Te Tusi Muamua ki te Kau Kolinito

14 ‵Sala ki te alofa, kae kausaki faeloa ki meaalofa faka-te-agaga, kae maise eiloa ko te meaalofa ki te faiga o valoaga.+ 2 Me i te tino telā e faipati ki ‵gana kese‵kese, e se faipati ki tāgata kae ki te Atua, me e seai se tino e malamalama,+ kae e faipati atu ne ia a mea ‵funa kae tapu+ e auala i te agaga. 3 Kae ko te tino telā e ‵valo atu e ati aka kae fakamalosi kae fakamafanafana atu ne ia a tino ki ana pati. 4 A te tino telā e faipati ki ‵gana kese‵kese e ati aka ne ia a ia eiloa, kae ko te tino telā e ‵valo atu e ati aka ne ia se fakapotopotoga. 5 Nei la, e manako au ke fai‵pati koutou katoa ki ‵gana kese‵kese,+ kae e sili atu toku manako ke ‵valo atu koutou.+ E tonu, e sili atu te tino telā e ‵valo atu i lō te tino telā e faipati ki ‵gana kese‵kese, seiloga ke ‵fuli ne ia ana pati ko te mea ke ati aka i ei a te fakapotopotoga. 6 Kae i te taimi tenei, e oku taina, kafai e fanatu au ki a koutou kae faipati atu i ‵gana kese‵kese, se a la te mea ‵lei e tuku atu ne au ki a koutou seiloga ke fakamatala atu ne au a te mea tenā i se fakaasiga+ io me i te iloa+ io me se valoaga io me se akoakoga?

7 E ‵pau eiloa mo mea ‵mate kolā e ‵tagi mai, faitalia me se faili io me se kitala. Seiloga ke ‵tagi mai i nota kese‵kese, e a, e mafai o iloa ne tatou a mea kolā e faka‵tagi mai i se faili io me se kitala? 8 Me kafai e se manino te ‵tagi o te pu, ko oi la ka fakatoka mō te taua? 9 E penā foki koutou, kafai e se fai‵pati ne koutou a pati kolā e mainagofie i ei, ka iloa la pefea ne se tino a pati kolā e fai atu? Se mea tonu, i a koutou ka fai‵pati fua ki te ea. 10 E uke a ‵gana kese‵kese i te lalolagi, kae e tofu te ‵gana mo tena uiga. 11 Me kafai e se malamalama au i uiga o pati, ka fai au e pelā me se tino fakaa‵tea ki te tino telā e faipati, kae ka fai a te tino e faipati e pelā me se tino fakaa‵tea ki a au. 12 E penā foki koutou, ona ko koutou e ma‵nako malosi ki meaalofa o te agaga, fai ke ‵fonu koutou i meaalofa kolā e ati aka i ei a te fakapotopotoga.+

13 Tela la, e ‵tau mo te tino telā e faipati ki ‵gana kese‵kese o ‵talo ko te mea ke mafai o ‵fuli ne ia ana pati.+ 14 Me kafai au e ‵talo i se ‵gana fakaa‵tea, a taku ‵talo tenā ko taku meaalofa mai i te agaga, kae e se malamalama i ei a toku mafaufau. 15 Se a la te mea e ‵tau o fai? Ka ‵talo atu eiloa au i te meaalofa a te agaga, kae ka ‵talo foki au i pati kolā e malamalama au i ei. Ka usu atu ne au a pese o vikiga i te meaalofa a te agaga, kae ka usu foki ne au a pese o vikiga ke malamalama au i ei. 16 Me kafai e ofo atu ne koe a vikiga mo meaalofa a te agaga, e mafai la pefea ne te tino telā e nofo mai o fai atu “Amene” ki tau ‵talo fakafetai, me e se malamalama a ia i au pati e fai? 17 E tonu, e fai atu ne koe te fakafetai i se auala ‵lei, kae e se ati aka i ei a te suā tino. 18 E fakafetai au ki te Atua me e uke atu a ‵gana kese‵kese e faipati au ki ei i lō koutou katoa. 19 E tiga te feitu tenā, e ‵lei atu ke faipati au ki pati e lima kolā e mafai o malamalama i ei te fakapotopotoga, ko te mea ke akoako* atu ne au a nisi tino, i lō te sefuluafe o pati i se isi ‵gana.+

20 Oku taina, ke se fai koutou e pelā me ne tama‵liki fo‵liki i te otou malamalama,+ kae ke fai e pelā me ne tama‵liki fo‵liki e uiga ki te masei;+ kae ke fai e pelā me ne tino ma‵tua i te otou malamalama.+ 21 Konei a pati e tusi i te Tulafono: “ ‘Ka faipati atu au ki tino konei i ‵gana mo pati a tino fakaa‵tea, kae ka ita latou ma faka‵logo mai ki a au,’ ko muna a Ieova.”*+ 22 Tela la, a te faipati ki ‵gana kese‵kese e sē se fakailoga mō tino tali‵tonu kae mō tino sē tali‵tonu,+ kae ko te faiga o valoaga e sē se fakailoga mō tino sē tali‵tonu kae mō tino tali‵tonu. 23 Tela la, kafai e maopoopo te fakapotopotoga kātoa ki se koga kae e fai‵pati katoa ki ‵gana kese‵kese, kae e oko mai a nisi tino mo tino sē tali‵tonu ki ei, e a, ka se fai atu latou me ko ma‵sei otou mafaufau? 24 Kae kafai e ‵valo atu katoa koutou kae ko fanatu ki loto se tino sē talitonu io me se isi tino, ka fai ei otou pati katoa mo fai ne akoakoga mo polopolokiga ki a latou. 25 Ka iloa atu i ei a mea ‵funa i tena loto, kae ka fakasiga ifo a ia ki lalo o tapuaki ki te Atua, kae fai atu: “A te Atua e nofo eiloa i a koutou.”+

26 Se a la te mea e ‵tau o fai, e oku taina? Kafai ko maopoopo koutou, e tokotasi e faipati ki se salamo, a te suā tino e akoako atu, kae ko te suā tino e fai atu ne ia se fakaasiga, kae ko te suā tino e faipati ki se isi ‵gana, kae ko te suā tino e ‵fuli ne ia a pati konā.+ Ke fai a mea katoa ke ati aka ei a tino katoa. 27 Kae kafai e faipati se tino ki se ‵gana, ke gata fua i se tokolua io me se tokotolu kae ke fakasolosolo latou, kae e ‵tau o isi se tino ke ‵fuli ne ia olotou pati.+ 28 Kae kafai e seai se tino ‵fuli, e ‵tau mo ia o nofo fifilemu i te fakapotopotoga kae faipati atu fua ki a ia eiloa mo te Atua. 29 Fai ke fai‵pati atu a pelofeta+ e tokolua io me e tokotolu, kae ke taumafai a nisi tino ke malamalama i uiga o olotou pati. 30 Kae kafai e maua ne te suā tino se fakaasiga i te taimi e sagasaga ei i konā, fai la ke nofo filemu a ia telā ne faipati muamua. 31 Me e mafai ne koutou katoa o ‵valo atu i tami takitasi, ko te mea ke iloa kae fakamalosi atu foki ki tino katoa.+ 32 Kae ko meaalofa a te agaga ki pelofeta e ‵tau o pule ne pelofeta. 33 Me i te Atua e se ko te Atua o te fai valevale kae o te filemu.+

E pelā eiloa mo fakapotopotoga katoa o tino tapu, 34 ke ‵nofo fifilemu a fāfine i fakapotopotoga me e se talia ke fai‵pati latou i ei.+ Kae e ‵tau foki mo latou o faka‵logo+ ki pati kolā e fai mai i te Tulafono. 35 Kafai e ma‵nako ke iloa ne latou se mea, e ‵tau o fesili atu ki olotou avaga i olotou fale, me se mea fakalumaluma te faipati o se fafine i te fakapotopotoga.

36 E mata, ne māfua mai i a koutou te muna a te Atua, io me ne fakaoko atu fua ki a koutou?

37 Kafai e mafaufau se tino i a ia se pelofeta io me ne maua ne ia se meaalofa e auala i te agaga, e ‵tau mo ia o talia a mea kolā e tusi atu ne au ki a koutou me ko fakatonuga a te Aliki. 38 Kae kafai e se fia saga se tino ki te mea tenei, ka se fia saga atu te Atua ki a ia. 39 Tela la, e oku taina, ke taumafai faeloa o ‵valo atu,+ kae ke mo a ma fakatapu te fai‵pati ki ‵gana kese‵kese.+ 40 Kae ke fai a mea katoa ke fanofano ‵lei mai te faiga o fakatokaga ‵lei.+