Galuega a Apositolo

22 “Oku taina mo oku tamana, fakalogo‵logo mai ke fakamatala atu ne au a te mea telā ne tupu.”+ 2 I te lagonaga ne latou i te tagata tenei e faipati atu ki a latou i te ‵gana Epelu, ne seki logoa latou, kae fai atu a ia: 3 “Au se tino Iutaia+ telā ne fanau i Taso i Kilikia,+ kae ne akoga au i te fakai tenei mai lalo i a Kamalielu.+ Ne akoakogina au ke tausi faka‵lei ki te Tulafono a ‵tou tupuga,+ kae e loto finafinau eiloa au ki te Atua e pelā eiloa mo koutou katoa i te aso tenei.+ 4 Ne fakasaua ne au a tino kolā e ‵kau ki te Ala o te Aliki ke oko eiloa ki te mate, kae ne saisai ne au a tāgata mo fāfine kae ‵pei atu ki falepuipui,+ 5 e pelā eiloa mo te mea e molimau ki ei a te faitaulaga sili mo te kau toeaina. Ne maua foki ne au ne tusi fakamaoni mai i a latou ki taina i Tamaseko, kae ne fanatu au o saisai ke aumai a latou konā ki Ielusalema ke fakasala latou i ei.

6 “Kae koi faimalaga atu au kae ko pili atu ki Tamaseko, kāti ko te fakatutonu, ne sulu fakavave mai se mainaga mai te lagi ki a au.+ 7 Ne siga au ki lalo kae ne lagona ne au se leo e fai mai ki a au, ‘Saulo, Saulo, kaia e fakasaua ei ne koe au?’ 8 Ne tali atu au: ‘Ko oi koe, e te Aliki?’ Kae ne fai mai a ia ki a au: ‘Ko au ko Iesu te Nasaleta, telā e fakasaua ne koe.’ 9 Ne lavea ne tāgata kolā ne olo fakatasi matou a te mainaga, kae ne seki lagona* ne latou a te leo o te tino telā ne faipati mai ki a au. 10 I konā ne fai atu ei au, ‘Se a te mea e ‵tau o fai ne au, e te Aliki?’ Muna a te Aliki ki a au: ‘Tu ki luga, fano ki Tamaseko, kae ka fakailoa atu ki a koe i konā a mea katoa kolā ko oti ne fakatoka ke fai ne koe.’+ 11 Kae ona ko te mea e seai se mea ne lavea ne au ona ko te malosi o te mainaga, ne ‵taki atu ei au ki Tamaseko ne latou kolā ne olo matou.

12 “E isi se tagata e igoa ki a Anania, se tagata e mataku ki te Atua kae tausi ki te Tulafono, kae e tavae a ia ne tino Iutaia katoa i konā. 13 Ne vau a ia ki a au, tu i oku tafa kae fai mai ki a au, ‘Saulo, toku taina, ke toe ‵pula ou mata!’ I te taimi eiloa tenā ne kilo aka au ki luga, lavea ei ne au a ia.+ 14 Ana muna: ‘Ko oti koe ne filifili ne te Atua o ‵tou tupuga ko te mea ke iloa ne koe tena loto kae ke lavea ne koe a te tino amiotonu+ kae ke lagona foki ne koe tena leo, 15 me ka fai koe mo fai se molimau a ia ki tino katoa e uiga ki mea kolā ko oti ne lavea kae lagona ne koe.+ 16 Tela la, kaia e fakatalave ei koe? Tu ki luga, papatiso, kae faka‵ma au agasala+ mai te kalaga atu ki tena igoa.’+

17 “I te taimi ne foki mai ei au ki Ielusalema+ kae ‵talo i te faletapu, ne oko mai ki a au se fakaasiga 18 kae ne lavea ne au a ia e fai mai ki a au: ‘Fakavave kae fano kea‵tea mai i Ielusalema, me ka se talia ne latou tau molimau e uiga ki a au.’+ 19 Kae ne fai atu au: ‘Te Aliki, e iloa faka‵lei ne latou me ne ‵pei sāle ne au ki falepuipui kae ‵kini foki ne au a tino kolā e tali‵tonu ki a koe mai te sunako e tasi ki te suā sunako.+ 20 Kae i te taimi ne ma‵ligi ei a toto o tau molimau ko Setefano, ne tu atu eiloa au i konā kae lotomalie foki au ki te mea tenā. Ne tausi ne au a gatu o latou kolā ne tamate ne latou a ia.’+ 21 Kae ne fai mai a ia ki a au: ‘Fano, me ka uga atu ne au a koe ki atufenua ‵mao ‵ki.’”+

22 Ne fakalogo‵logo eiloa a latou ki a ia ke oko ki ana pati konā. Tenā ne ka‵laga ei latou kae fai atu: “Tamate atu te tagata tenei, me e se ‵tau o ola a ia!” 23 Ona ko te mea ko paka‵laga a tino kae fakatau peipei valevale olotou gatu kae asu atu a ‵pefu ki te ea,+ 24 ne fakatonu atu te takitaki kautau ke aumai a Paulo ki loto i te koga e ‵nofo ei a sotia kae fai atu me e ‵tau mo ia o fakamasino mai te faiga o fakasauaga, ko te mea ke iloa faka‵lei ne ia a te pogai e paka‵laga ei penei a tino ki a Paulo. 25 Kae i te taimi ne saisai ei ne latou a ia ko te mea ke ‵kini, ne fai atu a Paulo ki te ofisa o te kautau telā e tu i konā: “E a, e saoloto i te tulafono ke ‵kini ne koutou se tagata Loma* kae e seai se mea e ‵tau o sala i ei a ia?”*+ 26 I te lagonaga ne te ofisa o te kautau a te mea tenei, fano ei a ia ki te takitaki kautau o fakailoa atu ki a ia, ana muna: “Se a te mea e taumafai koe o fai? A te tagata tenei se tino Loma.” 27 Ne fanatu te takitaki kautau kae fai atu ki a ia: “Fai mai ki a au, a koe se tino Loma?” Ana muna: “Ao.” 28 Ne tali atu a te takitaki kautau: “Ne ‵togi ne au se aofaki o tupe e uke ko te mea ke fai au mo fai se tino Loma.” Ne fai atu a Paulo: “Kae ko au ne fanau mai eiloa i ei.”+

29 I konā loa ne olo fakavave kea‵tea a tino kolā ka fakamasino ne latou a ia e auala i fakasauaga; kae ne mataku a te takitaki kautau i te iloaga ne ia i a Paulo se tino Loma me ko oti ne saisai ne ia a ia ki seni.+

30 I te suā aso, ona ko te fia iloa ne ia te pogai ne ‵losi atu ei a tino Iutaia ki a ia, ne ‵tala ne ia a Paulo kae fakatonu atu ki faitaulaga pule mo sui katoa o te Sanetulini ke maopoopo mai. Tenā ne aumai ei ne ia a Paulo ki lalo kae fakatu atu a ia i olotou mua.+