Isaia

39 I te taimi tenā, a te tupu o Papelonia, ko Melotaka-palatana te tama tagata a Palatana, ne avatu ne ia a tusi mo se meaalofa ki a Hesekia,+ me ne logo a ia i tou tagata ne masaki kae ko ‵lei.+ 2 Ne talimalo mo te fiafia ne Hesekia a latou kae fakaasi atu ki a latou a tena fale ‵teu koloa+​—ko siliva, aulo, te sinu pasama mo nisi sinu tāua, ana meatau katoa mo mea katoa kolā e mafai o maua i loto i ana fale koloa. E seai eiloa se mea ne seki fakaasi atu ne Hesekia ki a latou i loto i tena fale* mo tena malo kātoa.

3 Oti aka, ne vau a te pelofeta ko Isaia ki te Tupu ko Hesekia kae fesili atu ki ei: “Ne a pati ne fai mai ne tāgata konei, kae ne o‵mai latou mai fea?” Ne fai atu a Hesekia: “Ne o‵mai latou mai se fenua ‵mao, mai Papelonia.”+ 4 Ne toe fesili atu a ia: “Ne a olotou mea ne lavea i tou fale?” Ne tali atu a Hesekia: “Ne lavea ne latou a mea katoa i toku fale. E seai se mea e seki fakaasi atu ne au ki a latou mai toku fale ‵teu koloa.”

5 Ne fai atu a Isaia ki a Hesekia: “Fakalogo mai ki pati a Ieova o kautau, 6 ‘Kiloke! Ka oko mai a aso, kae ko mea katoa i loto i tou fale* mo mea katoa ne ‵teu ne ou tupuga ke oko mai ki te aso nei ka ave katoa ki Papelonia. Ka seai se mea e ‵toe,’+ ko pati a Ieova.+ 7 ‘Kae ko nisi tama tāgata a koe kolā ka ‵tupu mai i a koe ka ave kea‵tea kae ka fai e pelā me ne ofisa i te palesi o te tupu o Papelonia.’”+

8 Ne fai atu a Hesekia ki a Isaia: “E ‵lei eiloa a pati a Ieova konā ne fai mai ne koe.” Tenā ne toe fakaopoopo atu ei a ia: “Ona ko te mea e isi se filemu mo te tokagamalie* i te vaitaimi e ola ei au.”+