Esekielu
39 “Kae ko koe e te tama a te tagata, ‵valo o ‵teke atu ki a Koka,+ kae fai atu ki ei, ‘Konei a pati a te Aliki Sili ko Ieova ne fai mai: “Au e ‵teke atu ki a koe e Koka, te takitaki pule o Meseko mo Tupalu.+ 2 Ka ‵fuli mai ne au koe kae takitaki koe kae fai koe ke vau mai toe koga ‵mao i te feitu ki mātū+ kae aumai koe ki luga i mauga o Isalaelu. 3 Ka fusu ne au tau kausana ke tō kea‵tea mo tou lima fakamaui kae fai au matasana ke ‵to mai tou lima fakaatamai. 4 I luga i mauga o Isalaelu ka tō ei koe,+ ko koe mo au kautau katoa mo tino kolā ka ‵kau mo koe. Ka tuku atu ne au koe e pelā me ne meakai ki vaegā manu eva valevale mo manu fe‵kai o te laukele.”’+
5 “‘A koe ka tō ifo ki luga i se laukele ateatea,+ me i a au ko oti ne faipati,’ ko te folafolaga a te Aliki Sili ko Ieova.
6 “‘Kae ka uga atu ne au se afi ki Makoka mo latou kolā e ‵nofo i fenua fo‵liki kolā e puipuigina,+ kae ka iloa ei ne latou i a au ko Ieova. 7 Ka fai ne au ke iloa ne toku fenua ko Isalaelu a toku igoa ‵malu, kae ka se talia ne au a toku igoa ‵malu ke toe fakamaseigina; kae ka iloa ei ne atufenua i a au ko Ieova,+ te Atua Tapu o Isalaelu.’+
8 “‘Ao, tenei ko vau, kae ka fai eiloa,’ ko te folafolaga a te Aliki Sili ko Ieova. ‘Tenei eiloa te aso ne faipati au e uiga ki ei. 9 A tino e ‵nofo i fakai o Isalaelu ka olo ki tua kae faka‵ka a afi ki meatau—talita fo‵liki mo talita, kausana mo matasana, pago mo tao. Kae ka fakaaoga ne latou ke faka‵ka ki ei a afi+ mō tausaga e fitu. 10 E se manakogina ke puke mai a lakau mai i te vao io me fai fafie latou i togavao me ka fakaaoga ne latou a meatau konā ke faka‵ka ki ei a afi.’
“‘Ka puke mai ne latou a mea o te taua mai i a latou kolā ne puke ne latou olotou mea, kae ‵fao mai i a latou kolā ne ‵fao ne latou olotou mea,’ ko te folafolaga a te Aliki Sili ko Ieova.
11 “‘I te aso tenā ka tuku atu ei ne au ki a Koka+ se koga mo ana tanu i konā i Isalaelu, i te vanu o latou kolā e faima‵laga i te feitu ki saegala o te tai, kae ka ‵pono i ei te auala o latou kolā e ui atu i konā. Tenā te koga ka tanu ne latou i ei a Koka mo ana potukau katoa, kae ka taku ne latou te koga tenā ko te Vanu o Hamona-Koka.*+ 12 A te kāiga o Isalaelu ka fakamāumāu ne latou a masina e fitu ke tanu ei latou ko te mea ke ‵fulu faka‵ma i ei te laukele.+ 13 A tino katoa o te fenua ka ga‵lue o tanu latou, kae ka aumai ne te mea tenei a te takutakua ki a latou i te aso e faka‵malu ei ne au a au eiloa,’+ ko te folafolaga a te Aliki Sili ko Ieova.
14 “‘Ka ‵tofi aka ne tāgata ke olo atu faeloa i loto i te fenua kae tanu a foitino kolā e ‵toe mai i luga i te laukele, ko te mea ke faka‵ma i ei te fenua. Ka tumau latou i te salasala atu ki ei i masina e fitu. 15 Kafai e lavea ne tino kolā e olo atu i luga i te fenua se ivi o se tino, e fakatu ne latou se fakailoga i tafa i ei. Ko latou kolā ne ‵tofi aka ke tanu a tino ka tanu ne latou a ivi konā i te Vanu o Hamona-Koka.+ 16 Kae ka isi foki se fakai i konā e fakaigoa ki a Hamonaa.* Kae ka faka‵ma ne latou te laukele.’+
17 “E pelā mo koe e te tama a te tagata, konei a pati a te Aliki Sili ko Ieova ne fai mai: ‘Fai atu ki so se vaegā manu eva mo manu fe‵kai katoa o te vao, “Maopoopo fakatasi koutou kae o‵mai. Maopoopo katoa mai ki tafa o taku taulaga telā e fakatoka ne au mō koutou, se taulaga lasi eiloa i mauga o Isalaelu.+ A koutou ka ‵kai ki ‵kano kae inu ki toto.+ 18 A koutou ka ‵kai ki ‵kano o tino ‵mafi kae inu ki toto o takitaki o te lalolagi—ko mamoe tāgata, tamā mamoe, kouti mo pulumakau tāgata—ko manu puta‵puta katoa o Pasana. 19 Ka ‵kai folofolo koutou ki gako kae inu ki toto ke oko ki te taimi ko ko‵nā ei koutou i te taulaga ne fakatoka ne au mō koutou.”’
20 “‘I taku taipola ka ma‵kona koutou i solofanua mo tino faka‵tele kaliota, tino ‵mafi mo vaegā toa ‵mafi valevale,’+ ko te folafolaga a te Aliki Sili ko Ieova.
21 “‘Ka fakaasi atu ne au toku ‵malu ki atufenua, kae ko atufenua katoa ka lavea ne latou te fakamasinoga ne fai ne au mo te malosi ne fakaasi atu ne au ki a latou.+ 22 Mai te aso tenā o fano ki mua ka iloa ei ne te kāiga o Isalaelu i a au ko Ieova te lotou Atua. 23 Kae ka iloa ei ne atufenua me i te kāiga o Isalaelu ne ave fakapagota ona ko te lotou mea ‵se, me ne seki fakamaoni latou ki a au.+ Tenā ne ‵funa ei oku mata mai i a latou+ kae tuku atu latou ki olotou fili,+ kae ne ‵mate atu a latou katoa e auala i te pelu. 24 Ne saga atu au ki a latou e ‵tusa mo te lotou tulaga sē ‵ma mo olotou amioga solitulafono kae ne ‵funa oku mata mai i a latou.’
25 “Tela la, konei a pati a te Aliki Sili ko Ieova ne fai mai: ‘Ka toe faka‵foki mai ne au a pagota o Iakopo+ kae fakaasi atu te alofa fakamagalo ki te kāiga kātoa o Isalaelu;+ kae ka ‵pulu eiloa ne au toku igoa tapu mo te loto finafinau.+ 26 Kafai ko oti ne fakamasiasi latou ona ko olotou faifaiga sē fakamaoni katoa ne fai ki a au,+ ka ‵nofo latou mo te tokagamalie i te lotou fenua, kae seai se tino e ma‵taku latou ki ei.+ 27 Kafai ko toe aumai ne au latou mai i atufenua kae fakamaopoopo fakatasi latou mai i fenua o olotou fili,+ ka faka‵malu foki ne au a au eiloa i loto i a latou i mua o atufenua e uke.’+
28 “‘Ka iloa ei ne latou i a au ko Ieova te lotou Atua māfai ko ave fakapagota ne au latou ki nisi atufenua kae toe fakamaopoopo mai latou ki te lotou fenua, kae seai se tino i a latou e tiakina.+ 29 Ka se toe ‵funa ne au oku mata mai i a latou,+ me ka ‵ligi atu ne au toku agaga ki te kāiga o Isalaelu,’+ ko te folafolaga a te Aliki Sili ko Ieova.”