Mika
4 I te fakaotiotiga o aso fakaoti,*
A te mauga o te fale o Ieova+
Ka faka‵mautakitaki i luga i taulu o mauga,
Kae ka fakamaluga aka ke maluga atu i tamā mauga,
Kae ka ualolo atu ki ei a tino.+
2 Kae e uke a atufenua ka olo ki ei kae fai atu:
“O‵mai, ‵tou olo ki luga i te mauga o Ieova
Mo te fale o te Atua o Iakopo.+
Ka akoako mai ne ia tatou ki ana auala,
Kae ka sa‵sale tatou i ana ala.”
Me i te tulafono* ka fanatu mai i Siona,
Kae ko te muna a Ieova mai i Ielusalema.
3 Ka fai ne ia te fakamasinoga i fenua e uke+
Kae faka‵tonu aka a mea e uiga ki atufenua ma‵losi i koga ‵mao.
Ka tuki ne latou olotou pelu ke fai mo mea fakamalū laukele
Mo olotou tao ke fai mo naifi ‵vele vao.+
A te atufenua e tasi ka se toe sisi aka tena pelu o taua atu ki te suā atufenua,
Kae ka se toe tauloto latou ki te faiga o taua.+
4 Ka saga‵saga* a latou taki tokotasi mai lalo i olotou vine mo olotou mati,+
Kae ka seai se tino e ma‵taku latou ki ei,+
Me ko oti ne faipati mai te gutu o Ieova o kautau.
5 Me i tino katoa ka sa‵sale, ko tino taki tokotasi i igoa o olotou atua,
Kae ka sa‵sale tatou i te igoa o Ieova te ‵tou Atua+ ki te se-gata-mai, se-gata-mai eiloa.
6 “I te aso tenā,” ko te folafolaga a Ieova,
“Ka fakamaopoopo ne au a tino kolā ne ketu‵ketu,
Kae ‵luku fakatasi a latou kolā ne salalau valevale,+
Fakatasi mo latou kolā ne fai fakamasei ne au.
7 Ka fai ne au a te tino telā ne ketuketu ke fai mo fai se ‵toega o tino,+
Kae ko te tino telā ne ave ke ‵mao ke fai mo fai se atufenua malosi;+
Kae ka pule eiloa a Ieova e pelā me se tupu ki luga i a latou i te Mauga o Siona,
Mai te taimi nei ke oko eiloa ki te se-gata-mai.
8 E pelā mo koe, e te taoa o te lafu,
Te koga maluga a te tama fafine o Siona,+
Ka oko mai ki a koe, ao, ka oko mai eiloa a te pulega muamua,+
Ko te malo o te tama fafine o Ielusalema.+
9 Nei la, kaia e pakalaga atu ei koe i se leo maluga?
E a, e seai sou tupu,
Io me e a, ko oti ne mate atu tau tino fakatonutonu,
Telā ko oko atu ei te logo‵mae ki a koe e pelā me se fafine ka fai o fanau?+
10 Fitifiti valevale kae tagi fi‵ta, e te tama fafine o Siona,
E pelā me se fafine ko fanau,
Me nei la, ka fanatu koe mai i te fakai o nofo i te vao.
Ka fanatu koe ke oko atu ki Papelonia,+
Kae i konā ka fakasao ei koe;+
I konā ka toe ‵togi mai ei koe ne Ieova mai i lima o ou fili.+
11 E uke a atufenua ka maopoopo fakatasi o ‵teke atu ki a koe;
Ka fai mai latou, ‘Ke se ‵ma eiloa a ia,
Kae ke lavea eiloa ne ‵tou mata a te mea tenei e tupu ki Siona.’
12 Kae e se iloa ne latou a mafaufauga o Ieova,
E se malamalama latou i ana fuafuaga;
Me ka fakamaopoopo mai ne ia latou e pelā me ne fakaputuga o saito ‵fou ne ‵kati i te koga solo saito.
13 Tu ki luga o solo saito, e te tama fafine o Siona;+
Me ka ‵fuli ne au ou sau ki fiti,
Kae ka ‵fuli ne au ou alofivae ki kopa,
Kae ka fakaseai atu ne koe a tino e tokouke.+
Ka tuku atu ne koe ki a Ieova olotou mea kolā e maua i auala sē ‵tonu,
Kae ka tuku atu olotou koloa ki te Aliki tonu o te lalolagi kātoa.”+