Levitiko

23 Ne toe faipati atu a Ieova ki a Mose, ana muna: 2 “Faipati atu ki tino Isalaelu kae fai atu ki a latou, ‘A ‵kaiga fia‵fia+ a Ieova kolā e ‵tau o fakamanatu+ ne koutou ne fakatasiga tapu. Konei aku ‵kaiga fia‵fia:

3 “‘E ono aso e fai ei a galuega, kae ko te fitu o aso ko te sapati malōlō tenā,+ se fakatasiga tapu. E se ‵tau mo koutou o fai so se vaegā galuega i ei. A te mea tenā se sapati ki a Ieova i so se koga e ‵nofo koutou i ei.+

4 “‘Konei a ‵kaiga fia‵fia a Ieova, ko fakatasiga tapu, kolā e ‵tau o fakamanatu* ne koutou i olotou taimi tonu: 5 I te masina muamua, i te po 14 o te masina,+ i te afiafi kae koi tuai o pouli* ko te Paseka+ tenā ki a Ieova.

6 “‘I te po 15 o te masina tenei ko te ‵Kaiga Fiafia o Falaoa sē Faka‵fete ki a Ieova.+ E fitu aso e ‵tau ei o ‵kai koutou ki falaoa sē faka‵fete.+ 7 I te aso muamua ka fai ei ne koutou se fakatasiga tapu.+ E se ‵tau o fai ne koutou ne galuega ‵mafa i ei. 8 Kae e ‵tau o ofo atu ne koutou se taulaga e ofo atu i luga i te afi ki a Ieova mō aso e fitu. Ka isi se fakatasiga tapu e fai i te fitu o aso. E se ‵tau o fai ne koutou ne galuega ‵mafa i ei.’”

9 Ne toe faipati atu a Ieova ki a Mose, ana muna: 10 “Faipati ki tino Isalaelu kae fai atu ki a latou, ‘Kafai e oko koutou ki te fenua ka tuku atu ne au ki a koutou, kae ko oti ne tau ne koutou a fuataga i ei, e ‵tau o aumai ne koutou se fusiga o otou fuataga muamua+ kolā ne tau ki te faitaulaga.+ 11 Kae ka fakagasuesue ne ia te fusiga tenā ki mua mo tua i mua o Ieova ke talia ei ne ia koutou. E ‵tau o fakagasuesue ne te faitaulaga a te fusiga tenā i te aso mai tua o te Sapati. 12 I te aso e fakagasuesue ei ne koe te fusiga tenā, e ‵tau mo koe o ofo atu se tamā mamoe ‵lei, telā ko tasi tena tausaga, e pelā me se taulaga ‵sunu ki a Ieova. 13 A tena taulaga meakai e ‵tau o lua-vae-sefulu o te efa* o falaoa ‵mata kae ‵lei kolā ne palutasi mo sinu, e pelā me se taulaga e ofo atu i luga i te afi ki a Ieova kae manogi gali. A tena taulaga meainu e ‵tau o aofia i ei se tasi-vae-fa o te hini* o te uaina. 14 E se ‵tau mo koutou o ‵kai ki so se falaoa, saito ne tao, io me ne saito ‵fou ke oko mai ki te aso nei, ke oko ki te taimi e aumai ei ne koutou a te taulaga a te otou Atua. A te mea tenā se tulafono fakavae tumau mō otou kautama katoa i so se koga e ‵nofo koutou i ei.

15 “‘E ‵tau o lau ne koutou e fitu sapati mai i te aso mai tua o te Sapati, mai te aso e aumai ei a fusiga o te taulaga fakagasuesue.+ E ‵tau o fitu a vaiaso. 16 E ‵tau o lau ne koutou e 50 aso+ ke oko ki te aso mai tua o te fitu o Sapati, ko ofo atu ei ne koutou se taulaga meakai fou ki a Ieova.+ 17 E ‵tau o aumai ne koutou mai otou koga ‵nofo e lua falaoa mo fai te taulaga fakagasuesue. E ‵tau o faite ki te lua-vae-sefulu o te efa* o falaoa ‵mata kae ‵lei. E ‵tau o tao fakatasi mo mea faka‵fete,+ e pelā me ko fuataga ‵pala ‵lei muamua ki a Ieova.+ 18 Kae e ‵tau o ofo fakatasi atu ne koutou mo falaoa konā a tamā mamoe tāgata ‵lei e fitu, kolā ko takitasi tausaga te ma‵tua, mo se tamā pulumakau tagata e tasi mo mamoe e lua.+ Ka fai a mea konā mo fai te taulaga ‵sunu ki a Ieova fakatasi mo te taulaga meakai mo taulaga meainu kolā e ofo atu i luga i te afi kae manogi gali ki a Ieova. 19 Kae e ‵tau mo koutou o ofo atu se tamā kouti e tasi e pelā me se taulaga mō agasala+ mo tamā mamoe tāgata e lua kolā ko takitasi tausaga te ma‵tua, e pelā me ne taulaga ‵kai fakatasi.+ 20 Ka fakagasuesue ne te faitaulaga a mea konā ki mua mo tua fakatasi mo falaoa o fuataga ‵pala ‵lei muamua, e pelā me se taulaga fakagasuesue i mua o Ieova, fakatasi mo tamā mamoe tāgata e lua. E ‵tau o fai a mea konā e pelā me ne mea tapu ki a Ieova mō te faitaulaga.+ 21 I te aso tenei, ka fai ne koutou se faka‵pulaga+ e uiga ki te fakatasiga tapu mō koutou. E se ‵tau o fai ne koutou ne galuega ‵mafa i ei. A te mea tenā se tulafono fakavae tumau i koga katoa e ‵nofo koutou i ei i otou kautama katoa.

22 “‘Kafai ko tau ne koutou a fuataga o te otou fenua, e se ‵tau mo koutou o tau ke palele a feitu ki tua o otou fatoaga, kae ke mo a ma taetae ne koutou a mea kolā ne ‵toe mai i ei.+ E ‵tau o tuku ne koutou ma tino ma‵tiva+ mo tino fakaa‵tea.+ Au ko Ieova te otou Atua.’”

23 Ne toe faipati atu a Ieova ki a Mose, ana muna: 24 “Fai atu ki tino Isalaelu, ‘I te fitu o masina, i te po muamua o te masina, e ‵tau mo koutou o malō‵lo i te aso kātoa, se aso fakamanatu telā e fakamailoga ki te ‵tagi o te pu,+ a te mea tenā se fakatasiga tapu. 25 E se mafai o fai ne koutou ne galuega ‵mafa i ei, kae ka ofo atu ne koutou se taulaga i luga i te afi ki a Ieova.’”

26 Ne toe faipati atu a Ieova ki a Mose, ana muna: 27 “Kae i te po sefulu o te fitu o masina tenei ko te Aso o te Faka‵māga.+ E ‵tau o fai ne koutou se fakatasiga tapu i ei, kae e ‵tau o fakalogo‵mae ne koutou a koutou eiloa*+ kae ofo atu se taulaga i luga i te afi ki a Ieova. 28 E se ‵tau o fai ne koutou so se vaegā galuega i te aso tenei, me ko te aso o te faka‵māga+ mō koutou i mua o Ieova te otou Atua. 29 So se tino e se fakalogo‵mae ne ia a ia eiloa* i te aso tenei ka tapale kea‵tea* mai i ana tino.+ 30 Kae ka fakaseai ne au mai i ana tino so se tino e fai ne ia so se vaegā galuega i te aso tenei. 31 E se ‵tau mo koutou o fai so se vaegā galuega. A te mea tenā se tulafono fakavae tumau mō otou kautama katoa i so se koga e ‵nofo koutou i ei. 32 A te mea tenā se sapati malō‵lo mō koutou kae ka fakalogo‵mae ne koutou a koutou eiloa+ i te po iva o te masina i te afiafi. E ‵tau o tausi ne koutou te otou sapati mai te afiafi ke oko ki te suā afiafi.”

33 Ne toe faipati atu a Ieova ki a Mose, ana muna: 34 “Fai atu ki tino Isalaelu, ‘I te po 15 o te fitu o masina tenei ko te ‵Kaiga Fiafia o Fale Fakamalumalu* mō aso e fitu ki a Ieova.+ 35 E ‵tau o fai se fakatasiga tapu i te aso muamua, kae e se ‵tau o fai ne koutou ne galuega ‵mafa i ei. 36 E fitu aso e ‵tau ei mo koutou o ofo atu se taulaga i luga i te afi ki a Ieova. I te valu o aso, e ‵tau o fai ne koutou se fakatasiga tapu,+ kae e ‵tau o ofo atu ne koutou se taulaga i luga i te afi ki a Ieova. A te mea tenā se maopoopoga ‵malu. E se mafai o fai ne koutou ne galuega ‵mafa i ei.

37 “‘Konei a ‵kaiga fia‵fia+ ki a Ieova kolā e ‵tau o fakamanatu ne koutou e pelā me ne fakatasiga tapu,+ ke ofo atu ei se taulaga i luga i te afi ki a Ieova: ko te taulaga ‵sunu+ mo te taulaga meakai+ mo taulaga meainu+ e ‵tusa mo te fakasologa o aso takitasi. 38 A mea konei ko mea i tafa o mea kolā e ofo atu i sapati o Ieova+ mo otou meaalofa,+ ko otou taulaga o te tautoga,+ mo otou taulaga o te lotomalie,+ kolā e ‵tau o avatu ne koutou ki a Ieova. 39 Kae i te po 15 o te fitu o masina, māfai ko oti ne ‵luku fakatasi mai ne koutou a fuataga katoa o te fenua, e ‵tau o fakamanatu ne koutou te ‵kaiga fiafia a Ieova mō aso e fitu.+ A te aso muamua se aso malōlō kātoa, kae ko te valu o aso se aso malōlō kātoa.+ 40 I te aso muamua, e ‵tau o ave ne koutou a fuataga o toe lakau tafasili i te ‵lei, ko lau o pama,+ kaula o lakau e uke a lau i ei, mo lakau ‵loa kae vikiviki o te vanu, kae ka fia‵fia+ koutou i mua o Ieova te otou Atua mō aso e fitu.+ 41 Ka fakamanatu ne koutou e pelā me se ‵kaiga fiafia ki a Ieova mō aso e fitu i te tausaga.+ E pelā me se tulafono fakavae tumau i otou kautama katoa, e ‵tau o fakamanatu ne koutou i te fitu o masina. 42 E ‵tau o ‵nofo koutou i loto i fale fakamalumalu i aso e fitu.+ A tino Isalaelu katoa e ‵tau o ‵nofo i loto i fale fakamalumalu, 43 ko te mea ke iloa ne otou kautama i aso mai mua+ me ne fai ne au a tino Isalaelu ke ‵nofo i fale fakamalumalu i te taimi ne aumai ei ne au latou ki tua mo te fenua o Aikupito.+ Au ko Ieova te otou Atua.’”

44 Ne faipati atu eiloa a Mose e uiga ki ‵kaiga fia‵fia a Ieova ki tino Isalaelu.