Te Lua o Tusi a Ioane
1 Ko tusi atu au, te toeaina matua, ki te fafine filifilia mo ana tama‵liki kolā e alofa tonu au ki ei, kae e se ko au fua kae ko latou katoa foki kolā ko oti ne iloa ne latou te munatonu, 2 ona ko te munatonu telā ko nofo tumau i loto i a tatou, kae ka ‵nofo mo tatou ke oko ki te se-gata-mai. 3 Ka maua ne tatou te alofa tauanoa, te alofa fakamagalo, mo te filemu mai te Atua te Tamana mo Iesu Keliso te Tama a te Tamana, fakatasi mo te munatonu mo te alofa.
4 Ko oko eiloa toku fiafia me ko oti ne lavea ne au a nisi o au tama‵liki e sa‵sale i te munatonu,+ e ‵tusa eiloa mo te fakatonuga telā ne maua ne tatou mai te Tamana. 5 Tela la, ko fakatagi atu au ki a koe, te fafine filifilia, ke fakatau a‵lofa tatou. (E se tusi atu ne au ki a koe se fakatonuga fou, kae ko te mea telā ne maua ne tatou mai i te kamataga.)+ 6 Kae tenei te uiga o te alofa, ke tumau tatou i te sa‵sale e ‵tusa mo ana fakatonuga.+ Tenei te fakatonuga, e pelā eiloa mo te mea ko oti ne lagona ne koutou mai i te kamataga, me e ‵tau o tumau koutou i te sa‵sale i ei. 7 E tokouke a tino faitogafiti ko oti ne olo atu ki te lalolagi,+ ko tino kolā e se taku ‵tonu atu i a Iesu ne vau i te foitino.+ Tenei eiloa te tino faitogafiti mo te anetikeliso.+
8 Ke fakaeteete koutou, ke mo a ma ‵galo i a koutou a mea kolā ne ga‵lue fakatasi tatou ke maua, ko te mea ke katoatoa te taui e maua ne koutou.+ 9 So se tino e tō ki tua mo akoakoga a Keliso kae e se tumau i ei e se maua ne ia te Atua.+ A te tino e tumau i te akoakoga tenei ko ia telā e maua ne ia te Tamana fakatasi mo te Tama.+ 10 So se tino e fanatu ki a koutou kae e se aumai ne ia te akoakoga tenei, ke mo a ma talia ne koutou ki loto i otou fale+ io me fakatalofa atu ki a ia. 11 Me ko te tino telā e fakatalofa atu ki a ia e ‵kau fakatasi mo ia i ana galuega ma‵sei.
12 E tiga eiloa e uke a mea e fia tusi atu ne au ki a koutou, e se manako au ke tusi atu e auala i pepa mo vaitusi, kae e fakamoemoe eiloa au ke fanatu o fai‵pati fakatasi mo koutou, ko te mea ke katoatoa te otou fia‵fia.
13 Ko ‵moli atu alofaaga o tama‵liki a te fafine telā ko te otou taina filifilia.