Levitiko

6 Ne toe faipati atu a Ieova ki a Mose: 2 “Kafai e agasala se tino kae ko se fakamaoni ki a Ieova+ me ne fakatogafiti ne ia tena tuakoi e auala i se mea ne tuku atu ki a ia ke tausi ki ei,+ io me se mea fua ne tuku atu ki a ia, io me ne kaisoa io me ne fakaloiloi ne ia tena tuakoi, 3 io me ne maua ne ia se mea ne galo kae loi e uiga ki ei, kae kafai e tauto fakaloiloi e uiga ki se vaegā agasala penā ne fai ne ia,+ tenei te mea e ‵tau o fai ne ia: 4 Kafai ko agasala kae ‵se a ia, e ‵tau o fakafoki ne ia a te mea ne kaisoa ne ia, te mea ne fakatogafiti ne ia, te mea ne puke ne ia i se auala fakaloiloi, te mea ne tuku atu ki a ia ke tausi ki ei, io me ko te mea telā ne galo kae ne maua ne ia, 5 io me ko so se mea telā ne tauto fakaloiloi a ia e uiga ki ei, kae e ‵tau o toe ‵togi atu ne ia a te mea tenā,+ kae toe fakaopoopo atu ki ei te tasi-vae-lima o te ‵togi o te mea tenā. Ka tuku atu ne ia a te mea tenā ki te tino i a ia te mea i te aso telā e fakatalitonu aka ei a tena mea ‵se ne fai. 6 Kae ka aumai ne ia ki te faitaulaga se mamoe ‵lei mai te lafu mo fai tena taulaga mō mea ‵se ki a Ieova, e ‵tusa mo te ‵togi fakatautau o te mea tenā, mo fai te taulaga mō mea ‵se.+ 7 Ka fai ne te faitaulaga se faka‵māga mō te tino tenā i mua o Ieova, kae ka fakamagalo a ia mō so se mea telā ne fai ne ia ke agasala ei a ia.”+

8 Ne toe faipati atu a Ieova ki a Mose, ana muna: 9 “Fakatonu atu ki a Alona mo ana tama tāgata kae fai atu, ‘Tenei te tulafono o te taulaga ‵sunu:+ E ‵tau o tuku a te taulaga ‵sunu i luga i te afi i te fatafaitaulaga i te po kātoa ke oko ki te tafataeao, kae e ‵tau o ‵ka faeloa a te afi i luga i te fatafaitaulaga. 10 Ka pei a te faitaulaga ki tena gatu lino,+ kae pei foki tena tivae lino ‵mutu.+ Tenā ko ave ei kea‵tea ne ia a lefu*+ o te taulaga ‵sunu kolā ne ‵ka i te afi i luga i te fatafaitaulaga kae tuku atu i tafa o te fatafaitaulaga. 11 Tenā ko tapale ei ana gatu+ kae pei ki nisi gatu ko ave ei ne ia a lefu ki se koga ‵ma i tua o te fakai.+ 12 E ‵tau o ‵ka faeloa a te afi i luga i te fatafaitaulaga. E se ‵tau eiloa o mate. E ‵tau o faka‵ka ne te faitaulaga a fafie+ i tafataeao katoa kae fakatoka te taulaga ‵sunu i luga i ei, kae ka ‵sunu ne ia a gako o te taulaga ‵kai fakatasi ko te mea ke au i luga i ei.+ 13 E ‵tau o ‵ka faeloa a te afi i luga i te fatafaitaulaga. E se ‵tau eiloa o mate.

14 “‘Tenei te tulafono o te taulaga meakai:+ A koutou e tama tāgata a Alona, e ‵tau o ofo atu ne koutou a te taulaga tenei i mua o Ieova mai i mua o te fatafaitaulaga. 15 E ‵tau o faka‵fonu ne se tokotasi i a latou ana lima ki falaoa ‵mata kae ‵lei o te taulaga meakai mo sinu mo pulu lipano katoa o te taulaga meakai, kae ka ‵sunu ne ia ko te mea ke au i luga i te fatafaitaulaga e pelā me se mea manogi gali* mo fai se taulaga o fakamasauaga ki a Ieova.+ 16 Ka kai ne Alona mo ana tama tāgata a mea kolā e ‵toe mai i ei.+ Ka kai ne latou e pelā me ne falaoa sē faka‵fete i se koga tapu. Ka kai ne latou i loto i te koga ateatea o te faleie o maopoopoga.+ 17 E se ‵tau o tao fakatasi a te mea tenā mo so se mea ne faka‵fete.+ Ko tuku atu ne au a te mea tenā mo fai te lotou tusaga mai aku taulaga kolā e ofo atu i luga i te afi.+ A te mea tenā se mea e tafasili i te tapu,+ e pelā mo te taulaga mō agasala mo te taulaga mō mea ‵se. 18 A tāgata katoa mai tama tāgata a Alona ka ‵kai ki ei.+ A te mea tenā ko te lotou vaega tumau i otou kautama katoa mai i taulaga a Ieova kolā e ofo atu i luga i te afi.+ So se mea e patele ki mea konā* ka fai pelā me se mea tapu.’”

19 Ne toe faipati atu foki a Ieova ki a Mose: 20 “Tenei te taulaga ka ofo atu ne Alona mo ana tama tāgata ki a Ieova i te aso e faū+ ei a ia: ko te tasi-vae-sefulu o te efa*+ o falaoa ‵mata kae ‵lei,+ e āfa i te taeao kae āfa i te afiafi. 21 E ‵tau o palu ki sinu kae ‵tunu i luga i se fiti pāpā.+ E ‵tau o palu faka‵lei mo te sinu ko aumai ei ne koe kae ofo atu e pelā me se taulaga meakai i vaega fo‵liki kolā ko oti ne tao, e pelā me se taulaga manogi gali ki a Ieova. 22 A te faitaulaga telā ne faū ke sui ei a ia mai i ana tama tāgata+ ka fai ne ia a te mea tenā. A te mea tenei se tulafono foliki tumau: Ka ‵sunu a te mea tenā ko te mea ke au e pelā me se taulaga kātoa ki a Ieova. 23 So se taulaga meakai a se faitaulaga e ‵tau o fai pelā me se taulaga kātoa. E se ‵tau o kai a te taulaga tenā.”

24 Ne toe faipati atu foki a Ieova ki a Mose, ana muna: 25 “Fai atu ki a Alona mo ana tama tāgata, ‘Tenei te tulafono o te taulaga mō agasala:+ I te koga telā e tamate i ei a te manu o te taulaga ‵sunu ka tamate+ foki i ei a te manu o te taulaga mō agasala i mua o Ieova. A te mea tenā se mea e tafasili i te tapu. 26 A te faitaulaga telā e ofo atu ne ia te taulaga mō agasala e ‵tau o kai ki ei.+ E ‵tau o kai i loto i se koga tapu, i loto i te koga ateatea o te faleie o maopoopoga.+

27 “‘So se mea telā e patele ki ana ‵kano ka fai pelā me se mea tapu, kae kafai e ‵pisi atu ne mu toto i ei ki luga i gatu o se tino, e ‵tau o ‵ta ne koe a te gatu telā ne ‵pisi atu a toto ki ei i loto i se koga tapu. 28 A te ulo kele telā ne saka ki ei a ‵kano konā e ‵tau o ‵pei ke malipilipi. Kae kafai ne saka i loto i se ulo kopa, e ‵tau o fulu ke ‵ma ki vai.

29 “‘A faitaulaga tāgata katoa ka ‵kai ki ei.+ A te mea tenā se mea e tafasili i te tapu.+ 30 Kae e seai se taulaga mō agasala e ‵tau o kai māfai e isi ne mu toto mai i ei ne aumai ki loto i te faleie o maopoopoga mo fai te faka‵māga i te koga tapu.+ E ‵tau o ‵sunu a te mea tenā ki te afi.