Te Tusi i te Lua ki te Kau i Tesalonia

3 Kae ko te ‵toe mea, e oku taina, ‵talo faeloa mō matou,+ ko te mea ke tumau te muna a Ieova* i te salalau atu fakavave+ kae ke faka‵malugina e pelā eiloa mo te mea e fai ne koutou, 2 ko te mea ke faka‵sao tatou mai tino fakasaua kae amio ma‵sei,+ me i te fakatuanaki e sē se mea e maua ne tino katoa.+ 3 A te Aliki e fakamaoni, kae ka fakamalosi kae puipui ne ia koutou mai te tino masei. 4 E se gata i ei, e tali‵tonu matou ki te Aliki e uiga ki a koutou, me e fai ne koutou kae ka fai faeloa ne koutou omotou fakatonuga. 5 Ke takitaki faeloa ne te Aliki otou loto mo te manuia ki te alofa o te Atua+ mo te kufaki+ ko te mea ke tumau koutou i te tau‵tali atu i te Keliso.

6 Nei la, ko tuku atu ne matou a fakatonuga, e oku taina, i te igoa o te Aliki ko Iesu Keliso, ke ‵kalo kea‵tea koutou mai so se taina telā e ola i se olaga sonafai+ kae e se tautali i akoakoga kolā ne maua ne koutou mai i a matou.+ 7 Me e iloa ne koutou te auala e ‵tau ei o fakaakoako mai koutou ki a matou,+ me ne seki sonafai omotou amioga i te motou ‵nofoga i a koutou, 8 io me ne ‵kai matou ki meakai mai se tino e aunoa mo se ‵togi.+ I lō te fai penā, ne ga‵lue ‵mafa kae ga‵lue fi‵ta matou i te po mo te ao ko te mea ke se fai matou e pelā me se amoga ‵mafa ki a koutou.+ 9 E se ko tena uiga me e se ‵tau o maua ne matou ne mea mai i a koutou,+ kae ne ma‵nako matou ke fai ne matou se fakaakoakoga ke tau‵tali koutou i ei.+ 10 Se mea tonu, me ne fai sāle atu ne matou te fakatonuga tenei i te taimi ne ‵nofo ei tatou: “Kafai e isi se tino e se fia galue, e se ‵tau foki a ia o kai.”+ 11 Me ko ‵logo matou me e isi ne tino i a koutou e ola i se olaga sonafai,+ e se ga‵lue kae e sona ‵kau atu fua i mea kolā e seai eiloa se lotou fekau i ei.+ 12 E fakatonu kae fakama‵losi atu matou ki vaegā tino penā i te Aliki ko Iesu Keliso, me e ‵tau mo latou o ga‵lue mo te filemu, kae ‵kai ki meakai ne maua i fua o olotou galuega.+

13 Kae ko koutou, e oku taina, sa ‵fiu i te faiga o mea ‵lei. 14 Kafai e se fakalogo se tino ki omotou muna e auala i te tusi tenei, fakamailoga aka la te tino tenā, kae sa toe ‵kau atu ki a ia,+ ko te mea ke mā a ia. 15 Kae ke se fai ne koutou a ia mo fai se otou fili, kae ke tumau i te fakamalosi atu ki ei+ e pelā me se taina.

16 Nei la, ke i luga i a koutou i taimi mo auala katoa a te filemu telā e maua mai i te Aliki o te filemu.+ Ke i luga i a koutou katoa a te Aliki.

17 Konei oku alofaaga, ko alofaaga o Paulo i toku lima eiloa,+ ko te fakailoga tenā i aku tusi katoa e tusi atu.

18 Ke i luga i a koutou katoa te alofa tauanoa o te ‵tou Aliki ko Iesu Keliso.