Esekielu

16 Ne toe oko mai te fekau a Ieova ki a au, ana muna: 2 “Te tama a te tagata, fakailoa atu ki Ielusalema e uiga ki ana faifaiga fakatakalia‵lia.+ 3 E ‵tau mo koe o fai atu, ‘Konei a pati a te Aliki Sili ko Ieova ne fai ki Ielusalema: “A koe ne māfua mai kae ne fanau mai i te fenua o tino Kanana. A tou tamana se tino Amoli,+ kae ko tou mātua se tino Heti.+ 4 E pelā mo te aso ne fanau ei koe, a tou pito ne seki ‵kati, a koe ne seki fakakoukou ki vai ke ‵ma koe, a koe ne seki ‵mili ki masima, kae ko koe ne seki fakapulupulu ki laugatu. 5 E seai se tino ne alofa ki a koe o fai ne ia se mea mai i mea konei. E seai se tino ne alofa atafai atu ki a koe. I lō te fai penā, a koe ne ‵pei atu ki te malae me ne takalia‵lia a tino ki a koe i te aso ne fanau mai ei koe.

6 “‘“I te taimi ne ui atu ei au i konā, ne lavea ne au koe e akaaka ou vae i loto i ou toto eiloa, kae i tau takatoga i loto i ou toto, ne fai atu au: ‘Tumau i te ola! Ao, au ne fai atu ki a koe telā e takato i ou toto: ‘Tumau i te ola!’ 7 Ne fai ne au koe ke pelā me se vaitino e tokouke, e pelā me ne lakau e ‵somo aka i te fatoaga, kae ne tupu aka koe kae malosi kae pei ki toe teuga ‵lei. A ou mataū ne tupu ‵lei, kae ola ‵lei tou laulu; kae koi nofo fuafua eiloa koe kae tuku faka‵sau atu.”’

8 “‘I te taimi ne ui atu ei au i konā kae lavea ne au koe, ne iloa ei ne au me ko matua ‵lei koe ke fakaasi atu ki a koe a fakaasiga o te alofa. Tenā ne ‵fola ei ne au toku gatu* i luga i a koe+ ke pulou ei koe mai te nofo fuafua kae fai se tautoga kae fai se feagaiga mo koe,’ ko te folafolaga a te Aliki Sili ko Ieova, ‘kae ne fai ei koe mō oku. 9 E se gata i ei, ne ‵fulu ne au koe ki vai kae ‵fulu kea‵tea ou toto kae ‵mili koe ki te sinu.+ 10 Tenā ne fakapei ei ne au koe ki se gatu ne ‵sui fakagaligali kae tuku atu ne taka ‵lei* kae fakapulupulu koe ki laugatu lino ‵lei, kae fakapei ne au koe ki gatu ‵togi ‵mafa. 11 Ne teuteu ne au koe ki teuga ‵gali kae faulu a taulima ki ou lima mo se malele i tou ua. 12 Ne faka‵piki foki ne au se ligi ki tou isu mo ligi ki ou taliga mo se kalauna gali ki luga i tou ulu. 13 Ne teuteu faeloa ne koe a koe eiloa ki aulo mo siliva, kae ko ou gatu ne laugatu lino ‵lei, laugatu ‵togi ‵mafa, mo laugatu ne teu fakagaligali. A koe ne kai ki falaoa ‵mata kae ‵lei, hani mo sinu, kae ne tinogali koe i tau tupuakaga,+ kae ne toka ‵lei koe ke fai pelā me se tupu fafine.’”

14 “‘Ne kamata o salalau atu tou takutakua* ki nisi atufenua+ ona ko tou tinogali, kae ne ‵lei katoatoa me ne tuku atu ne au toku gali ki luga i a koe,’+ ko te folafolaga a te Aliki Sili ko Ieova.”

15 “‘Kae ko koe ne kamata o talitonu ki tou tinogali,+ kae ne fai koe e pelā me se fafine talitāgata ona ko tou takutakua.+ Ne fai valevale ne koe au faifaiga talitāgata ki so se tino e ui atu i konā,+ kae ko maua ne ia tou tinogali. 16 Ne puke ne koe ou nisi gatu kae fai i ei ke lanu kese‵kese a koga ma‵luga, ko koga e fai ei au faifaiga talitāgata+​—a vaegā mea penā ne mea sē ‵tau, kae ne seki ‵tau o ‵tupu. 17 Ne puke foki ne koe au mea fakagali‵gali ne faite ki aulo mo siliva kolā ne tuku atu ne au ki a koe kae ne faite ne koe ne fakatusa o tāgata mō koe kae fai au faifaiga talitāgata mo latou.+ 18 Kae ne puke ne koe ou gatu ne ‵sui fakagali‵gali kae pulou atu a latou ki ei, kae ne ofo ne koe ki a latou a taku sinu mo aku mea ma‵nogi.+ 19 Kae ko meakai kolā ne tuku atu ne au ki a koe​—ne faite mai i falaoa ‵mata kae ‵lei, sinu, mo hani kolā ne tuku atu ne au mo ou kai​—ne ofo atu foki ne koe ki a latou e pelā me se mea manogi gali.+ Tenā eiloa te mea ne tupu,’ ko te folafolaga a te Aliki Sili ko Ieova.”

20 “‘Ne puke ne koe au tama tāgata mo au tama fāfine kolā ne fai i a au,+ kae ofo atu ne koe ki tupua ke fakaseai atu i ei+​—e a, e seki malie eiloa koe ki au faifaiga talitāgata? 21 Ne tamate ne koe aku tama tāgata, kae ofo atu ne koe latou e pelā me ne taulaga mai te ‵sunu atu o latou i te afi.+ 22 I te taimi ne fai ei ne koe au faifaiga fakatakalia‵lia katoa mo faifaiga talitāgata, ne seki masaua ne koe a aso ne talavou ei koe, i te taimi ne nofo fuafua kae tuku faka‵sau atu ei koe, e akaaka ou vae i loto i ou toto eiloa. 23 Mai tua o au faifaiga matagā katoa, kalofa, kalofa eiloa i a koe,’+ ko te folafolaga a te Aliki Sili ko Ieova. 24 ‘Ne faite ne koe se koga mō tapuakiga ‵se kae fakatu se koga maluga mō koe i malae katoa o te fakai. 25 Ne faite ne koe ou koga ma‵luga i toe koga lauiloa i auala katoa, kae ‵fuli ne koe tou tinogali ki se mea fakatakalialia mai te ofoatuga o koe eiloa ki tino katoa e ui atu i konā,+ kae ne fakauke ne koe au faifaiga talitāgata.+ 26 Ne fai ne koe a faifaiga talitāgata ki tama tāgata o Aikupito,+ ko ou tuakoi kolā e fina ki amioga fakatauavaga, kae ne fai ne koe au ke kaitaua ki au faifaiga talitāgata e uke. 27 Nei la, ka fakaoko mai ne au toku lima o taua atu ki a koe kae fakamu‵tana au meakai+ e maua kae tuku atu koe ke fai te loto o fāfine kolā e takalia‵lia ki a koe,+ ko tama fāfine o Filisitia, kolā e ofo malosi i au amioga matagā.+

28 “‘Ona ko te mea e se mafai o lotomalie koe, tenā ne fai ei au faifaiga talitāgata ki tama tāgata o Asulia,+ kae i te otiga o au faifaiga talitāgata ne fai ki a latou, ne seki lotomalie eiloa koe. 29 Tenā ne momea aka ei ne koe te uke o au faifaiga talitāgata ne fai ki te fenua o tino fai pisinisi* mo tino Kaletaia,+ kae ne seki lotomalie foki eiloa koe. 30 Ko oko loa i te masaki* o tou loto,’* ko te folafolaga a te Aliki Sili ko Ieova, ‘i te taimi ne fai ei ne koe a mea katoa konei, mai te faiga o mea e pelā me se fafine talitāgata matafatu!+ 31 Kae i te taimi ne faite ei ne koe se koga mō tapuakiga ‵se i te ‵toe koga lauiloa o auala katoa kae faite ou koga ma‵luga i malae katoa o te fakai, a koe e se ‵pau mo se fafine talitāgata, me ne seki talia ne koe se ‵togi. 32 A koe se fafine avaga mulilua telā e fia‵fai mo tino fakaa‵tea i lō tena avaga!+ 33 E tuku atu ne tino se meaalofa ki fāfine talitāgata katoa,+ kae ko koe e tuku atu ne koe a meaalofa ki tino kolā e fina ki amioga fakatauavaga,+ kae ‵togi fakakolekole ne koe latou ke ‵mai ki a koe mai koga katoa ke fai amioga talitāgata.+ 34 A koe e ‵kese ‵ki eiloa mo nisi fāfine kolā e fai a faifaiga talitāgata. E seai se tino e fai ne ia a faifaiga talitāgata e pelā mo koe. E ‵togi ne koe a nisi tino, kae e se ‵togi ne latou koe. Ou auala e ‵kese eiloa.’

35 “Tela la, e te fafine talitāgata,+ fakalogo mai ki te fekau a Ieova. 36 Konei a pati a te Aliki Sili ko Ieova ne fai mai: ‘Ona ko te lasi o tou fina ki amioga fakatauavaga kae tuku faka‵sau atu tou nofo fuafua i te taimi ne fai ei au faifaiga talitāgata mo tino kolā e fia‵fai ki a koe fakatasi mo au tupua matagā kae fakatakalia‵lia katoa+ kolā ne ofo atu ne koe ki ei a toto o au tama tāgata,+ 37 tela la, ko fakamaopoopo fakatasi ne au a tino katoa kolā ne fia‵fai ki a koe kae ne fiafia koe ki a latou, ko latou katoa kolā ne fiafai koe ki ei fakatasi mo latou katoa kolā ne takalialia koe ki ei. Ka fakamaopoopo fakatasi ne au latou ke taua atu ki a koe mai i feitu katoa kae tuku faka‵sau atu tou nofo fuafua ki a latou, kae ka lavea ne latou a koe e nofo fuafua.+

38 “‘Kae ka fakasala ne au koe ki fakamasinoga kolā e ‵tau o maua ne fāfine mulilua+ mo fāfine fakamaligi toto,+ kae ko tou toto ka fakasali atu i te kaitaua mo te masalosalo.+ 39 Ka tuku atu ne au koe ki olotou lima, kae ka ofa ki lalo ne latou ou koga mō tapuakiga ‵se, kae ko ou koga ma‵luga ka ofa ki lalo;+ kae ka saesae ne latou ou gatu+ kae puke ou teuga fakagali‵gali+ kae tuku koe ke nofo fuafua kae tuku faka‵sau atu. 40 Ka aumai ne latou se vaitino ke taua atu ki a koe,+ kae ka peipei ne latou koe ki fatu+ kae tamate koe ki olotou pelu.+ 41 Ka ‵sunu ne latou ou fale ki te afi+ kae fai te fakamasinoga o koe i mua o fāfine e tokouke; kae ka fakagata ne au a faifaiga talitāgata a koe,+ kae ka se toe tuku atu ne koe se ‵togi ki tino. 42 Ka faka‵noga ne au toku kaitaua ki a koe,+ kae ka mafuli kea‵tea toku saua mai i a koe;+ kae ka nofo filemu au kae e se toe kaitaua.’

43 “‘Me ne seki masaua ne koe a aso ne talavou ei koe+ kae ne fai ne koe au ke kaitaua mai te faiga o mea katoa konei, ko aumai ne au te ikuga o au amioga ki luga i tou ulu,’ ko te folafolaga a te Aliki Sili ko Ieova, ‘kae ka se toe faka‵soko ne koe au faifaiga matagā mo au faifaiga fakatakalia‵lia katoa.

44 “‘Kiloke! A tino katoa kolā e fakaaoga ne latou a faigamuna ka fai atu ne latou te faigamuna tenei ki a koe: “E pelā mo te mātua, e penā foki tena tama fafine!”+ 45 A koe ko te tama fafine a tou mātua, telā ne takalialia ki tena avaga mo ana tama‵liki. Kae ko koe ko te taina o ou taina, kolā ne takalia‵lia ki olotou avaga mo olotou tama‵liki. A tou mātua se tino Heti, kae ko tou tamana se tino Amoli.’”+

46 “‘A tou taina matua ko Samalia,+ telā e nofo i tou feitu ki mātū* fakatasi mo ana tama fāfine,*+ kae ko tou taina foliki, telā e nofo i tou feitu ki saute,* ko Sotoma+ fakatasi mo ana tama fāfine.+ 47 Ne seki sasale fua koe i olotou auala kae tautali atu i olotou faifaiga fakatakalia‵lia, kae i se taimi toetoe fua ne sili atu eiloa tou fai mea pikopiko i au amioga katoa i lō latou.+ 48 E pelā eiloa mo au e ola,’ ko te folafolaga a te Aliki Sili ko Ieova, ‘A tou taina ko Sotoma mo ana tama fāfine ne seki fai ne latou a mea ne fai ne koe mo au tama fāfine. 49 Kiloke! Tenei te mea ‵se a tou taina ko Sotoma ne fai: Ne fakamata‵mata+ a ia fakatasi mo ana tama fāfine+ kae ne uke olotou meakai ne maua+ kae ne ola i se olaga filemu kae tokagamalie;+ kae ne seki fesoasoani atu latou ki tino ne pokotia i fakalavelave mo tino ma‵tiva.+ 50 Ne tumau te lotou fakamaua‵luga+ kae fai faeloa a faifaiga fakatakalia‵lia i oku mua,+ tela la, ne ‵tau mo au o ave kea‵tea latou.+

51 “‘A Samalia+ ne seki fai ne ia te āfa o agasala e uke kolā ne fai ne koe. Ne fai faeloa ne koe au faifaiga fakatakalia‵lia ke uke atu i lō latou, ki te tulaga ko foliga amio‵tonu ei ou taina ona ko au faifaiga fakatakalia‵lia katoa ne fai.+ 52 Nei la, ko ‵tau mo koe o fa‵ki tou masiasi me ko oti ne fakamaoni mai ne koe a amioga a ou taina. Ona ko te fakatakalialia atu o tau agasala i lō latou, ko sili atu te lotou amio‵tonu i lō koe. Nei la, e ‵tau mo koe o mavale kae fa‵ki te masiasi i te faiga ke foliga amio‵tonu ou taina.’

53 “‘Kae ka fakamaopoopo mai ne au olotou tino kolā ne puke fakapagota, ko tino o Sotoma kolā ne puke fakapagota fakatasi mo ana tama fāfine mo tino o Samalia kolā ne puke fakapagota fakatasi mo ana tama fāfine; ka fakamaopoopo mai foki ne au ou tino kolā ne puke fakapagota fakatasi mo latou,+ 54 ko te mea ke mafai o fa‵ki ne koe tou masiasi; kae ka masiasi koe ona ko te mea ne fai ne koe ke fakamafanafana ei latou. 55 Ou taina, ko Sotoma mo ana tama fāfine, ka toe ‵foki ki te lotou tulaga mua, kae ko Samalia mo ana tama fāfine ka toe ‵foki ki te lotou tulaga mua, kae ko koe fakatasi mo au tama fāfine ka toe ‵foki ki te otou tulaga mua.+ 56 E se taulia a tou taina ko Sotoma ke takutaku atu ne koe i te aso ne fakamatamata ei koe, 57 kae koi tuai o tuku faka‵sau atu au amioga ma‵sei.+ Nei la, ko taku fakamasei koe ne tama fāfine o Sulia mo ana tuakoi, kae ko tama fāfine o tino Filisitia,+ ko latou katoa i ou tafa, e fakatauemu ne latou a koe. 58 Ka kufaki eiloa ne koe a ikuga o au amioga matagā mo au faifaiga fakatakalia‵lia,’ ko te folafolaga a Ieova.”

59 “Me konei a pati a te Aliki Sili ko Ieova ne fai: ‘Ka fai eiloa ne au ki a koe a mea ne fai ne koe+ me ne takalialia koe ki te tautoga mai te ofa ne koe o taku feagaiga.+ 60 Kae ka masaua eiloa ne au te feagaiga ne fai ne au mo koe i aso ne talavou ei koe, kae ka fai ne au se feagaiga tumau mo koe.+ 61 Ka masaua ne koe au faifaiga kae ka mavale koe i ei+ māfai ko talia mai ne koe ou taina, ko latou kolā e ma‵tua atu i a koe e pelā foki mo latou kolā e fo‵liki ifo i a koe, kae ka tuku atu ne au latou ki a koe e pelā me ne tama fāfine, kae e se fai penā ona ko tau feagaiga.’

62 “‘Kae ka fai ne au se feagaiga mo koe; kae ka iloa ei ne koe i a au ko Ieova. 63 Tenā ko masaua ei ne koe kae ka ma malosi koe o fakamaga aka tou gutu ona ko tou masiasi,+ māfai ko fai ne au se faka‵māga mō koe faitalia a mea katoa ne fai ne koe,’+ ko te folafolaga a te Aliki Sili ko Ieova.”