Hosea
10 “A Isalaelu se vine telā ko fano o masei kae ‵fua mai eiloa ana fuataga.+
Ko te uke o ana fuataga, ko te uke foki o ana fatafaitaulaga fakaopoopo;+
Ko te ‵lei o mea e ‵fua mai i tena laukele, ko te momea aka foki o te ‵gali o ana pou lakau tapu.+
2 A olotou loto e amio ‵pelo;
Ka maua atu nei latou e ‵tau o fakasala.
E isi se tino telā ka ofa ne ia olotou fatafaitaulaga kae fakamasei olotou pou.
3 Nei la, ka fai mai latou, ‘E seai se motou tupu,+ me i a matou e se ma‵taku ki a Ieova.
Kae se a te mea e mafai o fai ne se tupu mō tatou?’
4 E fai‵pati latou ki pati sē aoga, e fai tautoga ‵loi,+ kae fai foki olotou feagaiga;
Tela la, a te fakamasinoga telā e sae aka e fai pelā me ne laina o mouku poisini i te laukele.+
5 A tino Samalia ka ma‵taku ki te tupua pulumakau o Petavene.+
Ana tino ka ‵tagi fanoanoa ona ko ia,
E penā foki ana faitaulaga o atua fakaa‵tea kolā ne fia‵fia ona ko ia mo tena ‵malu,
Me ka fano kea‵tea mai i a latou a te tupua tenā ki se isi fenua.
6 Ka aumai te mea tenā ki Asulia e pelā me se meaalofa ki se tupu sili.+
A Efalaima ka fakamasiasigina,
Kae ko Isalaelu ka masiasi ona ko pati fakatonutonu ne tautali i ei.+
8 A koga ma‵luga o Petavene,+ te agasala a Isalaelu,+ ka fakaseai atu.+
A lakau makai‵kai mo lakau tala‵tala ka ola aka i luga i olotou fatafaitaulaga.+
A tino ka fai atu ki mauga, ‘Ufi aka matou!’
Kae ki tamā mauga, ‘Ma‵toli mai ki luga i a matou!’+
9 A koe ne agasala mai i aso o Kipea,+ e Isalaelu.
Ne tumau faeloa latou i konā.
Ne seki fakatakavale* ne te taua a tama o te sē amiotonu i Kipea.
10 Ka polopoloki foki ne au latou māfai e manako au ki ei.
Kae ko tino ka maopoopo fakatasi o ‵teke atu ki a latou,
Māfai ko ‵sai fakatasi olotou mea ‵se e lua ki luga i a latou.*
11 A Efalaima se tamā pulumakau ne akoako faka‵lei telā e fiafia o solo saito,
Tenā ne fakasao ei ne au tena ua gali.
Nei la, ka fai ne au se tino ke tele i luga i Efalaima.+
A Iuta ka fakamalū te laukele; a Iakopo ka tofa ne ia.
12 ‵Toki fuaga mō koutou eiloa i te amiotonu kae tau a te alofa fakamaoni.
Fakamalū te laukele ‵lei mō koutou eiloa+
Koi isi se taimi ke salasala atu ki a Ieova,+
Ke oko ki te taimi e vau ei a ia o akoako koutou i te amiotonu.+
13 Kae ko koutou ne fakamalū te laukele i te amio masei,
Ne tau ne koutou a te sē amiotonu,+
Kae ne kai ne koutou a fuataga o te otou loi;
Me i a koutou ne tali‵tonu ki otou auala eiloa,
Ki otou toa ‵mafi e tokouke.
14 Ka isi se ‵tekeatuga ka fai ki ou tino,
Kae ka fakamaseigina eiloa otou fakai kolā ne puipui faka‵lei,+
E pelā mo te fakamaseiga e auala i a Salamanu mai te kāiga o Petapelu,
I te aso o te taua i te taimi ne tuki palapala ei a mātua i tafa o olotou tama‵liki.
15 Tenei te mea ka fai ki a koe, e Peteli,+ ona ko te matagā o au amioga ma‵sei.
I te vaveao ‵malu ka tamate atu ei a te tupu o Isalaelu.”+