Ki a Tito
2 Kae ko koe, ke faipati faeloa ki mea kolā e fetaui mo akoakoga aoga.*+ 2 E ‵tau mo toeaina ma‵tua o ‵lei olotou uiga, e ma‵tua ‵lei, e ‵lei olotou mafaufau, e ma‵losi i te fakatuanaki, e a‵lofa, e kufaki. 3 E penā foki a fāfine ma‵tua, ke fakaaloalogina latou i olotou amioga, e se gutu fatu‵fatu, e se pologa ki uaina e uke, ne faiakoga o mea ‵lei, 4 ko te mea ke tuku atu ne latou a pati fakatonutonu ki fāfine koi tai fo‵liki ke a‵lofa ki olotou avaga, ke a‵lofa ki olotou tama‵liki, 5 ke ‵lei olotou mafaufau, ke ‵ma, e ga‵lue i olotou fale, e ‵lei, e faka‵logo ki olotou avaga,+ ko te mea ke se taku fakamaseigina te muna a te Atua.
6 Ke penā foki o fakamalosi atu ki tamataene ke ‵lei olotou mafaufau,+ 7 ke fai koe mo fai se fakaakoakoga ‵lei i te faiga o galuega ‵lei i feitu katoa. Akoako atu a mea ‵ma katoa mo te fakamaoni,+ 8 mai te fakaaogaga o pati aoga kolā e se mafai o taku fakamaseigina,+ ko te mea ke masiasi a tino kolā e ‵teke atu ki ei, kae ke seai ne olotou pati sē ‵lei e fai mai ki a tatou.+ 9 Ke faka‵logo a pologa ki olotou matai i mea katoa,+ kae taumafai o fakafiafia atu ki a latou, e aunoa mo te gutu tokatokai, 10 e se kaisoa ne latou olotou mea,+ kae ke fakaasi atu te lotou fakamaoni katoatoa ko te mea ke fakagaligali ne latou i feitu katoa a akoakoga a te ‵tou Fakaola, ko te Atua.+
11 Me ko oti ne fakaasi mai te alofa tauanoa o te Atua, e aumai ei te fakaolataga ki vaegā tino katoa.+ 12 E akoako mai te mea tenā ke ‵teke tatou ki amioga sē amioatua mo manakoga faka-te-lalolagi+ kae ke ola i te mafaufau ‵lei mo te amiotonu mo te tapuaki fakamaoni ki te Atua i loto i te olaga tenei,+ 13 i te taimi e fakatali‵tali ei tatou ki te fakamoemoega fakafiafia+ mo te fakaasimaiga o te ‵malu sili o te Atua maluga e penā foki loa mo te ‵tou Fakaola, ko Iesu Keliso, 14 telā ne tuku mai ne ia a ia eiloa mō tatou+ ke fakasaoloto tatou+ mai so se vaegā amioga solitulafono kae ke faka‵ma ne ia a tino mo fai ana tino fakapito, kolā e loto finafinau o fai a galuega ‵lei.+
15 Tumau i te fai atu o mea konei kae fakamalosi kae polopoloki atu ki tino e auala i te pule katoatoa tenā i a koe.+ Ke seai se tino e manatu fatauva ki a koe.