga katoa!’”
30 “‵Tele, olo ki koga ‵mao!
Olo o ‵nofo i koga ‵poko, koutou e tino e ‵nofo i Hasola,” ko te folafolaga a Ieova.
“Me i te tupu o Papelonia ko Nepukanesa* ko oti ne fai ne ia se togafiti mō koutou,
Kae ko oti ne mafaufau ki se palani ke ‵teke atu ki a koutou.”
31 “‵Tu ki luga, olo o taua atu ki te atufenua telā e nofo filemu,
E nofo i te tokagamalie!” ko te folafolaga a Ieova.
“E seai ne ana mataloa io me ne lakau faka‵lava; e ‵nofo eiloa i a latou.
32 A olotou kamela ka ‵fao kea‵tea,
Kae ko olotou lafu manu e uke ka fai pelā me ne mea ne maua i te taua.
Ka fakasalalau atu ne au latou ki feitu katoa,
Ko tino kolā e ‵kati olotou laulu i feitu o olotou ulu,+
Kae ka aumai ne au te fakalavelave ki a latou mai i feitu katoa,” ko te folafolaga a Ieova.
33 “Kae ko Hasola ka fai pelā me se koga ‵nofo o manu ko tiakolo,
Se fakamaseiga tumau.
Ka seai se tino e nofo i konā,
Ka seai eiloa se tino e nofo tumau i konā.”
34 Tenei te fekau a Ieova ne oko mai ki a Ielemia te pelofeta e uiga ki Elama+ i te kamataga o te pulega a te tupu o Iuta ko Setekaia:+ 35 Konei a pati a Ieova o kautau ne fai mai, ‘Ko fatifati nei ne au te kausana a Elama,+ ko te pogai* o te lotou malosi. 36 Ka aumai ne au ki Elama a matagi e fa mai i feitu e fa o te lagi, kae ka fakasalalau atu ne au ki feitu katoa konei. Ka seai eiloa se atufenua e se olo atu ki ei a tino o Elama kolā ne fakasalalau atu.’”
37 “Ka foafoa likiliki ne au a tino Elama i mua o olotou fili kae i mua o latou kolā e taumafai o tamate latou; kae ka aumai ne au te puapuaga ki luga i a latou, ko toku kaitaua telā e ‵ka pelā me se afi,” ko te folafolaga a Ieova. “Kae ka uga atu ne au te pelu i tua o latou ke oko ki te taimi ko oti ei ne fakaseai ne au latou.”
38 “Kae ka fakatu ne au toku nofogaaliki i Elama,+ kae ka fakaseai ne au i konā a te tupu mo pelenise,” ko te folafolaga a Ieova.
39 “Kae i te fakaotiotiga o aso fakaoti, ka fakamaopoopo ne au a tino Elama kolā ne puke fakapagota,” ko te folafolaga a Ieova.