Numela
13 Ne faipati atu a Ieova ki a Mose, ana muna: 2 “Uga atu ne tāgata ke olo o iloilo aka a te fenua o Kanana, telā ka tuku ne au ki tino Isalaelu. E ‵tau o uga atu ne koe a tāgata taki tokotasi mai matakāiga takitasi, kae ne takitaki+ o olotou matakāiga.”+
3 Ne uga atu ne Mose a latou mai te koga lavaki o Palana+ i te fakatonuga a Ieova. A tāgata katoa konā ne takitaki o tino Isalaelu. 4 Konei a igoa o latou: mai te matakāiga o Leupena ko Samua te tama tagata a Sakula; 5 mai te matakāiga o Simeona ko Safata te tama tagata a Holi; 6 mai te matakāiga o Iuta ko Kalepo+ te tama tagata a Iefune; 7 mai te matakāiga o Isakala ko Ikala te tama tagata a Iosefa; 8 mai te matakāiga o Efalaima ko Hosia+ te tama tagata a Nuno; 9 mai te matakāiga o Peniamina ko Palati te tama tagata a Lafu; 10 mai te matakāiga o Sepulona ko Katieli te tama tagata a Soti; 11 mai te matakāiga o Iosefa,+ i te matakāiga o Manase+ ko Kate te tama tagata a Susi; 12 mai te matakāiga o Tanu ko Amielu te tama tagata a Kemali; 13 mai te matakāiga o Asela ko Setualo te tama tagata a Mikaele; 14 mai te matakāiga o Nafatali ko Naapi te tama tagata a Vopisi; 15 mai te matakāiga o Kato ko Keuli te tama tagata a Maki. 16 Konei a igoa o tāgata kolā ne uga atu ne Mose ke olo o iloilo aka a te fenua. Kae ne fakaigoa ne Mose a Hosia te tama tagata a Nuno ki a Iosua.*+
17 I te taimi ne uga atu ei ne Mose a latou ke olo o iloilo aka a te fenua o Kanana, ne fai atu a ia ki a latou: “Olo ki luga i te Nekepi ko olo aka ei koutou ki koga maugā.+ 18 E ‵tau mo koutou o onoono me ko te fenua tenā se vaegā fenua pefea,+ ke iloa foki ei ne koutou me ko tino e ‵nofo i ei ne tino ‵mafi io me ne tino vāi‵vai, e mu‵tana io me tokouke, 19 me e mata, e ‵lei te laukele io me masei, io me ko fakai e ‵nofo i ei latou e isi ne ‵pui io me seai. 20 Kae onoono aka me ko te laukele i ei e ola ‵lei io me ikai,+ me e isi ne lakau i ei io me ikai. E ‵tau mo koutou o loto ‵toa+ kae tau mai ne fuataga mai te fenua tenā.” A te taimi tenā ko te taimi o te tausaga telā e ‵sulu ei a fuagavine muamua.+
21 Ne olo latou o iloilo a te fenua mai te koga lavaki o Siina+ ke oko ki Lehopa+ ke oko foki ki Lepo-hamata.*+ 22 I te lotou oloakaga ki te Nekepi, ne oko atu latou ki Hepelona+ te koga e ‵nofo ei a Aimanu, Sesai mo Talamai+ ko tino Anaki.+ A Hepelona ne fakatu i te fitu tausaga mai mua o Soani i Aikupito. 23 I te lotou okoatuga ki te Vanu o Esekolo,+ ne ‵kati ne latou i konā se kaula telā e isi se kaufui vine i ei, kae ne ‵tau o amo i se amo ne tāgata e tokolua, e pelā foki mo nisi pomekalanite mo mati.+ 24 Ne fakaigoa ne latou a te koga tenā ki te Vanu o Esekolo,*+ me tenā te koga ne ‵kati ei ne tāgata Isalaelu a kaufui vine mai i ei.
25 I te otiga o aso e 40+ ne ‵foki mai ei latou mai te iloiloga o te fenua. 26 Ne ‵foki mai latou ki a Mose mo Alona mo te fakapotopotoga kātoa o tino Isalaelu i te koga lavaki o Palana i Katesa.+ Ne aumai ne latou se lipoti ki te fakapotopotoga kātoa kae ne fakaasi atu ki a latou a fuataga mai te fenua tenā. 27 Tenei te lotou lipoti ne fai atu ki a Mose: “Ne ulu atu matou ki loto i te fenua telā ne uga ne koe matou ki ei, kae e tonu eiloa me se fenua telā e ‵tafe i ei a susu mo hani,+ kae konei a fuataga mai i ei.+ 28 Kae ko tino kolā e ‵nofo i te fenua tenā ne tino ‵mafi, kae ko ‵pui o olotou fakai e puipui faka‵lei. Ne lavea foki ne matou a tino Anaki i ei.+ 29 A tino Amaleka+ e ‵nofo i te Nekepi,+ kae ko tino Heti, tino Iepuse+ mo tino Amoli+ e ‵nofo atu i koga maugā, kae ko tino Kanana+ e ‵nofo i tafa o te tai+ mo tafatafa o te Iolitana.”
30 Tenā ne taumafai ei a Kalepo o fakafilemu aka a tino kolā e ‵tu atu i mua o Mose, ana muna: “Ke na olo fakavave nei tatou, kae ka fai eiloa mō tatou te fenua tenā, me e mautinoa eiloa me ka manumalo tatou.”+ 31 Kae ne fai atu a tāgata kolā ne olo fakatasi mo ia: “E se mafai o taua atu tatou ki tino konā, me e ma‵losi atu latou i a tatou.”+ 32 Kae ne fai atu faeloa ne latou se lipoti sē ‵lei+ e uiga ki te fenua telā ne iloilo aka ne latou, olotou muna: “A te fenua ne olo matou i loto i ei o iloilo aka se fenua telā e tamate ne ia ana tino eiloa, kae ko tino katoa kolā ne lavea ne matou i loto i ei ne tāgata e se fuafuagina eiloa i te ‵lasi.+ 33 Kae ne lavea ne matou i konā a Nefilimi, ko tama tāgata a Anaki,+ kolā ne ‵tupu mai i te kau Nefilimi, kae e fai fua tatou e pelā me ne sikusikulauniu māfai e fakatusa ki a latou.”