Levitiko

12 Ne toe fai atu a Ieova ki a Mose: 2 “Fai atu ki tino Isalaelu, ‘Kafai e faitama se fafine kae fanau ne ia se tamaliki tagata, ka se ‵ma eiloa a tou fafine i loto i aso e fitu, e pelā loa mo tena tulaga sē ‵ma i te taimi e masaki fakafafine+ ei a ia. 3 I te valu o aso, a te tamaliki tenā e ‵tau o pilitome.+ 4 Ka tumau eiloa tou fafine i te faka‵māga o ia mai i te toto i aso e 33. E se ‵tau mo ia o fakapatele ki so se mea tapu, kae e se ‵tau mo ia o vau ki loto i te koga tapu ke oko ki te taimi ko palele ei a aso o tena faka‵māga.

5 “‘Kafai e fanau ne ia se tamaliki fafine, ka se ‵ma eiloa tou fafine i loto i aso e 14, e pelā eiloa mo te taimi e masaki fakafafine ei a ia. Ka tumau eiloa tou fafine i te faka‵māga o ia mai i te toto i loto i aso e 66. 6 Kafai ko palele a aso o tena faka‵māga mō se tama tagata io me se tama fafine, ka aumai ne ia ki te faitaulaga i te mataloa o te faleie o maopoopoga, se tamā mamoe telā ko tasi te tausaga te matua mo fai te taulaga ‵sunu,+ mo se lupe io me se punua lupe mo fai te taulaga mō agasala. 7 Ka ofo atu ne te faitaulaga a te mea tenā i mua o Ieova kae fai ne ia te faka‵māga o te fafine, kae ka ‵ma tou fafine mai te ‵tafe o tena toto. Tenei te tulafono e uiga ki se fafine e fanau ne ia se tamaliki tagata io me se tamaliki fafine. 8 Kae kafai e se mafai o avatu ne ia se mamoe, e ‵tau o avatu ne ia a lupe e lua io me ne punua lupe e lua,+ e tasi mō te taulaga ‵sunu kae tasi mō te taulaga mō agasala, kae ka fai ne te faitaulaga a te faka‵māga o tou fafine, ko ‵ma ei a ia.’”