Levitiko
9 I te valu o aso+ ne ‵kami mai ne Mose a Alona mo ana tama tāgata mo toeaina o Isalaelu. 2 Ne fai atu a ia ki a Alona: “Puke ne koe se tamā pulumakau mo fai te taulaga mō agasala+ mo se mamoe mo fai te taulaga ‵sunu, ne manu ‵lei eiloa, kae ofo atu i mua o Ieova. 3 Kae ka fai atu koe ki tino Isalaelu, ‘Puke se kouti tagata mo fai te taulaga mō agasala, mo se tamā pulumakau mo se tamā mamoe, kolā ko takitasi tausaga te ma‵tua, kae ne manu ‵lei eiloa, mo fai te taulaga ‵sunu, 4 mo se pulumakau tagata mo se mamoe mo fai a taulaga ‵kai fakatasi+ ke ofo atu i mua o Ieova, mo te taulaga meakai+ ne palu mo sinu, me i te aso nei ka fakasae atu a Ieova ki a koutou.’”+
5 Ne ave ne latou a mea kolā ne fakatonu atu ne Mose ki mua o te faleie o maopoopoga. Tenā ne o‵mai ei a te fakapotopotoga kātoa ki mua kae ‵tu atu i mua o Ieova. 6 Kae ne fai atu a Mose: “Tenei te mea ne fakatonu mai ne Ieova ke fai ne koutou, ko te mea ke fakaasi atu ne Ieova tena ‵malu ki a koutou.”+ 7 Tenā ne fai atu ei a Mose ki a Alona: “Fano ki te fatafaitaulaga kae ofo atu tau taulaga mō agasala+ mo tau taulaga ‵sunu, kae fai se faka‵māga mō koe+ eiloa mo tou kāiga kātoa; kae ofo atu te taulaga mō tino+ kae fai se faka‵māga mō latou,+ e ‵tusa mo te fakatonuga a Ieova.”
8 Ne fanatu fakavave a Alona ki te fatafaitaulaga kae tamate ne ia te tamā pulumakau o te taulaga mō agasala telā ne fakatoka mō ia.+ 9 Tenā ne tuku atu ei ne tama tāgata a Alona a toto+ ki a ia, kae ne ufi tena matikao lima ki loto i toto kae nani ki luga i suki o te fatafaitaulaga, kae ‵ligi ne ia te ‵toega o toto ki lalo o te fatafaitaulaga.+ 10 Ne ‵sunu ne ia a gako mo nonu mo gako o te ate mai te taulaga mō agasala ko te mea ke au i luga i te fatafaitaulaga, e ‵tusa mo te fakatonuga a Ieova ne fai ki a Mose.+ 11 Kae ne ‵sunu ne ia a ‵kano mo te pa‵kili ki te afi i tua o te fakai.+
12 Tenā ne tamate ei ne ia te manu o te taulaga ‵sunu kae tuku atu ne tama tāgata a Alona a toto ki a ia kae fakamatulutulu ne ia ki feitu katoa o te fatafaitaulaga.+ 13 Ne tuku atu ne latou ki a ia a vaega fo‵liki o te taulaga ‵sunu fakatasi mo te ulu, kae ne ‵sunu ne ia ko te mea ke au i luga i te fatafaitaulaga. 14 E se gata i ei, ne ‵fulu ne ia a gakau mo vae kae ‵sunu ne ia i luga i te taulaga ‵sunu ko te mea ke au i luga i te fatafaitaulaga.
15 Tenā ne ofo atu ei ne ia a te taulaga mō tino kae puke a te kouti o te taulaga mō agasala a tino kae tamate kae ofo atu se taulaga mō agasala e ‵pau eiloa mo te faiga ki te manu muamua. 16 Kae ne ofo atu ne ia te taulaga ‵sunu e ‵tusa mo faifaiga masani kolā e ‵tau o fai ki ei.+
17 Oti aka, ofo atu ei ne ia te taulaga meakai,+ ne faka‵fonu ne ia tena lima ki mea mai i ei kae ‵sunu ne ia ko te mea ke au i luga i te fatafaitaulaga, i tafa o te taulaga ‵sunu o te tafataeao.+
18 Mai tua i ei, ne tamate ne ia te pulumakau tagata mo te mamoe o te taulaga ‵kai fakatasi telā ka ofo atu mō tino katoa. Tenā ne tuku atu ei ne tama tāgata a Alona a toto ki a ia kae fakamatulutulu ne ia ki feitu katoa o te fatafaitaulaga.+ 19 Kae e pelā mo vaega fo‵liki o gako o te pulumakau,+ ko gako i te felo o te mamoe, ko gako e ufi ei a mea katoa i loto i te tinae, ko nonu mo gako o te ate,+ 20 ne tuku ne latou a vaega fo‵liki katoa o gako ki luga i fatafata, oti aka ‵sunu ei ne ia vaega fo‵liki o gako ko te mea ke au i luga i te fatafaitaulaga.+ 21 Kae ko fatafata mo te vae fakaatamai ne fakagasuesue ne Alona ki mua mo tua e pelā me se taulaga fakagasuesue i mua o Ieova, e ‵tusa mo te fakatonuga ne fai atu ne Mose.+
22 Tenā ne ‵fuli atu ei a Alona ki tino kae sisi aka ana lima kae fakamanuia+ atu latou kae fanaifo ki lalo i te otiga ne ofo atu ne ia te taulaga mō agasala mo te taulaga ‵sunu mo taulaga ‵kai fakatasi. 23 Fakamuli loa, olo atu ei a Mose mo Alona ki loto i te faleie o maopoopoga kae toe o‵mai ki tua kae fakamanuia atu a tino katoa.+
Ne fakaasi atu ne Ieova a tena ‵malu ki tino katoa,+ 24 kae ne tō ifo se afi mai i a Ieova,+ kae ne kamata o ‵ka i ei a te taulaga ‵sunu mo vaega fo‵liki o gako i luga i te fatafaitaulaga. I te laveaga ne tino katoa a te mea tenei, ne kamata latou o paka‵laga kae faka‵siga ki lalo mo olotou mata e ‵fuli ki te laukele.+