Teutelonome

29 Konei a pati i te feagaiga telā ne fakatonu ne Ieova ki a Mose ke fai mo tino Isalaelu i te fenua o Moapi, i tafa o te feagaiga ne fai ne ia mo latou i Holepa.+

2 Tenā ne fakamaopoopo fakatasi mai ei ne Mose a Isalaelu kātoa kae fai atu ki a latou: “Ko oti ne lavea ne koutou ki otou mata a mea katoa ne fai ne Ieova i te fenua o Aikupito ki te Falao mo ana tavini katoa mo tena fenua kātoa,+ 3 fakasalaga* ‵lasi kolā ne lavea ne koe ki ou mata, mo fakailoga mo vavega ‵lasi konā.+ 4 Kae ne seki tuku atu ne Ieova ki a koutou se loto ke malamalama, ne mata ke ‵kite io me ne taliga ke ‵logo, ke oko mai eiloa ki te aso nei.+ 5 ‘Ne takitaki faeloa ne au koutou i loto i tausaga e 40 i te koga lavaki,+ ne seki ma‵sei otou gatu kae ne seki ma‵sei foki otou taka i otou vae.+ 6 Ne seki ‵kai koutou ki falaoa, kae ne seki inu foki koutou ki uaina io me ko so se meainu malosi, ko te mea ke iloa ne koutou i a au ko Ieova te otou Atua.’ 7 Fakamuli ifo, ne ‵mai koutou ki te koga tenei, kae ko Sekono te tupu o Hesepono+ mo Oko te tupu o Pasana+ ne ‵mai o taua mai ki a tatou, kae ne fakatakavale ne tatou a latou.+ 8 Mai tua ifo, ne puke ne tatou a olotou fenua kae tuku atu ke fai mo tofi o tino Leupena, tino Kato, mo te āfa o te matakāiga o tino Manase.+ 9 Tela la, tausi faka‵lei ki pati o te feagaiga tenei kae faka‵logo ki ei, ko te mea ke fanofano ‵lei otou mea katoa e fai.+

10 “Ko ‵tu atu nei koutou katoa i mua o Ieova te otou Atua i te aso nei, ko ulu o otou matakāiga, otou toeaina, otou ofisa mo tāgata Isalaelu katoa, 11 otou tama‵liki, otou avaga fāfine,+ mo tino fakaa‵tea+ i loto i otou fakai, mai i tau tino fai fafie ki tau tino asu vai. 12 Ko oko mai koe ki konei ko te mea ke mafai o ulu atu koe ki loto i te feagaiga a Ieova tou Atua mo tena tautoga, telā ko fai ne Ieova tou Atua mo koe i te aso nei+ 13 ko te mea ke fakatumau ne ia koutou i te aso nei e pelā me ko ana tino+ kae ke fai a ia mo fai tou Atua,+ e pelā eiloa mo tena folafolaga ki a koe kae pelā eiloa mo tena tautoga ki ou tupuga ko Apelaamo,+ Isaako+ mo Iakopo.+

14 “E se ko koutou fua ka fai ne au ki ei te feagaiga mo te tautoga tenei, 15 kae ne fai ne au mo latou kolā e ‵tu fakatasi tatou i konei i te aso nei i mua o Ieova te ‵tou Atua mo tino kolā e se ‵kau fakatasi mo tatou i te aso nei. 16 (Me e iloa ‵lei ne koutou a te auala ne ola ei tatou i te fenua o Aikupito mo te auala ne olo atu ei tatou i loto i fenua kese‵kese e uke i ‵tou malaga.+ 17 Kae ne lavea faeloa ne koutou i loto i a latou a olotou mea fakatakalia‵lia mo olotou tupua fakatakalia‵lia*+ kolā ne faite ki lakau, fatu, siliva mo aulo.) 18 Fakaeteete ke seai se tagata io me se fafine, se kāiga io me se matakāiga i a koutou e ‵fuli kea‵tea tena loto i te aso nei mai i a Ieova te ‵tou Atua kae fanatu o tavini ki atua o nisi atufenua,+ ko te mea ke seai se aka i a koutou e fua mai i ei a fuataga poisini io me se lakau ‵kona.+

19 ‘Kae kafai e lagona ne se tino a pati o te tautoga tenei kae faipati fakamatamata i tena loto, ana muna, ‘Ka maua ne au te filemu, kae e manako eiloa au o sasale i mea e manako ki ei toku loto,’ ki te fakamaseiga o mea katoa* i tena auala, 20 ka se loto fiafia a Ieova o fakamagalo a te tino tenā.+ I lō te fai penā, ka oko atu te kaitaua o Ieova e pelā me se afi ki te tagata tenā, kae ka oko atu ki a ia a te fakamalaiaga kātoa telā e tusi i loto i te tusi tenei,+ kae ka ‵solo eiloa ne Ieova tena igoa mai lalo o te lagi. 21 Tenā ko ‵vae kea‵tea ei ne Ieova a ia mai matakāiga katoa o Isalaelu ke fakamaseigina e ‵tusa mo fakamalaiaga katoa o te feagaiga kolā e tusi i loto i te tusi tenei o te Tulafono.

22 “Kafai ko lavea ne te kautama o otou tama tāgata i aso mai mua mo te tino fakaa‵tea mai se fenua ‵mao a mala i te fenua tenā, ko puapuaga kolā ne fakaoko atu ne Ieova ki ei​— 23 ko te pauta ‵ka mo te masima mo te afi ‵ka, ko te mea ke se mafai o ‵toki io me ‵fua mai ne mea i luga i te fenua kātoa, io me ne lakau ke ola mai i ei, e pelā eiloa mo te fakamaseiga o Sotoma mo Komolo,+ Atamaa mo Sepoima,+ kolā ne fakaseai atu ne Ieova i tena kaitaua mo tena saua​— 24 ka fai mai latou fakatasi mo atufenua katoa, ‘Kaia ne fai ei ne Ieova a te mea tenei ki te fenua tenei?+ Ne māfua mai pefea a te kaitaua lasi ‵ki tenei?’ 25 Tenā ka fai mai ei latou, ‘Ne fai penā me ne tiaki ne latou a te feagaiga a Ieova,+ te Atua o olotou tupuga, telā ne fai ne ia mo latou i te taimi ne aumai ei ne ia latou ki tua mo te fenua o Aikupito.+ 26 Kae ne olo atu latou o tavini ki nisi atua kae ifo atu ki mea konā, ko atua kolā ne seki iloa eiloa ne latou kae kolā ne fakatapu ne ia ma tapuaki* latou ki ei.+ 27 Tenā ne oko atu ei te kaitaua o Ieova telā e ‵ka pelā me se afi ki luga i te fenua kae fakaoko atu ki luga i ei a te fakamalaiaga telā e tusi i loto i te tusi tenei.+ 28 Tela la, ne unu kea‵tea latou ne Ieova mai te lotou laukele i tena kaitaua+ mo tena ita mo tena sē fiafia lasi kae avatu latou ki te suā fenua, ko te koga ko ‵nofo i ei latou i te aso nei.’+

29 “A mea kolā e ‵funa, i a Ieova te ‵tou Atua,+ kae ko mea kolā ne fakaasi, i a tatou mo tino e ‵tupu mai i a tatou ki te se-gata-mai, ko te mea ke mafai o faka‵logo tatou ki pati katoa i te Tulafono tenei.+