Ielemia
28 I te tausaga eiloa tenā, i te kamataga o te pulega a te tupu o Iuta ko Setekaia,+ i te fa o tausaga, i te lima o masina, ne fai mai ei ki a au a te pelofeta ko Hanania te tama tagata a Asuli mai i Kipeona+ i te fale o Ieova i mua o faitaulaga mo tino katoa: 2 “Konei a pati a Ieova o kautau, te Atua o Isalaelu ne fai mai, ‘Ka ‵fati ne au a te amo a te tupu o Papelonia.+ 3 I loto i se lua tausaga ka aumai ne au ki te koga tenei a meāfale katoa o te fale o Ieova kolā ne puke ne te tupu o Papelonia ko Nepukanesa mai te koga tenei o avatu ki Papelonia.’”+ 4 “‘Kae ka fakafoki mai ne au ki te koga tenei a Iekonia+ te tama tagata a Ieoiakimo,+ te tupu o Iuta, mo tino Iuta katoa kolā ne ave fakapagota ki Papelonia,’+ ko te folafolaga a Ieova, ‘me ka ‵fati ne au a te amo a te tupu o Papelonia.’”
5 Tenā ne faipati atu ei a te pelofeta ko Ielemia ki te pelofeta ko Hanania i mua o faitaulaga mo tino katoa kolā e ‵tu i loto i te fale o Ieova. 6 Ne fai atu a Ielemia te pelofeta: “Amene!* Ke fai eiloa ne Ieova a te mea tenei! Ke fakataunu eiloa ne Ieova au pati ne ‵valo mai me ka faka‵foki mai i Papelonia ki te koga tenei a meāfale o te fale o Ieova mo tino katoa kolā ne ave fakapagota! 7 Fakamolemole, fakalogo mai ki te fekau tenei e faipati atu ne au ki ou taliga mo taliga o tino katoa. 8 I aso ko ‵teka ne masani o ‵valo atu ne pelofeta mai mua atu i a au kae mai mua foki o koe e uiga ki fenua e uke mo malo takutakua, e uiga ki taua, puapuaga mo famai. 9 Kafai e ‵valo mai se pelofeta e uiga ki te filemu kae e taunu eiloa a pati a te pelofeta tenā, ko iloa ei me ne uga mai eiloa ne Ieova a te pelofeta tenā.”
10 I konā ne puke ei ne Hanania te pelofeta a te amo kea‵tea mo te ua o te pelofeta ko Ielemia kae ‵fati ne ia.+ 11 Tenā ne fai atu ei a Hanania i mua o tino katoa: “Konei a pati a Ieova ne fai mai, ‘Ka ‵fati ne au penei a te amo a te tupu o Papelonia ko Nepukanesa mai te ua o atufenua katoa i loto i se lua tausaga.’”+ Tenā ne fano ei a Ielemia te pelofeta i tena auala.
12 Mai tua o te ‵fatiga o te amo ne Hanania te pelofeta mai i te ua o Ielemia te pelofeta, ne oko atu te fekau tenei mai i a Ieova ki a Ielemia: 13 “Fano o fai ki a Hanania, ‘Konei a pati a Ieova ne fai mai: “Ko oti ne ‵fati ne koe a amo lakau,+ kae i lō mea konā ka faite ne koe ne amo fiti.” 14 Me konei a pati a Ieova o kautau, te Atua o Isalaelu ne fai mai, ana muna: “Ka tuku atu ne au se amo fiti ki te ua o atufenua katoa konei, ke tavini atu latou ki te tupu o Papelonia ko Nepukanesa, kae e ‵tau mo latou o tavini atu ki a ia.+ Ke oko ki manu fe‵kai o te vao ka tuku atu foki ne au ki a ia.”’”+
15 Tenā ne fai atu ei a Ielemia te pelofeta ki a Hanania+ te pelofeta: “Fakamolemole fakalogo mai, e Hanania! A koe ne seki uga mai ne Ieova, kae ko oti ne fai ne koe ke tali‵tonu a tino konei ki se loi.+ 16 Tela la, konei a pati a Ieova ne fai mai, ‘Kiloke! Ko ave kea‵tea ne au koe mai i luga i te laukele. A koe ka mate i te tausaga tenei, me ne fakamalosi ne koe a te ‵tekeatuga ki a Ieova.’”+
17 Ne mate atu eiloa a Hanania te pelofeta i te tausaga tenā, i te fitu o masina.