Levitiko

3 “‘Kafai a tena taulaga se taulaga ‵kai fakatasi,*+ kae e ofo atu ne ia mai te lafu pulumakau, faitalia me se manu tagata io me se manu fafine, e ‵tau o ofo atu ne ia se manu ‵lei i mua o Ieova. 2 E ‵tau o tuku atu tena lima ki luga i te ulu o tena taulaga, kae ka tamate te manu tenā i tafa o te mataloa o te faleie o maopoopoga; kae ko tama tāgata a Alona, kolā ko faitaulaga, ka fakamatulutulu ne latou te toto ki feitu katoa o te fatafaitaulaga. 3 E ‵tau o ofo atu ne ia se vaega o te taulaga ‵kai fakatasi e pelā me se taulaga telā e ofo atu i luga i te afi ki a Ieova:+ ko gako+ kolā e ufi i luga i gakau, mo gako katoa i tafatafa o gakau, 4 mo nonu e lua mo gako i luga i ei i tafa o kautega. Ka tapale foki kea‵tea ne ia a gako o te ate fakatasi mo nonu.+ 5 Ka ‵sunu ne tama tāgata a Alona a mea konā ko te mea ke au i luga i te fatafaitaulaga mai luga o te taulaga ‵sunu telā e tuku i luga i fafie kolā e ‵ka i te afi;+ a te mea tenā se taulaga e ofo atu i luga i te afi kae manogi gali ki a Ieova.+

6 “‘Kafai e ofo atu ne ia mai te lafu mamoe a tena taulaga ‵kai fakatasi ki a Ieova, e ‵tau o ofo atu ne ia se manu tagata io me se manu fafine ‵lei.+ 7 Kafai e ofo atu ne ia se tamā mamoe mo fai tena taulaga, e ‵tau o ofo atu ne ia i mua o Ieova. 8 Ka tuku atu ne ia tena lima ki luga i te ulu o tena taulaga, kae ka tamate te manu tenā i mua o te faleie o maopoopoga. A tama tāgata a Alona ka fakamatulutulu ne latou te toto o te manu ki luga i feitu katoa o te fatafaitaulaga. 9 Ka ofo atu ne ia a gako mai te taulaga ‵kai fakatasi e pelā me se taulaga e ofo atu i luga i te afi ki a Ieova.+ Ka ‵kati kea‵tea ne ia a te felo putaputa o te manu i te koga telā e pili ki te ivi tua, ko gako kolā e ufi i luga i gakau, ko gako katoa i tafatafa o gakau, 10 mo nonu e lua mo gako i luga i ei i tafa o kautega. Ka tapale foki kea‵tea ne ia a gako o te ate fakatasi mo nonu.+ 11 Kae ka ‵sunu ne te faitaulaga a mea konā ko te mea ke au i luga i te fatafaitaulaga e pelā me se meakai,* se taulaga e ofo atu i luga i te afi ki a Ieova.+

12 “‘Kafai a tena taulaga se kouti, e ‵tau o ofo atu ne ia i mua o Ieova. 13 Ka tuku atu tena lima ki luga i te ulu o te manu, kae ka tamate te manu tenā i mua o te faleie o maopoopoga, kae ko tama tāgata a Alona ka fakamatulutulu ne latou te toto o te manu ki luga i feitu katoa o te fatafaitaulaga. 14 A te vaega telā ka ofo atu ne ia e pelā me ko tena taulaga e ofo atu i luga i te afi ki a Ieova ko gako kolā e ufi i luga i gakau, ko gako katoa i tafatafa o gakau,+ 15 mo nonu e lua mo gako i luga i ei i tafa o kautega. Ka tapale foki kea‵tea ne ia a gako o te ate fakatasi mo nonu. 16 Ka ‵sunu ne te faitaulaga a mea konā ko te mea ke au i luga i te fatafaitaulaga e pelā me se meakai,* se taulaga e ofo atu i luga i te afi kae manogi gali. A gako katoa i a Ieova.+

17 “‘A te mea tenā se tulafono fakavae ki te se-gata-mai i otou kautama katoa, i koga katoa e ‵nofo koutou i ei: E se ‵tau eiloa mo koutou o ‵kai ki gako io me ko toto.’”+